"არ შეიწყალო" - პრეზიდენტის სასახლესთან აქცია გაიმართა. რა უპასუხა მათ სალომე ზურაბიშვილმა

სალომე ზურაბიშვილი

საქართველოს პრეზიდენტის, სალომე ზურაბიშვილის სასახლესთან აქცია “არ შეიწყალო” გაიმართა, რომლის ორგანიზატორები ლალი მოროშკინა, ია მეტრეველი და სხვადასხვა მთავრობისადმი ლოიალურად განწყობილი პირები იყვნენ. ისინი პრეზიდენტის მხრიდან მიხეილ სააკაშვილის შესაძლო შეწყალებას აპროტესტებდნენ. მათი თქმით, არ დაუშვებენ, სააკაშვილი უცხოეთში სამკურნალოდ გადაიყვანონ.

“აქ რომ მოვარდით ვიღაცის გავრცელებულ ჭორებზე”, – პრეზიდენტის ამ სიტყვებს სასახლის ეზოში შეკრებილი ადამიანების მხრიდან ხმაური მოყვა.

“მაინტერესებს ის ადამიანები, ვინც ავრცელებენ ჩემ შესახებ თავიანთ შექმნილ ჭორებს, სად იყვნენ 2007-ში, სად იყვნენ, როდესაც მომხდარი იყო მიშას დროინდელი ტრაგედიები, სად იყვნენ როცა ვიდექი ქუჩაში. მე გეტყვით სად იყვნენ ისინი, ვინც მესიჯბოქსებს ავრცელებენ დღეს, ან იყვნენ მიშას შტაბში, ან იყვნენ კარგად მოკალათებულნი სხვადასხვა თანამდებობებზე, ან იყვნენ ქართუ ბანკში, ისინი ვინც დღეს მესიჯბოქსით ავრცელებენ, თურმე იციან მე რას გავაკეთებ, როდის გავაკეთებ თურმე იციან რატომ გავაკეთებ. ვინ შეიწყალა, მე შევიწყალე, მურუსიძე, ჩინჩალაძე, მე შევიწყალე თუ მე დავაყენე… თუ მე განვაწესე ისეთ ადგილებზე, საიდანაც ვერავინ მოხსნის. ეს არ არის შეწყალება? სად ხართ, როდის გააპროტესტეთ, სად იყავით და სად ხართ? “, – თქვა ზურაბიშვილმა და სასახლის ეზო დატოვა.

ამის შემდეგ კი პრეზიდენტმა სპეციალური ბრიფინგი ჩანიშნა, რომელზეც გაიმეორა, რომ ის ხალხი, ვინც ახლა მას უპირისპირდება “მიშას დროს თბილად იჯდა ზოგი მიშას შტაბში და ზოგი ქართუ ბანკში” და დასძინა: “რას მიკითხავენ მორალს, რას მასწავლიან, მაინტერესებს?!”

პრეზიდენტის, სალომე ზურაბიშვილის განცხადებით, მიხეილ სააკაშვილის შეწყალებაზე კითხვას პასუხი “გაეცემა, როცა გაეცემა”. ასე დაასრულა ზურაბიშვილმა საგანგებო ბრიფინგი.

“რა არის ამ ორ ძალას შორის შეთანხმებული? პირველ რიგში მიშას ჩამოყვანა. რას ერჩოდნენ ან ერთი, როცა იმას აქეზებდნენ, ჩამობრძანდით და იქნება რევოლუცია, ხალხი ჩამოვა თქვენთვის. ან მეორენი, როცა აქეზებდნენ მეორე კუთხით, ქართული ხასიათით, აბა, ვაჟკაცი თუ ხარ ჩამოდი, ხომ არ ხარ ლაჩარი, ჩამოდი. ორივეს აწყობდა მიშას ჩამოსვლა და ვხედავთ რატომ, იმიტომ, რომ ერთი წელია ჩვენ ვართ სრულიად გაჩერებული ამ მიშას ირგვლივ კამათში, დავაში, ბრძოლაში, სხვა თემა არ არსებობს, სხვა თემის აწევა შეუძლებელია”, – განაცხადა მან.

