წიწაკის სპრეი, წყლის ჭავლი, ნაცემი მომიტინგეები და დეპუტატები. როგორ ჩაიარა ღამემ და რას აპირებენ პროტესტის მონაწილეები
აქციის დაშლა პარლამენტთან
UPDATE: სამართალდამცავებმა რუსთაველის გამზირზე გუშინ გამართულ აქციაზე 63 პირი დააკავეს.
მთელი ღამის განმავლობაში გრძელდებოდა თბილისში დაპირისპირება „უცხოური გავლენის გამჭვირვალობის შესახებ“ კანონის მოწინააღმდეგე დემონსტრანტებსა და პოლიციასა და სპეცრაზმს შორის.
გუშინ პარლამენტის სხდომათა დარბაზში კანონპროექტის მეორე მოსმენა მიმდინარეობდა. რეგლამენტის თანახმად, საპარლამენტო მუშაობა მხოლოდ საღამოს ცხრა საათამდეა დაშვებული, კანონპროექტის განხილვა ბოლომდე ვერ მოასწრეს, ამიტომ სხდომა ოთხშაბათისთვის გადაიდო.
მშვიდობიანი აქციის დაშლა საღამოს ათი საათის შემდეგ დაიწყო, როდესაც მომიტინგეთა რიგები უკვე საგრძნობლად შემცირდა.
სპეცრაზმმა მომიტინგეების წინააღმდეგ სპეციალური ტექნიკა გამოიყენა – წყლის ჭავლი, წიწაკის სპრეი, ცრემსადენი გაზი, ისროდნენ რეზინის ტყვიებს და ფიზიკურად უსწორდებოდნენ მომიტინგეებს. რამდენიმე მომიტინგე დაკავებულია.
აქციის მონაწილეების დაშლის პარალელურად, შინაგან საქმეთა სამინისტრომ განცხადება გაავრცელა, რომ იწყებენ კანონმდებლობით გათვალისწინებული ღონისძიების განხორციელებას:
“გამომდინარე იქიდან რომ აქცია სრულად გასცდა კანონით დადგენილი შეკრება მანიფესტაციის ფარგლებს და გახდა ძალადობრივი, საზოგადოებრივი წესრიგის აღდგენის მიზნით შინაგან საქმეთა სამინისტრო იწყებს კანონმდებლობით გათვალისწინებული ღონისძიების განხორციელებას”, — წერს შსს.
სპეცრაზმმა თავდაპირველად მოახერხა პარლამენტის მიმდებარე ტერიტორიის გათავისუფლება მომიტინგეებისგან, თუმცა ძალიან მალე, რუსთაველის განზირზე ხალხის რაოდენობა მკვეთრად გაიზარდა – დაბრუნდნენ აქციიდან უკვე წასულებიც და მომიტინგეებს შეუერთდნენ ისინიც, ვინც მანამდე ტელევიზორიდან უყურებდა მოვლენებს.
“მე აქვე ვცხოვრობ. სიმართლე გითხრათ, ცხრა აპრილის შემდეგ არ გამოვსულვარ მიტინგზე. მაგრამ როგორ უნდა დავრჩენილიყავი სახლში, როდესაც ვნახე როგორ მოექცნენ ბავშვებს. ჩემი შვილი ახლა არ არის საქართველოში და აქ მე მის ნაცლად მოვედი, რომ ვიდგე მ,ის მეგობრებთან, ამ თაობასთან,” – უთხრა JAMnews ერთ-ერთმა მომიტინგემ.
დარბევის დროს მომიტინგეები სკანდირებდნებ “საქართველო”, “მონებო”, “რუსებო”, მღეროდნენ საქართველოს ჰიმნს და ასევე მერაბ სეფაშვილის სიმღერას, რომელის ფეხბურთის ეროვნული ნაკრების არაოფიციალურ ჰიმნად იქცა.
რამდენიმე ადგილას, რუსთაველზე, მომიტინგეებმა სპეცრაზმისთვის გზის ჩახერგვა სცადეს ნაგვის ურნებით, რკინის ბარიერებით, ქუჩის სკამებით.
მთელი ღამის განმავლობაში სოციალურ ქსელებში აქტიური იყო პრეზიდენტი სალომე ზურაბიშვილი, რომელმაც რამდენიმე განცხადება გააკეთა ფეისბუკსა და X-ზე.
