“მაგნიტსკის აქტის” ავტორის, ბილ ბროუდერის თქმით, თუ მიხეილ სააკაშვილი გარდაიცვლება, ხელისუფლებას ჯოჯოხეთური ფასის გადახდა მოუწევს. ამის შესახებ ბროუდერმა ტელეკომპანია “ფორმულას” ეთერში ისაუბრა.
“ეს გაფრთხილებაა საქართველოს ხელისუფლებისთვის, რომელიც მიხეილ სააკაშვილს ციხეში აწამებს”, – ამბობს ბროუდერი.
მან იმ ზომებზე ისაუბრა, რასაც “მაგნიტსკის სიაში” მოხვედრილი ადამიანების წინააღმდეგ მიმართავენ:
● ამ ეტაპზე სააკაშვილის იურიდიული გუნდი მის წინააღმდეგ უფლებადარღვევის ფაქტებზე მტკიცებულებებს აგროვებს და ცდილობენ საქართველოშიც და საზღვარგარეთაც ეს მტკიცებულებები შეაჯერონ – ჯერ სააკაშვილის სია არ აქვთ, თუმცა ჩამოყალიბებისთანავე გაასაჯაროებენ.
● როცა ადამიანი “მაგნისტკის სიაში” ხვდება ორი რამ ხდება: მათი აქტივები იყინება და ვიზები უუქმდებათ – მათ არ შეუძლიათ იმ ქვეყნებში მოგზაურობა, რომლებმაც ისინი ამ სიაში შეიყვანეს. ეს ადამიანები ხდებიან გარიყულები საერთაშორისო დონეზე – არავის სურს მათთან ბიზნესის წარმოება, ბანკები ანგარიშებს არ უხსნიან, ისინი ფინანსური სამყაროსთვის ტოქსიკურები ხდებიან.
● ეს არის გამანადგურებელი მდგომარეობა ყველასთვის, ვინც ამ სიაში მოხვდება. როგორც კი მოხვდები ამ სიაში მისგან თავის დაღწევის გზა აღარ არსებობს, სამუდამოდ. ეს ადამიანის უფლებათა დამრღვევებისთვის სასჯელია მთელი ცხოვრების განმავლობაში.
● სააკაშვილის საქმეზე მტკიცებულებების შეგროვების შემდეგ ამ დოკუმენტაციას სხვადასხვა ქვეყნების უწყებებს გადავცემთ: აშშ-ში სახელმწიფო დეპარტამენტსა და სახაზინო დეპარტამენტს, გაერთიანებულ სამეფოში საგარეო და თანამეგობრობის უწყებას, ევროკავშირის გარე მოქმედების სამსახურს და კანადაში გლობალური ურთიერთობების სამსახურს.
● ეს უწყებები დოკუმენტაციას განიხილავენ და დაადგენენ ადგილი ჰქონდა თუ არა ადამიანის უფლებების სერიოზულ დარღვევას და წარდგენილი მტკიცებულებები ადგენს თუ არა ინდივიდების პასუხისმგებლობას ამ დარღვევებში.
● ამ კონკრეტულ შემთხვევაში, ვინაიდან ყოფილ პრეზიდენტია, ვისაც აწამებენ, ვფიქრობ მას უმაღლესი პრიორიტეტი მიენიჭება როცა ეს ხელისუფლებები მიიღებენ ამ აპლიკაციებს.
● მნიშვნელოვანია წარდგენილი მასალაში მკაფიოდ ჩანდეს კონკრეტული პირების, მათ შორის პოლიტიკოსების პასუხისმგებლობაც. ხოლო და იმ შემთხვევაში თუ სააკაშვილი პატიმრობაში მოკვდება, სააკაშვილის სიაში უმაღლესი თანამდებობის პირები, მათ შორის პრემიერმინისტრიც შეიძლება მოხვდეს.
● ისტორიაში არ ყოფილა შემთხვევა, როცა ქვეყნის ყოფილ ლიდერს ახალი ხელისუფლება პოლიტიკურად მოტივირებულად ასამართლებს და ციხეში კლავს.
