ბეირუთი ნახევრად განადგურებულია პორტში მომხდარი აფეთქების გამო. ფოტო და ვიდეო
ლიბანის დედაქალაქ ბეირუთში, 4 აგვისტოს მომხდარი აფეთქების გამო, რა დროსაც სულ მცირე 78 ადამიანი დაიღუპა და 4000-ზე მეტი დაშავდა, 3-დღიანი გლოვა გამოცხადდა.
ადგილობრივი მედიის ცნობით, საავადმყოფოები გადავსებულია. მაშველები ჯერ კიდევ ეძებენ ადამიანებს ნანგრევებში. სავარაუდოდ, დაღუპულთა რიცხვი გაიზრდება.
სრულად ან ნაწილობრივ არის განადგურებული ქალაქის დიდი ნაწილი, მათ შორის, ძველი ცენტრი. წინასწარი შეფასებით, ფაქტობრივად განადგურებულია პორტი, რომელიც კრიტიკულად მნიშვნელოვანია ლიბანისთვის, რადგან სწორედ მისი საშუალებით ხდება საკვების, წამლებისა და სასიცოცხლოდ მნიშვნელოვანი ტვირთის ძირითადი ნაწილის მიწოდება.
კატასტროფის მომენტში, საავადმყოფოები უკვე გადავსებული იყო კორონავირუსით ინფიცირებული ადამიანებით. გარდა ამისა, ბეირუთის ქუჩებში გასული რამდენიმე კვირის განმავლობაში მასობრივი საპროტესტო აქციები იმართებოდა, სადაც მოქალაქეები ხელისუფლების არაეფექტიან ეკონომიკურ და სოციალურ პოლიტიკას აპროტესტებდნენ.
რა მოხდა
4 აგვისტოს, ადგილობრივი დროით 18:00 საათზე, მთელი ბეირუთი შეაზანზარა აფეთქებამ, რომელიც პორტში გაჩენილი ხანძრით დაიწყო და შემდეგ ცაში უზარმაზარი სოკოს ფორმის ღრუბლად გადაიქცა.
აფეთქება 240 კილომეტრით დაშორებულ კვიპროსშიც იგრძნეს. ადგილობრივების თქმით, მათ იფიქრეს, რომ მიწისძვრა მოხდა.
ოფიციალური ინფორმაციით, 2 750 ტონა ამონიუმის ნიტრატი საწყობში 2013 წლიდან ინახებოდა, მას შემდეგ, რაც ის ქონფისკირებული გემიდან გადმოიტვირთა.
აფეთქების ზუსტ მიზეზს გამოძიება დაადგენს, თუმცა, ხელისუფლებამ უკვე განაცხადა „განსაკუთრებით საშიში ნივთიერების შენახვისას გამოვლენილი უზარმაზარი დაუდევრობის შესახებ“.
ლიბანის თავდაცვის უმაღლესმა საბჭომ განაცხადა, რომ დამნაშავეებს მაქსიმალური სასჯელი ემუქრებათ.
რა არის ამონიუმის ნიტრატი?
ამონიუმის ნიტრატი ძირითადად გამოიყენება, როგორც სასოფლო-სამეურნეო სასუქი და ასაფეთქებელი ნივთიერება.
ის ძალიან ფეთქებადსაშიშია იმ შემთხვევაში, თუკი ცეცხლთან შევა კონტაქტში. სწორედ ამიტომ, როგორც წესი, ნივთიერების შენახვას თან ახლავს უსაფრთხოების განსაკუთრებით გაზრდილი მოთხოვნები.
ამონიუმის ნიტრატის აფეთქებისას გამოიყოფა ტოქსიკური გაზი.
„რთული წარმოსადგენია ამისათვის უფრო ცუდი დრო,“ – რამი რუჰაიემი, BBC News, ბეირუთი
აფეთქების შედეგები: „რთული წარმოსადგენია ამისათვის უფრო ცუდი დრო“
რამი რუჰაიემის კომენტარი, BBC News.
ასეთი კატასტროფისთვის არასოდეს არის შესაფერისი დრო, მაგრამ ბეირუთისთვის უფრო ცუდი დროის წარმოდგენა, ვიდრე ახლაა, რთული წარმოსადგენია.
ეკონომიკურმა კრიზისმა და კორონავირუსის პანდემიამ გააძლიერა ისედაც მწვავე დაპირისპირება შიდაპოლიტიკასა და საზოგადოებაში.
ასევე, დაძაბულობა მაღალია 7 აგვისტოს წინ, როდესაც 2005 წელს მოკლული ექსპრემიერ-მინისტრის, რაფიკ ჰარირის მკვლელობის გახმაურებულ საქმეზე განაჩენი უნდა გამოცხადდეს.
საავადმყოფოებში ისედაც რთული ვითარებაა COVID-19-ით ინფიცირების შემთხვევათა ზრდის გამო. ახლა უნდა უმკურნალონ და გადაარჩიონ აფეთქების შედეგად ტრავმირებული ათასობით ადამიანიც.
ასობით ოჯახი უსახლკაროდ დარჩა, მათი სახლები წამის მეასედში გადაიქცა ნაგვისა და შუშის მასად.
ლიბანს საკუთარი საკვების უდიდესი ნაწილი სხვა ქვეყნებიდან შეაქვს. თითქმის მთელი 2019 და 2020 წელი, ქვეყნის ეკონომიკა „თავისუფალ ვარდნაშია“, მედია საკვების უკმარისობის რისკზე მსჯელობს.
მარცვლეულის მთელი მარაგი, რომელიც პორტში ინახებოდა, განადგურებულია. ფაქტობრივად, „აღარ არსებობს“ თავად ბეირუთის პორტიც, როგორც ჟურნალისტებს ერთ-ერთმა მაღალჩინოსანმა განუცხადა.
ასე გამოიყურება ბეირუთი 2020 წლის 5 აგვისტოს დილას
არასტაბილური პოლიტიკური და ეკონომიკური სიტუაცია ლიბანში
ბევრი ექსპერტის შეფასებით, ლიბანი ყველაზე მძიმე ეკონომიკურ კრიზისშია 1975-1990 წლების სამოქალაქო ომის შემდეგ.
ბეირუთში, თვეების განმავლობაში გრძელდება ქუჩის აქციები, ბევრი ადამიანი მმართველ ელიტას ადანაშაულებს იმაში, რომ მათ პირადი ქონება დააგროვეს, ნაცვლად იმისა, რომ რეფორმები გაეტარებინათ.
უკვე დიდი ხანია ყოველდღიურად ითიშება ელექტროენერგია, პრობლემებია სასმელი წყლის უსაფრთხოებისა და ჯანდაცვის სისტემის მიმართულებით.
ბოლო კვირაა ასევე დაძაბულობაა ისრაელის საზღვართან, რომელმაც ერთი კვირის წინ განაცხადა, რომ ხელი შეუშალა ტერორისტულ ორგანიზაცია „ჰეზბოლას“ ისრაელის ტერიტორიაზე შეღწევაში.
საზოგადოებაში განხილვის ცალკე საგანი გახდა ის ფაქტიც, რომ აფეთქება მოხდა იმ ადგილიდან ახლოს, სადაც 2005 წელს აფეთქდა ავტომობილი, რომლის შედეგადაც ყოფილი პრემიერ-მინისტრი ჰარირი დაიღუპა, ახლანდელი აფეთქება კამ მკვლელობის ორგანიზებაში ბრალდებული ოთხი ადამიანის განაჩენი გამოცხადებამდე 4 დღით ადრე მოხდა.