ზურაბიშვილმა მკაცრად დაგმო სამართალდამცავთა ქმედებები და მოუწოდა შსს შეეწყვიტა მომიტინგეთა დარბევა. მისი თქმით, “სრულიად გაუმართლებელი, არაპროვოცირებული და არაპროპორციული” ძალის გამოყენება მიმდინარეობს თბილისში, მშვიდობიანი მომიტინგეების წინააღმდეგ.
თუკი აქციის მონაწილეთა ერთი ნაწილი რუსთაველზე დაბრუნდა, მეორე ნაწილი სანაპიროზე, იუსტიციის სახლთან მივიდა და ამგვარად ქალაქში ერთის ნაცვლად უკვე ორი ცხელი კერა გაჩნდა.
კადრებში, რომლებსაც ქართული ტელევიზიები ავრცელებდნენ, ჩანს რომ სპეცრაზმელები გადაჭარბებული ძალით უსწორდებიან მშვიდობიან ადამიანებს.
მაგალითად, ამ კადრებში ჩანს, როგორ მიდის სპეცრაზმელი მომიტინგესთან, რომელიც არ ძალადობს, და როგორ ურტყამს ხელს სახეში.
აქ ჩანს, როგორ უახლოვდება აწეული ხელებით დეპუტატი ალეკო ელისაშვილი სპეცრაზმს და მას ძირს აგდებენ.
ამ კადრებში სპეცრაზმელი ნიღბით ძლიერად ურტყამს მომიტინგეებს, მათ შორის გოგონებს.
კიდევ ერთი ეპიზოდი, სადაც “რადიო თავისუფლების” ცნობით, სავარაუდოდ, იგივე სპეცრაზმელი, რომელიც ზედა ვიდეოში გოგონებზე ძალადობს, კიდევ ერთ ძალადობრივ ეპიზოდში იღებს მონაწილებას:
„მთავარი არხის“ კადრებში ჩანს, რომ პოლიციელი სახეში მუშტს ურტყამს ერთ-ერთ დემონსტრანტს.
აქციის დროს სასტიკად სცემეს მთავარი ოპოზიციური პარტიის, “ერთიანი ნაციონალური მოძრაობის” თავმჯდომარე ლევან ხაბეიშვილი, რომელიც გუშინ ინგოროყვას კლინიკაში გადაიყვანეს.
პოლიციის მიერ სპეც.საშუალების/სპრეის გამოყენებისა და ძალის გამოყენების შემდეგ არაერთი ადამიანი დაშავდა.
ამ დროისთვის დაშავებულთა ზუსტი რაოდენობა უცნობია.
დაშავებულთა შორისაა „ნაციონალური მოძრაობის“ პარლამენტარი ანი წითლიძე, რომელსაც წიწაკის სპრეი თვალებში შეასხეს. მას სასწრაფო სამედიცინო დახმარების ეკიპაჟმა გაუწია დახმარება.
გამოცემა „ტაბულას“ გავრცელებულ კადრებში ჩანს გონებადაკარგული ახალგაზრდა, რომელსაც ახალგაზრდები სასწრაფო-სამედიცინო დახმარების მანქანისკენ მიარბენინებენ.
სავარაუდოდ, წიწაკის სპრეის გამოყენების შედეგად დაშავდნენ გამოცემა „პუბლიკას“ ჟურნალისტები, ლიკა ზაკაშვილი და ბასტი მგალობლიშვილი.
ტვ პირველის ცნობით, პარლამენტთან დაშავდა „ილიაუნის“ ლექტორი ალიკა კუპრავა.
საქართველოში მცხოვრები ამერიკელი იურისტი ტედ ჯონასი თბილისში, რუსთაველის გამზირზე, „აგენტების კანონის“ საწინააღმდეგო აქციის დარბევისას დააკავეს. იგი წერს, რომ ნაცემია.
„პოლიციის მანქანაში ვარ. მაგრად მცემეს“, – დაწერა მან ფეისბუკზე პირველ მაისს 01:12 საათზე.
