კომენტარი: კეთილი ინებოს ეროვნულმა ბანკმა და ნათელი განცხადება გააკეთოს, ასრულებენ თუ არა საერთაშორისო სანქციების მოთხოვნებს
აშშ-ს სანქციები
პარლამენტში ოპოზიციონერმა დეპუტატმა და ეროვნული ბანკის ყოფილმა პრეზიდენტმა რომან გოცირიძემ ეროვნული ბანკის გადაწყვეტილების შესახებ კომენტარი გააკეთა. მისი თქმით, “კეთილი უნდა ინებოს ეროვნულმა ბანკმა” და ნათელი განცხადება გააკეთოს, ასრულებენ თუ არა საერთაშორისო სანქციების მოთხოვნებს.
გოცირიძის თქმით, საქართველოს მიერ სანქციების აღუსრულებლობამ შეიძლება ქართული ბიზნესი უდიდესი რისკის ქვეშ დააყენოს, ვინაიდან ამერიკული და ევროპული ბანკები „მაგნიტსკის სიაში“ მყოფი პირების არც ერთ გადარიცხვას არ გაატარებენ, რაც მისივე განმარტებით, წარმოუდგენელ უკუშედეგს და ქართული ფინანსური ინსტიტუტების კოლაფსს გამოიწვევს.
ეროვნული ბანკი ამერიკის სახაზინო დეპარტამენტის სანქციებთან დაკავშირებით განცხადებას ავრცელებს და წერს, რომ ნათია თურნავას ბრძანების თანახმად, “საქართველოს მოქალაქეზე სანქციათა რეჟიმი ვრცელდება იმ შემთხვევაში, თუ დაწესებული სანქციების საფუძველთან დაკავშირებით გამოტანილია საქართველოს სასამართლოს კანონიერ ძალაში შესული გამამტყუნებელი განაჩენი”.
ეროვნული ბანკი ასევე ირწმუნება, რომ ქართული საფინანსო სექტორი მოქმედებს სანქციათა რეჟიმებით გათვალისწინებული მოთხოვნების სრული დაცვით და საქართველო ამ დრომდე “არასდროს ყოფილა და არც მომავალში” იქცევა სანქციების თავის არიდების ადგილად.
ყოფილი გენერალური პროკურორის, ოთარ ფარცხალაძის დასანქცირების შემდეგ, ეროვნულმა ბანკმა სანქციათა რეჟიმების წესში ცვლილება გასული წლის 19 სექტემბერს შეიტანა.
რომან გოცირიძე: “როგორც მოგეხსენებათ, ამერიკის შეერთებულმა შტატებმა სანქციები დაუწესა საქართველოს მთავრობის მაღალჩინოსნებს – შინაგან საქმეთა სამინისტროს ორ წარმომადგენელს, ასევე, რუსეთის აგენტურის ე წ. ალტ ინფოს დამფუძნებლებს.
ეს არის უპრეცედენტო ხასიათის სანქცია. ის განსხვავდება თუნდაც იმ მძიმე სანქციისაგან, რომელიც გამოყენებულ იქნა ყოფილი გენერალური პროკურორის, ოთარ ფარცხალაძის მიმართ, ვინაიდან ეს არის აშშ-ს ხაზინის ანუ ფინანსთა სამინისტროს სანქცია.
ეს ოთხი ადამიანი კი შეყვანილია „მაგნიტსკის“ გლობალური სიაში. ამაზე მძიმე სანქცია არ არსებობს! რაც არ უნდა მოხდეს დედამიწის ზურგზე, ეს ხალხი „მაგნიტსკის“ სიაში სამუდამოდ დარჩებიან! ისინი სამუდამოდ დარჩებიან სიაში, რომელიც არის ბოროტების განსახიერება და რომელიც ადამიანის უფლებების უხეშ დარღვევას ასახავს.
ასეთ ვითარებაში საქართველოს ხელისუფლებას უნდა მიეღო გადაწყვეტილება და დაუყოვნებლივ მიეცა მითითება საფინანსო სისტემისათვის, რადგან რაიმე ფორმით სანქციებისთვის გვერდის ავლა ან რაიმე მიზეზით მისი არ დაცვა ქვეყნის ფინანსურ კოლაფსს გამოიწვევს.
თუკი გაგრძელდა ბანკებზე ზეწოლა, ვერც ერთ ცენტს ვერ გადარიცხავს ქართული ბიზნესი უცხოეთში. ჩვენ გუშინ პრემიერ-მინისტრის განცხადება ვნახეთ, რასაც მხარი ეროვნულმა ბანკმა აუბა.
მოვისმინეთ ეროვნული ბანკის აბსოლუტურად უაზრო განცხადება, რომ თურმე საქართველოში სანქციების აღსრულება საქართველოს მოქალაქეების მიმართ იმ შემთხვევაში მოხდება, თუკი სასამართლო გამამტყუნებელ გადაწყვეტილებას გამოიტანს. მეორეს მხრივ, ეროვნული ბანკი ამბობს, რომ საქართველოს კომერციული ბანკები საერთაშორისო სანქციების წესებს დაიცავენ.
რა უნდა გაიგოს ამ განცხადებით საქართველოს საბანკო სისტემამ?!
კეთილი ინებოს ეროვნულმა ბანკმა და ნათელი განცხადება გააკეთოს, ასრულებენ თუ არა საერთაშორისო სანქციების მოთხოვნებს.
ამ დასანქცირებულ ადამიანებს აქვთ ბიზნესი. ერთ-ერთი მათგანი 50%-იანი პროცენტი წილის მფლობელია დაცვის სამსახურში, რომელსაც “სარანგი” ჰქვია – გაუყინეს თუ არა მას ანგარიში? რატომ მაუწყებლობს “ალტ ინფო” და რატომ არ მოახდინა მომენტალური რეაგირება კომუნიკაციების ეროვნულმა კომისიამ?”
აშშ-ს სახაზინო დეპარტამენტმა ძალოვნები, ზვიად ხარაზიშვილი, იგივე ხარება და მისი მოადგილე მილერი ლაგაზაური, ასევე პრორუსული “კონსერვატიული მოძრაობის” ლიდერები, კოკა მორგოშია და ზურა მახარაძე დაასანქცირა.
ასევე, სახელმწიფო დეპარტამენტმა საქართველოს მთავრობისა და პარლამენტის 60-ზე მეტ წევრს, მათ შორის მათ ოჯახის წევრებს “დემოკრატიის ხელყოფისთვის” სავიზო შეზღუდვები დაუწესა.
აღსანიშნავია, რომ “ხარებას” მსგავსად მისი მარჯვენა ხელიც ე.წ. მაგნიტსკის სიაში დაამატეს. ორივე მაღალჩინოსნის სახელი რუსული კანონის მოწინააღმდეგეების მიმართ ჩადენილ ძალადობას უკავშირდება.
ამერიკის შეერთებული შტატების ხაზინის დეპარტამენტში აცხადებენ, რომ დაიბლოკება აღნიშნული პირების ყველა საკუთრება და აქტივები, რომელიც აშშ-ში აქვთ, ან ფლობენ მათ ისეთ ქვეყნებში, რომელიც აშშ-ის იურისდიქციის ქვეშ ექცევა.