● დასავლეთში ყველა შოკირებულია და გარანტიას გაძლევთ, რომ ყველა მნიშვნელოვან ქვეყანაში ხალხი იმდენს გააკეთებს, რომ ის ადამიანები, ვინც ამაზე პასუხისმგებლები იქნებიან საშინელ მდგომარეობაში აღმოჩნდნენ.
“მაგნიტსკი აქტის” ავტორმა ბილ ბროუდერმა გასული წლის 24 დეკემბერს ტვიტერზე დაწერა, რომ საქართველოს ყოფილი პრეზიდენტი მიხეილ სააკაშვილი პოლიტპატიმარია და “ის ჩვენ თვალწინ კვდება.” მისი თქმით, თუ მას სამკურნალოდ ევროპაში არ გადაიყვანენ, ამას “მხოლოდ მკვლელობა შეიძლება ეწოდოს”.
ამის შემდეგ მიხეილ სააკაშვილმა ბროუდერს ღია წერილით მიმართა და სთხოვა, რომ ადგილობრივ ქართულ ჯგუფებს “მაგნიტსკის ახალი” სიის შედგენაში დაეხმაროს მანამ, სანამ მისთვის ლეტალური შედეგი დადგება.
ბროუდერმა სააკაშვილის წერილს უპასუხა და ექსპრეზიდენტს სთხოვა, რომ მისმა გუნდმა მოამზადოს დოკუმენტები, თუ ვინ აფერხებს სამედიცინო მკურნალობას და ვინ არის პასუხისმგებელი მის მოწამვლასა და წამებაზე. ასევე, ბროუდერი სააკაშვილს დაჰპირდა, რომ ის ყველაფერს გააკეთებს იმისთვის, რომ მაგნიტსკის სანქციებისთვის დასავლური ქვეყნების მთავრობებმა ამას ყურადღება მიაქციონ.
სააკაშვილის ადვოკატის, შალვა ხაჭაპურიძის თქმით, “მაგნიტსკის აქტის” ქართული ანალოგი უკვე მზადაა და მასში დაახლოებით ოცი ადამიანი შევა, მათ შორის, იუსტიციის მინისტრი, რატი ბრეგაძე.
11 იანვარს ბროუდერმა ტელეკომპანია “ტვ პირველთან” ინტერვიუში კიდევ ერთხელ აღნიშნა, რომ საქართველოს ექსპრეზიდენტ მიხეილ სააკაშვილს აწამებენ. “მაგნიტსკის აქტის” ავტორმა ასევე ხაზი გაუსვა, რომ ამ ყველაფრის უკან რუსეთის პრეზიდენტი, ვლადიმირ პუტინი დგას, რომელსაც სააკაშვილზე შურისძიება სურს, რადგან საქართველოს ექსპრეზიდენტი 2008 წელს წინ აღუდგა პუტინს, როდესაც ის შემოიჭრა საქართველოში.
რა არის “მაგნიტსკის აქტი”
37 წლის სერგეი მაგნიტსკი უკრაინული წარმოშობის რუსი საგადასახადო მრჩეველი და ადვოკატი იყო, ვინც რუსეთის ხელისუფლება კორუფციასა და სამსახურებრივი უფლებამოსილების გადაჭარბებაში ამხილა. მაგნიტსკი რუსეთის ისტორიაში ყველაზე მასშტაბური ფინანსური მაქინაციების გამოაშკარავების გამო 2008 წელს დააპატიმრეს და 11 თვეში ციხეში მოკლეს.
“მაგნიტსკი აქტი” 2012 წელს აშშ-ის კონგრესმა მიიღო. ამ აქტის მთავარი მიზანი რუსეთის ხელისუფლების იმ წარმომადგენლებისთვის პასუხისმგებლობის დაკისრება იყო, ვინც მოსკოვის ციხეში სერგეი მაგნიტსკის სიკვდილზე იყო პასუხისმგებელი.
ხოლო 2016 წლის განახლებული ვერსიის საფუძველზე, “მაგნიტსკის აქტის” მეშვეობით აშშ-ის ხელისუფლებას შეუძლია ადამიანის უფლებების დარღვევის ფაქტების გამო მსოფლიოს მასშტაბით უცხო ქვეყნის ხელისუფლების წევრებს სანქციები დაუწესოს – გაყინოს მათი ქონება და აუკრძალოს აშშ-ის ტერიტორიაზე შესვლა.
