აზერბაიჯანში მედიის კიდევ ერთი ხელმძღვანელი დააკავეს
პოლიტიკური დაპატიმრებები აზერბაიჯანში
აზერბაიჯანში კიდევ ერთი დამოუკიდებელი გამოცემის, ინტერნეტ არხ Kanal 13-ის ხელმძღვანელი დააკავეს. სამართალდამცავებმა დაკავებული დირექტორის აზიზ ორუჯოვის სახლი და არხის ოფისი გაჩხრიკეს. კონკრეტულად რაში ედება ბრალი ჟურნალისტს, ჯერჯერობით უცნობია, მაგრამ მისი დაკავება მოხდა ქვეყანაში ევროპული და ამერიკული ორგანიზაციების გრანტების წინააღმდეგ გაჩაღებული კამპანიისა და ონლაინ გამოცემა Abzas Media-ს ხელმძღვანელობის დაპატიმრების ფონზე.
- აშშ-მ აზერბაიჯანში გააუქმა კურსდამთავრებულთა შეხვედრა მას შემდეგ, რაც მას “აგენტების შეკრება” უწოდეს
- “ნაციონალური მოძრაობა”: ნიკა მელია პარტიას არ წარმოადგენს, საკითხი დახურულია
27 ნოემბერს საღამოს პოლიციამ დაარბია Youtube არხ Kanal 13-ის აღმასრულებელი დირექტორის, აზიზ ორუჯოვის ბინა. როგორც მისმა მეუღლემ, ლამია ორუჯევამ განაცხადა, ჩხრეკა სასამართლოს ბრძანებით და ადვოკატ ბაჰრუზ ბაირამოვის თანდასწრებით განხორციელდა.
„ჩვენს სახლში ამჟამად რვა პოლიციელია. მხოლოდ ერთს არ უკეთია ნიღაბი, დანარჩენები ნიღბებით არიან. არც ძებნის მიზეზებზე საუბრობენ და არც იმაზე, რას ეძებენ. შემდეგ წაიყვანეს აზიზი. არც კი უთქვამთ, კონკრეტულად სად მიჰყავდათ“, – ამბობს ორუჯევა.
ადვოკატმა ბაჰრუზ ბაირამოვმა განაცხადა, რომ ჩხრეკა სასამართლოს ბრძანებით მიმდინარეობდა.
„აზიზ ორუჯოვმა რამდენიმე წლის წინ იყიდა მიწის ნაკვეთი ბაქოში „მე-20 რაიონში“ და თითქოს უკანონოდ ააშენა სახლი. ასე დაასაბუთეს ჩხრეკის მიზეზი. მაგრამ მისი სახლის ჩხრეკის შემდეგ, მისი კაბინეტიც გაჩხრიკეს“, – განაცხადა ადვოკატმა.
Kanal 13-ის დირექტორი აზიზ ორუჯოვი ადრეც იყო სისხლისსამართლებრივი დევნის ობიექტი – ეკონომიკური დანაშაულის ბრალდებით.
2017 წელს მას 6 წლით თავისუფლების აღკვეთა მიესაჯა. თუმცა, შემდგომში სასჯელი 2018 წელს შეუცვალეს და ის პირობით ვადაზე ადრე გაათავისუფლეს.
ბოლო წლებში არხი მაუწყებლობდა Youtube არხის ფორმატში.
შეგახსენებთ, რომ გასულ კვირას დამოუკიდებელი ონლაინ გამოცემა Abzas Media-ს დირექტორი, მოადგილის თანაშემწე და მთავარი რედაქტორი დააკავეს. სამივეს ბრალი წარედგინა აზერბაიჯანის სისხლის სამართლის კოდექსის 206.3.2 მუხლით (კონტრაბანდა ადამიანთა ჯგუფის მიერ წინასწარი შეთქმულების გზით). სასამართლოს გადაწყვეტილებით, სამივეს ოთხთვიანი წინაწარი პატიმრობა ემუქრება.
როგორც ოფელია მაჰარამოვამ, დაკავებული სევინჯ ვაგიფქიზის დედამ ჟურნალისტებს განუცხადა, მისი ქალიშვილი დამნაშავე არ არის და გაყალბებული ბრალდებით დააკავეს.
„პროკურატურა აცხადებს, რომ რედაქციაში დიდი ოდენობით თანხა იქნა აღმოჩენილი. მაგრამ რატომ არ აიღეს თითის ანაბეჭდები ბანკნოტებიდან? იმის გამო, რომ მათზე სევინის კვალი არ არის“, – თქვა მან.
მაჰარამოვას თქმით, მას ოჯახთან სატელეფონო კომუნიკაციის საშუალებას არ აძლევენ.
„ჩემმა ქალიშვილმა იცოდა, რომ ბაქოში დააპატიმრებდნენ და ჩვენც ვიცოდით, ჩემს ქალიშვილს საზღვარგარეთ დავურეკე და ვთხოვე არ დაბრუნებულიყო. მაგრამ სევინი მამაცი ადამიანია, მან თქვა, რომ ის ჟურნალისტის საქმეს გააკეთებს და ხელისუფლებას ნებას არ მისცემს, აღკვეთოს ის,” – თქვა მაჰარამოვამ.
როგორც ადვოკატმა ზიბეიდა სადიგოვამ ჟურნალისტებს განუცხადა, ულვი ჰასანლიმაც უარყო ბრალდება და მას ასევე არ ეძლევა ტელეფონით და ოჯახის წევრებთან შეხვედრის საშუალება.
ადვოკატები ამ საკითხზე ცალკე საჩივრის შეტანას აპირებენ.
ვაგიფკიზიმ ასევე შეიტანა საჩივარი სააგენტო Report-ის მიერ უდანაშაულობის პრეზუმფციის დარღვევის თაობაზე, რომელიც ვაგიფქიზისა და ჰასანლის დანაშაულის ჩადენის ფაქტს წარმოადგენდა, თუმცა გამოძიება ახლახან დაიწყო. ადვოკატ ფარიზ ნამაზლის თქმით, სააპელაციო სასამართლომ არც ეს საჩივარი დააკმაყოფილა.