My friend Theodore Jonas was severely assaulted by police tonight. This is a picture of him in a police van. This is the reality of Bidzina Ivanishvili’s government pic.twitter.com/vHwGJ31Q41
— William Dunbar (@undrawbill) April 30, 2024
საქართველოს სახალხო დამცველი, ლევან იოსელიანი აცხადებს, რომ პოლიციამ „აუცილებელი და პროპორციული ჩარევის სტანდარტის“ დარღვევით დაიწყო თბილისში აქციის მონაწილეთა დაშლა. ომბუდსმენი აღნიშნავს, რომ მშვიდობიანი შეკრების თავისუფლება საქართველოს კონსტიტუციით არის დაცული.
ჯანდაცვის სამინისტროს ინფორმაციით, დემონსტრაციაზე განვითარებული მოვლენების შედეგად სამი სამართალდამცავია ჰოსპიტალიზებული.
რადიო თავისუფლებას სამინისტროს პრესცენტრში უთხრეს, რომ ამ დროისთვის [1 მაისი, 01:00 საათი] არაერთ დემონსტრანტს, მართალია, დასჭირდა ადგილზე სასწრაფო სამედიცინო დახმარება, თუმცა ჰოსპიტალიზაცია საჭირო არ გამხდარა.
მიუხედავად იმისა, რომ მიტინგი გუშინ რამდენჯერმე დაარბიეს, მომიტინგეების სრულად დაშლა სამართალდამცავებმა ვერ შეძლეს. რუსთაველის გამზირზე მთელი ღამის განმავლობაშ რჩებოდა ასობიით ადამიანი.
გამთენიის 4 საათის შემდეგ სპეცრაზმმა თავად დაიწყო რუსთაველის გამზირიდან გასვლა. მათ ჯერ უკუსვლით დაიხიეს, შემდეგ კი ჩიტაძის ქუჩისა და თავისუფლების მოედანის გავლით დატოვეს ტერიტორია.
არის კადრი, სადაც ჩანს, რომ სპეცრაზმს, რომელიც რუსთაველის გაზირს ტოვებს, აქციის მონაწილეები უთავისუფლებენ რკინის კონსტრუქციებით ჩახერგილ გზას.
ანონიმუსის განცხადება
წუხელ გვიან ღამე განცხადება გაავრცელა ჰაკერებისა და აქტივისტების საერთაშორისო მოძრაობა Anonymous-მა, რომელმაც მხარდაჭერა გამოუცხადა „აგენტების კანონის“ წინააღმდეგ საქართველოში მიმდინარე საპროტესტო აქციების მონაწილეებს და „ქართული ოცნების” ხელისუფლებას კიბერშეტევებით და მონაცემთა ბაზების გასაჯაროებით დაემუქრა.
ჰაკერებისა და აქტივისტების საერთაშორისო მოძრაობამ საქართველოს პოლიციას მიმართა, რომ აქციის მონაწილეებზე თავდასხმას მოჰყვება ინფორმაციის გასაჯაროება მთავრობის ყველა თანამდებობის პირის შესახებ. კერძოდ, Anonymous-ი აცხადებს, რომ მოიპოვებს და ინტერნეტით გაავრცელებს მონაცემთა ბაზებს და ელექტრონული ფოსტის ბაზებს.
„ეს თქვენი პირველი და უკანასკნელი გაფრთხილებაა“, – წერია Anonymous-ის მიერ სოციალურ ქსელ X-ით გავრცელებულ მიმართვაში.
ჰაკერთა საერთაშორისო ჯგუფი მიმართავს „რუსეთის მიერ მხარდაჭერილ ოცნების პარტიასაც“ – „გახსოვდეთ, საქართველო რუსეთი არ არის და არასდროს იქნება. გველოდეთ.“
?Anonymous PR/#OpGeorgia
— Anonymous TV ?? (@YourAnonTV) April 30, 2024
– To the protesters in Georgia, we have heard your plea for help. Take heart and take to your streets; you are not alone. Anonymous members stand with you and will help in your fight for democracy, freedom, and prosperity.
To the Georgia police:… pic.twitter.com/1kRqWfwV2q
მომიტინგეთა გეგმები
ოთხშაბათს, პირველ მაისს პარლამენტი გააგრძელებს მეორე მოსმენით კანონპროექტის განხილვას, პარალელურად კი, პარლამენტის შენობასთან განახლდება საპროტესტო მიტინგი.
