აშშ-მ სანქციები უნდა დაუწესოს პასუხისმგებელ პირებს – აშშ-ს 17 ყოფილი დიპლომატის და ექსპერტის განცხადება
აშშ-ს სანქციები
აშშ-ს 17 ყოფილი დიპლომატი და უსაფრთხოების ექსპერტი ერთობლივ განცხადებას ავრცელებს, რომელშიც “ქართული ოცნების” ანტიდასავლურ კურსსა და პოლიციის მხრიდან მშვიდობიან მომიტინგეებზე ძალადობას გმობს.
ასევე, ხელმომწერები აშშ-ს “ერთპარტიული პარლამენტისა და მის მიერ დანიშნული მთავრობის” არალეგიტიმურად აღიარებისკენ და საქართველოში ავტორიტარულ პოლიტიკაზე პასუხისმგებელ პირებზე სანქციების დაწესებისაკენ მოუწოდებენ.
განცხადებაში ხაზგასმულია, რომ ოცნება აშშ-ს წინააღმდეგ მიმართულ რიტორიკას და ავტორიტარულ პოლიტიკას ევროკავშირის კანდიდატი ქვეყნის სტატუსის მოპოვების შემდეგ იყენებს, მათივე თქმით, 26 ოქტომბრის არჩევნები ეუთო/ოდირის შეფასებით, დამახინჯებული იყო ბოლო დროს მიღებული კანონმდებლობით, მისი გავლენით ფუნდამენტურ თავისუფლებებსა და სამოქალაქო საზოგადოებაზე.
ხელმომწერები ასევე აღნიშნავენ იმასაც, რომ მმართველი პარტიის ქმედებები პუტინმა შეაქო.
“ჩვენ, ორგანიზაცია საქართველოს მეგობრები, მათ შორის, ყოფილი ამერიკელი დიპლომატები, რომლებიც საქართველოში მსახურობდნენ ანდა მუშაობდნენ აშშ-საქართველოს ურთიერთობებზე, საქართველოს მთავრობის მიერ თბილისში მშვიდობიანი დემონსტრანტების წინააღმდეგ მიმართულ ძალადობას უმკაცრესად ვგმობთ. ჩვენთვის ასევე რთულად გასაგებია ქართული ოცნების დე ფაქტო ლიდერის, ბიძინა ივანიშვილისა და პრემიერმინისტრ ირაკლი კობახიძის მიერ მართული საქართველოს ხელისუფლების გადაწყვეტილება, ევროკავშირთან გაწევრიანების მოლაპარაკებები შეაჩერონ. სწორედ ეს გადაწყვეტილება იყო, რომელიც გამოცხადებიდან რამდენიმე წუთში რუსეთის ლიდერმა, ვლადიმერ პუტინმა შეაქო, რამაც ათიათასობით ქართველის დემონსტრაცია გამოიწვია
მას შემდეგ, რაც წინა დეკემბერში ევროკავშირმა საქართველოსთვის კანდიდატის სტატუსის შეთავაზება გადაწყვიტა, მთავრობამ, რომელსაც ქართული ოცნება ხელმძღვანელობს, და პარლამენტმა არასწორი მიმართულებით მნიშვნელოვანი ნაბიჯები გადადგეს. NGO-ებსა და მედიაზე რუსული სტილის კანონმდებლობა მიიღეს, LGBTQ საზოგადოების წინააღმდეგ გაილაშქრეს და თავს დაესხნენ “გლბალური ომის პარტიას” (რაც აშშ-ს აღნიშნავს) იმის მტკიცებით, რომ რუსეთის წინააღმდეგ ომში საქართველოს ჩათრევას ცდილობდა, საბოლოოდ კი არჩევნები ჩაატარეს, რომელიც ოდირის (ეუთო-ს ოფისი დემოკრატიული ინსტიტუტებისა და ადამიანის უფლებებისთვის) თანახმად, “დამახინჯებული იყო ბოლო დროს მიღებული კანონმდებლობით, მისი გავლენით ფუნდამენტურ თავისუფლებებსა და სამოქალაქო საზოგადოებაზე”. ქართული ოცნების წარმომადგენლები ვერბალურად თვს ესხმოდნენ აშშ-ს ყოფილ ელჩს, კელი დეგნანსა და კონგრესის წევრებს. ამ განვითარებების ნაწილმა რუსეთისა და პუტინის მხრიდან შექება დაიმსახურა”. – წერია განცხადებაში.
განცხადებაში აღნიშნულია, რომ აშშ-სა და საქართველოს ბოლო სამი ათწლეულის განმავლობაში მნიშვნელოვანი პარტნიორობა აკავშირებდათ და აშშ საქართველოში დემოკრატიისა და საბაზრო ეკონომიკის განვითარებას მხარს უჭერდა, საქართველო კი რეგიონში რეფორმების მხრივ ლიდერობდა, რაც ქართველი ხალხის ნებას წარმოადგენდა.
ხელმომწერები აღნიშნავენ იმასაც, რომ ამ გარემოების გათვალისწინებით, დროა, აშშ-მ იმოქმედოს. მათივე თქმით, საქართველო თავის ისტორიაში კრიტიკული მომენტის წინაშე დგას, რასაც გავლენა ფართო რეგიონზეც ექნება.
