"ეს ფორმა აქვს ტერორს და რეპრესიებს" - რუსული კანონის წინააღმდეგ აქციებში მონაწილეებს შსს-ში იბარებენ
აქტივისტებს შსს-ში იბარებენ
პოლიტიკური პარტია “გირჩი – მეტი თავისუფლების” ლიდერი ზურაბ ჯაფარიძე, ტელეკომპანია “ფორმულას” პროდიუსერი, ჟურნალისტი ხათუნა საღინაძე, სამოქალაქო აქტივისტი ლინა ღვინიანიძე და კიდევ ათობით ადამიანი, რომლებიც აქციებში მონაწილეობდნენ, დღეს შსს-ში გამოკითხვაზე დაიბარეს.
უმეტესობა ერთსა და იმავეს ჰყვება – მათ არ ეუბნებიან კონკრეტულად რა საქმეზე იბარებენ. უწყებაშიც კი, რომელიც აქციის ერთ-ერთ მონაწილეს ჩაბარდა, არ არის მითითებული სისხლის სამართლის კოდექსის მუხლი, რომელიც გამოსაკითხ ადამიანს წარმოდგენას შეუქმნიდა, თუ რისთვის იბარებენ პოლიციაში. ეს ყველაფერი მიუთითებს იმაზე, რომ ამ დაბარებების მთავარი მიზანი ადამიანების დაშინებაა, ამბობენ პოლიტიკური დამკვირვებლები.
● რუსული კანონი საბოლოო ვერსიით, ფიზიკურ პირებსაც შეეხება
● WSJ: კონგრესმა, შესაძლოა, რუსული კანონის ინიციატორთა სანქცირებაზე კანონი მიიღოს
● “ჩვენ ძალიან მძიმე ფაზაში შევდივართ” – ანალიტიკოსები ო’ბრაიენის ვიზიტს აფასებენ
ზურაბ ჯაფარიძეს კრიმინალური პოლიციიდან დაურეკეს. ის მოუწოდებს სხვა მოქალაქეებს, მოსამართლის თანდასწრებით გამოკითხვა მოითხოვონ და გამოკითხვაზე ადვოკატის გარეშე არ მივიდნენ. თავადაც იგივეს აპირებს.
“შსს მასობრივად იბარებს ხალხს. ეს ჩვეულებრივი სახელმწიფო ტერორია, რომელსაც ერთის მხრივ ფორმიანი ადამიანები ახორციელებენ და გამოიხატება აქციის მონაწილეების გატაცებით და მათზე ფიზიკური ანგარიშწორებით. მეორეს მხრივ, არიან ზონდერჯგუფები, რომლებიც ადამიანებს უსაფრდებიან ღამით… სახელმწიფო ტერორია ზუსტად ისე, როგორც რუსეთში. აშინებენ ადამიანებს, რომ აღარ გამოვიდნენ და აღარ გააპროტესტონ,” – ეუბნება ჯაფარიძე “რადიო თავისუფლებას”
გამოკითხვაზეა დაბარებული აქციების მონაწილე ახალგაზრდა აქტივისტი, ნატალია ყიფშიძე. მან ამის შესახებ პოსტი ფეისბუკზე დაწერა.
“20 მაისს პროცესია დანიშნული: ჩემზე ადმინისტრაციული სამართალდარღვევის ოქმი არის შედგენილი 174 პრიმა მუხლის მეოთხე ნაწილით, რომელიც შეკრებისა და მანიფესტაციის ნორმების დარღვევას ითვალისწინებს. წელს 23 წლის ვხდები და ამ წლების განმავლობაში არცერთ წარმოდგენილ სცენარში სასამართლოში არ ვმჯდარვარ. არცერთ წარმოდგენილ სცენარში არ მითვალთვალებდა ადამიანი და მანქანით არ მომყვებოდა. თვეზე მეტია აქციაზე ვართ, ვიბრძვით სამშობლოსთვის. ვიბრძვით იმ გარემოს შესაქმნელად რომლისგანაც გაქცევის სურვილი არ გვექნება…”, – წერს ნატალია ყიფშიძე ფეისბუკის გვერდზე.
ფეისბუკზე დღეს ხშირი იყო პოსტები, სადაც ადამიანები წერდნენ, რომ შსს-დან დაუკავშირდნენ.
გამოკითხვაზეა ასევე დაბარებული ტელეკომპანია „ფორმულას“ ახალი ამბების პროდიუსერი ხათუნა საღინაძე. საღინაძე ფეისბუკზე წერს, რომ მას შინაგან საქმეთა სამინისტროს კრიმინალური პოლიციიდან დაუკავშირდნენ და უთხრეს “რომ მოხვალთ, დეტალებს აქ გეტყვითო”.
გამოკითხვაზე დაბარების შესახებ ფეისბუკზე დაწერა სოციალური სამართლიანობის ცენტრის ერთ-ერთმა დამფუძნებელმა, სამოქალაქო აქტივისტმა, იურისტმა ლინა ღვინიანიძემ. ღვინიანიძეს დაუსახელეს კონკრეტული მუხლები, რომელთა მიხედვითაც მიდის გამოძიება – ეს არის სისხლის სამართლის 222, 225 და 226 მუხლები.
ლინა ღვინიანიძე წერს, რომ აპირებს მისვლას შსს-ში და გამოკითხვას მხოლოდ მოსამართლის თანდასწრებით დათანხმდება.
“სწორედ ეს ფორმა აქვს რეპრესიას, ტერორს და შიშის დანერგვის სურვილს, რასაც ერთი წამითაც არ უნდა დავყვეთ. ეს ქვეყანა ნამდვილად ჩვენია – ამ ქვეყნის პატიოსანი მოქალაქეების და სხვანაირად არ იქნება. გავაგრძელოთ გამოხატვის და შეკრების უფლებით სარგებლობა ვიდრე არ გააუქმებიათ,” – წერს იგი ფეისბუკზე.
როგორც რადიო თავისუფლება წერს, გამოკითხვაზე დაბარებულმა სხვა რამდენიმე ადამიანმაც ეს სამი მუხლი დაასახელა:
- მუხლი 222 – ტელერადიომაუწყებლობის ან კავშირგაბმულობის დაწესებულების ანდა სტრატეგიული ან განსაკუთრებული მნიშვნელობის ობიექტის ხელში ჩაგდება ან ბლოკირება – ისჯება ორ წლამდე პატიმრობით, დამამძიმებელი გარემოების არსებობის შემთხვევაში – ორიდან ოთხ წლამდე პატიმრობით;
- მუხლი 225 – ჯგუფური ძალადობის ორგანიზება, ხელმძღვანელობა ან მასში მონაწილეობა – ისჯება ექვსიდან ცხრა წლამდე პატიმრობით, მასში მონაწილეობა – ოთხიდან ექვს წლამდე პატიმრობით;
- მუხლი 226 – ჯგუფური მოქმედების ორგანიზება, რომელიც არღვევს საზოგადოებრივ წესრიგს, ან მასში აქტიური მონაწილეობა – ისჯება სამ წლამდე პატიმრობით.
გამოკითხვაზე დაბარების შესახებ უწყება მიუტანეს „აგენტების კანონის“ აქციის კიდევ ერთ ერთ მონაწილეს, ლაშა დიაროვს. 17 მაისით დათარიღებულ დოკუმენტში წერია, რომ ის დაბარებულია ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს განსაკუთრებით მნიშვნელოვან საქმეთა სამმართველოს უფროსი გამომძიებლის მიერ.