უკვე ცნობილია, რომ ბათუმიდან და საქართველოს სხვა ქალაქებიდან ოთხშაბათს, პირველ მაისს ოპოზიციონერები, სამოქალაქო აქტივისტები და „აგენტების კანონის“ სხვა მოწინააღმდეგეები თბილისისკენ მსვლელობასა და საპროტესტო დემონსტრაციისთვის შეერთებას გეგმავენ.
„ბათუმიდან დავიძვრებით და მთელი საქართველოს გავლით, დიდი კოლონით ჩამოვალთ თბილისში, ხვალ 12 საათზე აჭარის მოსახლეობის საყურადღებოდ, ევროპის მოდებიდან გამოვემგზავრებით და გავივლით ყველა დიდ ქალაქს“, – განაცხადა ერთ-ერთმა ორგანიზატორმა ბათუმში საგანგებო ბრიფინგზე.
მთავარი არხი იუწყება, რომ ბათუმის მსგავსად, მოქალაქეები საქართველოს 12 რეგიონში შეიკრიბებიან და თბილისის აქციას შემოუერთდებიან.
ფეისბუკზე შეიქმნა სპეციალური ჯგუფი სახელწოდებით “დაიტოვე” – აქ თბილისელები სთავაზობენ “აგენტების” კანონის გასაპროტესტებლად რეგიონებიდან ჩამოსულ მოქალაქეებს თავიანთ სახლებში უფასოდ დარჩენას, საუზმეს და ა.შ. ასევე აქ ადამიანებს სთავაზობენ გზის ფულს რეგიონიდან ჩამოსასვლელად. რამდენიმე ადამიანმა დაპოსტა, რომ ჰყავს სამარშრუტო ტაქსი და მზადაა ჩამოიყვანოს აქციაზე დასწრების მსურველები უფასოდ.
აი, რამდენიმე პოსტი ჯგუფიდან:
● მზად ვართ თბილიში , დადიანზე დარჩენით და კვებით დავიტოვოთ 4-5 ადამაინი 
ასევე შევძლებ საკვები პროდუქტებით მოვამარაგო ადამიანები. მზად ვარ ყველანაირად გვერდში დაგიდგეთ
● გამარჯობა, მე და ჩემს მეგობრებს შეგვიძლია 100 კაცამდე დავაფინანსოთ ღამის გასათევი თბილისში. სად ხდება თანხის მობილიზება?
● მეგობრებო, ბათუმიდან თბილისისკენ გავდივარ 5-10 წუთში. გაგიყოლებთ ვისაც გინდათ!
● ანგარიშის ნომერი დადეთ რომ დავაფინანსო ბენზინის ჩასხმა თბილისამდე და უკან რომელიმე რეგიონიდან.
● სალამი თანამებრძოლებს! 30-ში დაბადების დღე მქონდა, თუმცა ახლა პირადი ბედნიერების და გართობის დრო ნამდვილად არ არის. ჰოდა ამ დღისთვის ნაყიდი საკვებით მინდა მაქსიმალურად დაგეხმაროთ და მითხარით სად და როგორ?
● 6 თვეა მანქანის საყიდლად ფულს ვაგროვებ მაგრამ ახლა სხვა რეალობაა რამდენსაც შევძლებ იმდენ ადამიანს დაგიფინანსებთ ღამის გასათევს და საკვებს თბილისში
● თუ ჩარიცხვა შესაძლებელია შემიძლია თანხა ჩავრიცხო შვედეთიდან.
● ემიგრანტი ვარ, იტალიაში ვცხოვრობ, მითხარით სად ჩავრიცხო თანხა.
● ქუთაისიდან თბილისში აქციაზე წასვლის მსურველები ვინც ხართ, ხვალ, ოთხშაბათს 1 მაისს 15:00 საათზე ვიკრიბებითმერიის წინ, რაოდენობის მიხედვით დაიგეგმება ტრანსპორტი და სხვა საჭირო დეტალები. ტრანსპორტის და კვების პრობლემა მოგვარებულია, ღამის გასათევიც არის, იმდენი მასპინძელია ამ ჯგუფში.
● გერმანიიდან გწერთ! თქვენთან მინდა! თანხა სად ჩავრიცხო?