განცხადება აშშ-ს მოუწოდებს, რომ ავტორიტარულ პოლიტიკაზე პასუხისმგებელ პირებს პასუხი აგებინოს.
“აშშ-მ წინა სამი ათწლეულის განმავლობაში საქართველოს $6.5 მილიარდზე მეტი დახმარება გამოუყო. აშშ საქართველოში მისი დამოუკიდებლობის მოპოვებიდან მოყოლებული დემოკრატიასა და საბაზრო ეკონომიკის განვითარებას უჭერდა მხარს და საქართველო ფართო რეგიონში ქვეყნებს შორის რეფორმების მხრივ ერთ-ერთი ლიდერი გახდა, რაც ქართველი ხალხის ნებას ასახავდა. ქართველთა დიდი უმრავლესობა ძალიან პროამერიკელი და პროევროპელია და ევროკავშირსა და NATO-ში გაწევრიანება სურთ.
ეს თვალნათლივ კრიტიკული მომენტია საქართველოს ისტორიაში, რომელსაც შედეგები ექნება მთელ სამხრეთ კავკასიაზე და მის ფარგლებს გარეთაც. სასწორზე დევს საქართველო, როგორც თავისუფლებისა და რეფორმების შუქურა. თუ გავითვალისწინებთ აშშ-ის მხრიდან ქართველი ხალხის მხარდაჭერის მრავალწლიან ისტორიას, როდესაც ისინი დემოკრატიისკენ მიიწევდნენ, უკვე დიდი ხანია, რაც მოქმედების დროა.
ხელისუფლებას თბილისში, რომელმაც ეს ავტორიტარული პოლიტიკა აამოქმედა, და მათ შემსრულებლებს, პიროვნული სარგებლის ნახვა სურთ. აშშ-ს აქვს უნარი, რომ მათ კალკულუსზე გავლენა მოახდინოს და ქართველ ხალხს მხარი დაუჭიროს. ჩვენ ვხედავთ, რომ აშშ-ს სახელმწიფო დეპარტამენტმა ბოლოდროინდელი ძალადობა დაგმო, ახლა კი მოვუწოდებთ აშშ-ს, რომ პასუხისმგებელ პირებს პასუხი აგებინოს”. – წერია განცხადებაში.
ხელმომწერები თავიანთ განცხადებაში აშშ-ს მოუწოდებენ, რომ არ აღიარონ ახლანდელი ერთპარტიული პარლამენტისა და მის მიერ დაკომპლექტებული მთავრობის ლეგიტიმურობა; მხარი დაუჭირონ პრეზიდენტ ზურაბიშვილის ძალისხმევას; დააწესონ სანქციები ივანიშვილზე, კობახიძესა და სხვა პასუხისმგებელ პირებზე; მოუწოდონ საქართველოს შეიარაღებულ ძალებსა და უსაფრთხოების სამსახურებს არაკონსტიტუციური ბრძანებების მიმართ დაუმორჩილებლობისკენ.
“ეს ნიშნავს, რომ აშშ-მ:
ლეგიტიმურობასთან დაკავშირებით გაჩენილი კითხვების გამო 26 ოქტომბრის საპარლამენტო არჩევნების შედეგების აღიარებაზე უარი უნდა თქვას და, ამგვარადვე, უარი თქვას ახალი პარლამენტისა და ქართული ოცნების მთავრობის ხელახალ დანიშვნის აღიარებაზე.
მხარი დაუჭიროს პრეზიდენტ სალომე ზურაბიშვილის ძალისხმევას, რომელიც ახალი ცენტრალური საარჩევნო კომისიის ხელმძღვანელობით, ახალი, თავისუფალი და სამართლიანი არჩევნები ჩატარებისკენ არის მიმართული, რაც დემოკრატიული განახლების გზას შექმნის.
მოუწოდოს საქართველოს შეიარაღებულ ძალებსა და უსაფრთხოების სამსახურებს, რომ საქართველოს კონსტიტუცია დაიცვან, რაც ქართული დემოკრატიის საფუძველია, ნებისმიერი იმ ბრძანების შესრულებაზე უარის თქმით, რომელიც ამ დოკუმენტისთვის შეუსაბამოა, მაგალითად, მშვიდობიანი დემონსტრანტების რეპრესირებაზე.
დაუყოვნებლივი და საჯარო სანქციები დაუწესოს ბიძინა ივანიშვილს, პრემიერმინისტრ კობახიძეს და მთავრობასა და პარლამენტში სხვა პირებს, რომლებიც ასეთ ავტორიტარულ ქცევაში ჩართულები არიან. ეს ასევე უნდა მოიცავდეს პოლიციასა და სამხედრო პირებს, რომლებიც მშვიდობიანი დემონსტრანტების დარბევაში არიან ჩართულები და საპარლამენტო არჩევნების ჩატარებისას მაქინაციების მოწყობაში მონაწილეობდნენ”. – ვკითხულობთ განცხადებაში.
