აშშ-ში მოღვაწე ქართველი ექიმები ჯო ბაიდენს სააკაშვილის შტატებში სამკურნალოდ გადაყვანას სთხოვენ

აშშ-ში მოღვაწე ქართველი

ქართველი ექიმები, რომლებიც უკვე წლებია აშშ-ში ცხოვრობენ და მოღვაწეობენ,  შეერთებული შტატების პრეზიდენტ ჯო ბაიდენს მიხეილ სააკაშვილის ამერიკაში სამკურნალოდ გადაყვანის თხოვნით მიმართავენ.

ექიმების წერილშია ნათქვამია, რომ საქართველოს მესამე პრეზიდენტი აშშ-ში უნდა გადაიყვანონ, რათა მისი ჯანმრთელობის მდგომარეობა სრულად და ობიექტურად შეფასდეს. მათივე განმარტებით, მიხეილ სააკაშვილი დაუმსახურებლად ავ მოპყრობას განიცდის.

“მიტოვებულია განსაცდელში და შესაძლებელია დაიღუპოს სწორი მკურნალობის გარეშე. ინფორმაცია მისი ჯანმრთელობის შესახებ ძალიან შემაშფოთებელია. მას განუვითარდა მკვეთრი წონაში კლება, დაბალი წნევა, ნეიროპათია, სინკოპე და გადაადგილების უნარის პრობლემები. არის იმაზე საუბარი, რომ მას ფიზიკურად გაუსწორდნენ და სავარაუდოდ მოწამლეს, რასაც შეეძლო გამოეწვია მისი ჯანმრთელობის შელახვა ან გაუარესება, ჩვენ მიგვაჩნია, რომ ეს და მისი პირადი ჯანმრთელობის მდგომარეობისა და ვიზუალური ინფორმაციის მის დაუკითხავად გამოქვეყნება არის ადამიანური უფლებების დარღვევა.” – ნათქვამია წერილში.

ექიმების თქმით, სასიცოცხლო მნიშვნელობა აქვს, რომ პატარა ქვეყნებს, როგორიც არის საქართველო, ჰქონდეთ პროგრესის იმედი და ეს იმედი გაუფერულდება თუ “ბატონი სააკაშვილი” არ გადარჩა:

“მისი პატიმრობაში სიკვდილის შედეგი დამღუპველი იქნება, რადგან ეს გაანადგურებს საქართველოს დემოკრატიული მომავლის იმედს მომავალი მრავალი წლის განმავლობაში და კიდევ უფრო გაათამამებს პუტინის ამბიციებს.”

● ზელენსკი საქართველოს მოუწოდებს სააკაშვილი სამკურნალოდ საზღვარგარეთ გადაიყვანონ. თბილისის რეაქცია
● “დემოკრატიული ლპობის საფუძველი ბიძინა ივანიშვილია” – დებატები ევროპარლამენტში საქართველოზე 
● “ქართულად საუბრობენ, თორემ სულისკვეთებით არის ФСБ-ს ტექსტები” – რა გამოხმაურება მოჰყვა ღარიბაშვილის განცხადებებს

საქართველოს მესამე ექსპრეზიდენტის, მიხეილ სააკაშვილის მომდევნო სასამართლო პროცესი 29 დეკემბერს გაიმართება.  მიხეილ სააკაშვილი საკუთარ სასამართლოს კლინიკა “ვივამედიდან” დისტანციურად 22 დეკემბერს ჩაერთო. მას სურდა, რომ  სასამართლო დარბაზიდან მოქალაქეებისთვის უკრაინულად მიემართა. საბოლოოდ, სააკაშვილის ადვოკატის, შალვა ხაჭაპურიძის ინფორმაციით, ექსპრეზიდენტმა თავი ცუდად იგრძნო და ჩართვაზე უარი განაცხადა, ხოლო პროცესი მის გარეშე დაახლოებით ექვსი საათის განმავლობაში გაგრძელდა. 

ამჟამად უკრაინის მოქალაქე საქართველოს ექს-პრეზიდენტი მიხეილ სააკაშვილი უკვე წელიწადზე მეტია საქართველოში პატიმრობაში იმყოფება. საქართველოში ის 2021 წლის სექტემბრის ბოლოს დაბრუნდა, 1 ოქტომბერს კი თბილისში დააკავეს.

2018 წელს სააკაშვილი სისხლის სამართლის ორ საქმეზე გაასამართლეს (სანდრო გირგვლიანის მკვლელობაში მსჯავრდებულთა შეწყალების საქმეზე და დეპუტატ ვალერი გელაშვილის ცემის საქმეზე) და ექვსი წლით პატიმრობა მიუსაჯეს.

