კავკასიურმა დიასპორამ თურქეთში მხარი დაუჭირა აფხაზეთში უძრავი ქონების შესახებ კანონის წინააღმდეგ კამპანიას

ბინების წინააღმდეგ კანონი

აფხაზეთში უძრავი ქონების კანონის წინააღმდეგ სახალხო კამპანიას მხარი დაუჭირა თურქეთის დიდმა კავკასიურმა დიასპორამ. ორმოცდაათზე მეტმა ორგანიზაციამ შეადგინა ერთობლივი პეტიცია, რომლებიც წარმოადგენენ არა მხოლოდ ეთნიკურად აფხაზებს, არამედ ჩერქეზებს, ყაბარდოელებს, ოსებს, ინგუშებს და სხვა კავკასიელ ხალხებს.

სოხუმში სტამბოლის სპეციალური დელეგაცია ჩავიდა, რათა პეტიცია აფხაზეთის ხელმძღვანელობას წარუდგინოს.

“პეტიციაში ჩამოყალიბებული პრინციპების შესაბამისად, ჩვენ არ ვეთანხმებით უძრავი ქონების კანონპროექტში შესწორებებს ან სხვა ცვლილებებს. მხოლოდ სრული უარი ამ საკითხის განხილვაზე“, – აცხადებენ დიასპორის წარმომადგენლები.

მათ მიაჩნიათ, რომ აფხაზეთის ხელმძღვანელობა ვალდებულია მოისმინოს ადგილობრივი საზოგადოებისა და დიასპორის აზრი და შეწყვიტოს კანონპროექტის განხილვა.

• “ეს არის საზოგადოების პროტესტი ხელისუფლების წინააღმდეგ” – პოლიტოლოგი აფხაზეთში ბინების კანონის შესახებ
• ეკონომისტის მოსაზრება: რატომ ლობირებს აფხაზეთის ხელისუფლება ბინების შესახებ კანონს?
• ვინ არის დამნაშავე: მედვედევი თუ აფხაზეთის ხელისუფლება? მოსაზრება

ბინების შესახებ კანონპროექტი, რომელსაც მოსკოვის ზეწოლის ქვეშ, აქტიურად ლობირებს აფხაზეთის პრეზიდენტი ასლან ბჟანია, ფაქტობრივად აუქმებს აფხაზეთში საცხოვრებელი უძრავი ქონების უცხოელებზე მიყიდვის არსებულ აკრძალვას.

კანონპროექტი ამჟამად პარლამენტშია, თუმცა საზოგადოების პროტესტის გამო მისი განხილვა შეფერხებულია.

ამ კანონის მიღებას ეწინააღმდეგებოდნენ აფხაზეთის ქალაქებისა და რეგიონების ასამბლეები, საზოგადოებრივი ორგანიზაციები, კვლევითი ცენტრები და შემოქმედებითი გაერთიანებები. მთელი აფხაზეთის მასშტაბით მიმდინარეობს ხელმოწერების შეგროვება კანონპროექტის პარლამენტიან გატანის მოთხოვნით.

უცხოელების მიერ უძრავი ქონების შეძენის აკრძალვა, პირველ რიგში, აფხაზეთში არსებული დემოგრაფიული ბალანსის დარღვევის შიშით აიხსნება. მოწინააღმდეგეების აზრით, აკრძალვის გაუქმებამ შეიძლება გამოიწვიოს ის ფაქტი, რომ ეთნიკური აფხაზები კვლავ აღმოჩნდებიან უმცირესობაში თავიანთ ისტორიულ სამშობლოში, როგორც ეს უკვე მოხდა საბჭოთა პერიოდში.

დიასპორის წარმომადგენლები პარლამენტის წევრებს შეხვდნენ და კანონპროექტთან დაკავშირებით საკუთარი პოზიცია დააფიქსირეს.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო