"უკანონო და ბათილი" - ევროკავშირის წარმომადგენლობა და ელჩები რუსეთისთვის ბიჭვინთის აგარაკების გადაცემაზე
ბიჭვინთის აგარაკი აფხაზეთში
ევროკავშირის წარმომადგენლობა საქართველოში და ელჩები ბიჭვინთის აგარაკების რუსეთისთვის გადაცემას ეხმაურებიან და აცხადებენ, რომ ნებისმიერი გადაწყვეტილება, რომელიც ძირს უთხრის საქართველოს ტერიტორიულ მთლიანობას არის უკანონო და ბათილი.
საქართველოს საგარეო საქმეთა სამინისტროს განცხადებით, აფხაზეთის ე.წ. პარლამენტის მიერ რუსეთის ფედერაციისთვის ბიჭვინთის აგარაკის გადაცემის შესახებ შეთანხმების რატიფიკაცია წარმოადგენს მორიგ უკანონო ქმედებას და რუსეთის მიერ საქართველოს განუყოფელი რეგიონების ოკუპაციის პოლიტიკის გაგრძელებას, რაც უხეშად არღვევს საერთაშორისო სამართლის ფუნდამენტურ პრინციპებს.
ევროკავშირის წარმომადგენლობის განცხადება
“ევროკავშირი სრულად მხარს უჭერს საქართველოს ტერიტორიულ მთლიანობასა და სუვერენიტეტს ქვეყნის საერთაშორისოდ აღიარებულ საზღვრებში. ნებისმიერი გადაწყვეტილება, რომელიც ძირს უთხრის საქართველოს ტერიტორიულ მთლიანობას, როგორიცაა აფხაზეთის ოკუპირებული თვითგამოცხადებული რეგიონის მიწების რუსეთისთვის გადაცემის მცდელობა, არის უკანონო, ძალის არ მქონე და ბათილი.”– ნათქვამია განცხადებაში.
საფრანგეთის ელჩის განცხადება
რუსეთისთვის ბიჭვინთის სახელმწიფო აგარაკების გადაცემას უკანონოსა და ბათილს უწოდებს საქართველოში საფრანგეთის ელჩი, შერაზ გასრიც. მისი თქმით, საფრანგეთი საქართველოს ტერიტორიულ მთლიანობასა და სუვერენიტეტს მხარს უჭერს.
“საფრანგეთი მხარს უჭერს საქართველოს ტერიტორიულ მთლიანობასა და სუვერენიტეტს მის საერთაშორისოდ აღიარებულ საზღვრებში. ნებისმიერი გადაწყვეტილება, რომელიც ხელყოფს საქართველოს ტერიტორიულ მთლიანობას, როგორიცაა ბიჭვინთის ტერიტორიის გადაცემა რუსეთისთვის, არის უკანონო და ბათილი”, – ნათქვამია ელჩის განცხადებაში.
ჩეხეთის ელჩის განცხადება
ჩეხეთის ელჩის, პეტრ კუბერნატის თქმით, რუსეთისთვის ბიჭვინთის ტერიტორიის გადაცემაზე გადაწყვეტილება უნდა გაუქმდეს:
“ჩეხები საქართველოს ტერიტორიულ მთლიანობასა და სუვერენიტეტს ყოველთვის მხარს უჭერდნენ და განაგრძობენ მხარდაჭერას მომავალშიც. შესაბამისად, მიგვაჩნია რომ ბიჭვინთის მიწის რუსეთისთვის გადაცემა ეწინააღმდეგება ამას და ყველა ასეთი გადაწყვეტილება უნდა ანულირდეს და გაუქმდეს.”
● „აფხაზეთის სუვერენიტეტის დათმობის ღამე“. მოსაზრება აფხაზეთიდან ბიჭვინთის აგარაკზე
● ბიჭვინთის ცნობილი სახელმწიფო აგარაკი და 180 ჰექტარი ფიჭვნარი რუსეთის მფლობელობაში გადადის
● რა ტერიტორიების და ობიექტების მიღება სურს რუსეთს აფხაზეთისგან. კომენტარი
27 დეკემბერს აფხაზეთის პარლამენტმა ბიჭვინთის სახელმწიფო აგარაკი რუსეთს გადასცა
აფხაზეთის პარლამენტმა მხარი დაუჭირა ბიჭვინთის სახელმწიფო აგარაკის რუსეთის ფედერაციისთვის იჯარით გადაცემას. გადაწყვეტილების შესახებ ინფორმაცია 27 დეკემბერს გამთენიისას გახდა ცნობილი, როცა სოხუმში, პარლამენტის წინ ბიჭვინთის გადაცემის საწინააღმდეგო დემონსტრაცია გრძელდებოდა.
აფხაზეთსა და რუსეთის ფედერაციას შორის შეთანხმება ბიჭვინთის ტერიტორიაზე მყოფი ობიექტების მოსკოვისთვის გადაცემაზე 2022 წლის 19 იანვარს გაფორმდა. ხელშეკრულება რუსეთისთვის 186 ჰექტარი მიწისა და 115 ჰექტარი აკვატორიის რუსეთისთვის 49 წლით იჯარით გადაცემას ითვალისწინებს.
აფხაზეთში ოპოზიციისა და საზოგადოების უმრავლესობის უკმაყოფილების არსი არ არის ობიექტის რუსეთისთვის გადაცემის ფაქტი. პრობლემა ის პირობებია, რაც ხელშეკრულების ტექსტშია შეტანილი.
ყველაზე დიდი აღშფოთება გამოწვეულია იმით, რომ შეთანხმებაში არასწორად იყო მითითებული რუსეთის საკუთრებაში გადაცემული აგარაკის კოორდინატები. აღმოჩნდა, რომ გარდა თავად აგარაკის ტერიტორიისა, 180 ჰექტარი, თავად ბიჭვინთის ტერიტორიის უმეტესი ნაწილი, რუსეთს უნდა გადაეცეს.
27 დეკემბერს, პარლამენტის თავმჯდომარემ ლაშა აშუბამ განაცხადა, რომ მთელი ღამის განმავლობაში მიმდინარეობდა კონსულტაციები ოპოზიციის წარმომადგენლებთან, რის შედეგადაც მომზადდა აფხაზეთის კანონმდებლობაში არაერთი ცვლილება, რომელმაც, არსებითად, უნდა გამოასწოროს ის ხარვეზები, რომლებიც კანონპროექტში აქამდე იყო.
პარლამენტის თავმჯდომარე აქციის მონაწილეებთან გავიდა და მიღებული გადაწყვეტილება თავად აცნობა:
„კოორდინატებთან დაკავშირებული ცვლილება მიიღო რუსეთის მხარემ და მივიღეთ ჩვენც, შეკითხვა დარჩა „მესამე მხარეებთან“ დაკავშირებით. შედგა შესაბამისი შეხვედრა ხელისუფლებისა და ოპოზიციის წარმომადგენლებს შორის, რომელზეც მივედით კონსენსუსამდე შესაბამის კანონებში ცვლილებების შეტანაზე.
ეს არის კანონი „საერთაშორისო ხელშეკრულებების შესახებ“, სამოქალაქო კოდექსი და სპეციალური კონსტიტუციური კანონი, რომელიც კონკრეტულად ეხება სახელმწიფო აგარაკის გადაცემას, სადაც ნათქვამია, რომ ობიექტის მესამე პირებზე გადაცემის შემთხვევაში ხელშეკრულება წყდება და ქონება უბრუნდება აფხაზეთის რესპუბლიკას“.
ბიჭვინთის სახელმწიფო აგარაკის კომპლექსი 1958-61 წლებში შენდებოდა, სსრკ-ს ცენტრალური კომიტეტის გენერალური მდივნის, ნიკიტა ხრუშჩოვის განკარგულებით.