პარალელურად მის წინააღმდეგ კიდევ სამი სისხლის სამართლის საქმეა აღძრული – 2007 წლის ნოემბრის აქციის დარბევა და ტელეკომპანია “იმედში” შეჭრა, ე.წ. პიჯაკების საქმე, რაც საბიუჯეტო თანხების გაფლანგვას გულისხმობს და ასევე სახელმწიფო საზღვრის უკანონო კვეთა (ეს ბოლო საქმე მის წინააღმდეგ საქართველოს პროკურატურამ 2021 წელს აღძრა. გამოძიების თანახმად, სააკაშვილი უკრაინიდან ფოთის პორტში ფარულად, გემით ჩამოვიდა. იგი რძის პროდუქტებით სავსე ტრაილერში იმალებოდა).

მიხეილ სააკაშვილი მის წინააღმდეგ აღძრულ ყველა საქმეს პოლიტიკურად მოტივირებულად მიიჩნევს, რის გამოც მან დაპატიმრებისთანავე, 2021 წლის ოქტომბერში, შიმშილობა დაიწყო. ექს-პრეზიდენტმა 50 დღე იშიმშილა, რამაც მნიშვნელოვნად შეარყია მისი ჯანმრთელობა.

2022 წლის 12 მაისს სააკაშვილი ჯანმრთელობის მდგომარეობის გაუარესების გამო კლინიკა ვივამედში გადაიყვანეს. თუმცა, მდგომარეობის გაუმჯობესების ნაცვლად, კლინიკაში ყოფნის პერიოდში ის კიდევ უფრო დამძიმდა. მისი მეგობრები და ოჯახის წევრები, რომლებიც ექს-პრეზიდენტს ამ ხნის განმავლობაში ნახულობენ, ამბობენ, რომ მისი მდგომარეობა ყოველდღიურად და თვალშისაცემად უარესდება.

სახალხო დამცველის ეგიდით შექმნილი ექიმთა კონსილიუმის წევრები მიუთითებენ, რომ სააკაშვილმა ვივამედში ყოფნის დროს 40 კილოგრამზე მეტი დაკარგა და ეს პროცესი გრძელდება. აქვს დაუდგენელი ეტიმოლოგიის ცხელება, ანორექსია, კახექსია, კუნთების, სახსრების ძვლების ტკივილი, კუნთების განლევა, რომელიც შესაძლოა წარმოადგენდეს დაუდგენელი ინფექციური პროცესის ან/და შესაძლო ინტოქსიკაციის შედეგს.

2 დეკემბერს ამერიკელმა პროფესორმა, ტოქსიკოლოგმა დევიდ სმიტმა გაასაჯაროვა 2022 წლის 28 ნოემბრით დათარიღებული დასკვნა, სადაც აღნიშნულია, რომ მესამე პრეზიდენტი მძიმე მეტალებითაა მოწამლული. სმიტის დასკვნაში ვკითხულობთ, რომ სააკაშვილის თმისა და ფრჩხილის ექსპერტიზის შედეგად, მის ორგანიზმში ვერცხლისწყლის და დარიშხანის კვალია აღმოჩენილი. დასკვნაში წერია, რომ ამ ნივთიერებების ეს დოზები ორგანიზმში სამედიცინო მკურნალობის შედეგად ვერ მოხვდებოდა.

მანამდე, 1 დეკემბერს, მიხეილ სააკაშვილის ჯანმრთელობის მდგომარეობის შესახებ ჩატარებული ექსპერტიზის დასკვნა გამოაქვეყნა ცენტრმა “ემპათიამ”. ამ დოკუმენტში წერია, რომ დაპატიმრების მომენტისთვის სააკაშვილი “პრაქტიკულად ჯანმრთელი” იყო, დღეს კი, იგი სიკვდილის საფრთხის წინაშეა.

14 დეკემბერს სპეციალურმა პენიტენციურმა სამსახურმა საქართველოს მესამე პრეზიდენტის, მიხეილ სააკაშვილის კადრები გამოაქვეყნა. უწყების ცნობით, ეს კადრები ასახავს სხვადასხვა პერიოდში “პატიმარ მიხეილ სააკაშვილის მდგომარეობას”. კადრების დიდი ნაწილი ოქტომბერშია გადაღებული და ჩანს პალატაში მწოლიარე სააკაშვილი, რომელსაც რამდენჯერმე აქვს ნერვული შეტევა. ამ კადრების გასაჯაროებით “ქართული ოცნება” ცდილობს დაარწმუნოს საზოგადოება, რომ სააკაშვილი სიმულიანტობს და მას ფსიქიკური და არა ფიზიოლოგიური პრობლემები აქვს. ბოლო კადრი დეკემბრით თარიღდება, აქ სააკაშვილი არის გამხდარი და დამოუკიდებლად გადაადგილება უჭირს.