როგორც ზურაბიშვილმა განმარტა, მის კარებთან “რუსული სოფელია”

“აგერ რუსული სოფელი არის ჩემს კარებთან და ნახეთ, რას ნიშნავს, არ მგონია, არც ერთ ქვეყანაში, სხვაგან, არ იქნებოდა პრეზიდენტის სასახლის წინ, მითუმეტეს ამ დაძაბულ პერიოდში ასეთი სოფელი გამართული, მაგრამ სხვადასხვა აზრებია და გემოვნება. მემუქრებიან რაღაცა კარიერით, თურმე კარიერას დავემშვიდობები, თურმე სხვა კარიერა მინდა, არ ვიცი, ავიწყდებათ ჩემი ასაკი, ალბათ, რამდენი წლის ვარ. მე ვინც მიცნობს იცის, რომ მე მაინტერესებს, მხოლოდ ეს ქვეყანა და მხოლოდ და მხოლოდ ამ ქვეყნის ევროპული მომავალი.” 

● კახა კალაძე: თუ პრეზიდენტი სააკაშვილს შეიწყალებს, იქნება ძალიან მძიმე მისთვის
● სააკაშვილის საქმეები. რისთვის ზის ციხეში ყოფილი პრეზიდენტი
● სენატორი ჯინ შაჰინი: საქართველოში უკუსვლაა – შესაძლოა გადავხედოთ სტრატეგიას დახმარებასთან დაკავშირებით

საქართველოს პრეზიდენტს მიხეილ სააკაშვილის შეწყალების მოთხოვნით ქალების ჯგუფმა პეტიციით მიმართა, რომელსაც უკვე 2 ათასზე მეტი ხელმომწერი ჰყავს.

#SaveMisha – ამ ლოზუნგით უკრაინის პრეზიდენტის მრჩეველი ოლექსი არესტოვიჩი და ყოფილი ადვოკატი და წამყვანი მარკ ფეიგინი საზოგადოებას მოუწოდებენ, 4 იანვარს, მსოფლიოს სხვადასხვა ქვეყანაში, საქართველოს საელჩოებთან, მიხეილ სააკაშვილის მხარდამჭერი აქციები გამართონ.

ამავე ეთერში ოლექსეი არესტოვიჩმა აღნიშნა, რომ “მიხეილ სააკაშვილს საჩვენებლად ანადგურებენ ციხეში” და მოუწოდა მაყურებლებს, გლობალურ აქციაში მიიღონ მონაწილეობა, რადგან “არ შეიძლება დავუშვათ, რომ თანამედროვე მსოფლიოში ადამიანს ასე ექცეოდნენ”. 

20 დეკემბერს, უკრაინის პრეზიდენტმა ვოლოდიმირ ზელენსკიმ საქართველოს მთავრობას მოუწოდა, მიხეილ სააკაშვილი სამკურნალოდ სამკურნალოდ საზღვარგარეთ გადაიყვანონ. მის ამ მოწოდებას მოლდოვის პრეზიდენტი, მაია სანდუც შეუერთდა. 

ამის საპასუხოდ, “ქართული ოცნების” თავმჯდომარემ, ირაკლი კობახიძემ აღნიშნა, რომ სააკაშვილზე ზელენსკის განცხადება მნიშვნელოვანი ვერ იქნება, ხოლო სანდუმ “თავის მე-6 პრეზიდენტს უნდა მიხედოს, რომელიც დღემდე პატიმრობაშია”.

რამდენიმე დღის წინ მიხეილ სააკაშვილმა უკრაინელ ჟურნალისტს, დმიტრი გორდონს წერილი გაუგზავნა, სადაც წერს, რომ ამერიკელი ტოქსიკოლოგების დასკვნის თანახმად, ის ციხეში მოწამლეს და მიზანი მისი სიკვდილი იყო, თუმცა გადარჩა, “ახლა კი სათანადო მკურნალობის გარეშე ლეტალური შედეგი გარდაუვალია.” სწორედ ამ წერილის საპასუხოდ გაავრცელა დმიტრი გორდონმა ვიდეომიმართვა.

24 დეკემბერს სააკაშვილმა რუს უფლებადამცველ მარკ ფეიგინსაც მისწერა წერილი, რომელშიც ის აღნიშნავს, რომ პუტინის ბრძანებით მოკლეს. წერილი, რომელიც სააკაშვილმა რუსულად დაწერა, ფეიგინმა ტვიტერზე გამოაქვეყნა.