აქციაზე - "ნუ მომკლავ, გამოიძიე დანაშაული", 3 ადამიანი დააკავეს

შინაგან საქმეთა სამინისტროსთან მიმდინარე აქციაზე – “ნუ მომკლავ, გამოიძიე დანაშაული”, სადაც გიორგი შაქარაშვილის სავარაუდო მკვლელობის და თამარ ბაჩალიაშვილის გარდაცვალების საქმეზე პოლიციელთა დაგვიანებულ რეაგირებას და არასათანადო გამოძიებას აპროტესტებდნენ, 3 ადამიანი დააკავეს. 

აქციაზე, რომელიც მოძრაობა  – “შეცვალეს” და “სირცხვილიას” ორგანიზებით ჩატარდა, გაიხსენეს 19 წლის ფეხბურთელი,  გიორგი შაქარაშვილი, რომელიც 4-დღიანი ძებნის შემდეგ მდინარე არაგვში გარდაცვლილი იპოვეს და 23 წლის თამარ ბაჩალიაშვილი, რომელიც 5-დღიანი ძებნის შემდეგ, დღეს, 22 ივლისს იპოვეს.

• 5 დღის წინ დაკარგული თამარ ბაჩალიაშვილი გარდაცვლილი იპოვეს
• გიორგი შაქარაშვილის საქმე: 17 დაკავებული და არც ერთი ბრალდებული. რა არის ცნობილი ამ დროისთვის

აქციის მონაწილეთა ინფორმაციით, დაკავებულია ლაშა ცუცქირიძე, ზვიად კუპრავა და “შეცვალეს” ერთ-ერთი აქტივისტი.

შს სამინისტროსთან სამოქალაქო აქტივისტებსა და სამართალდამცველებს შორის დაპირისპირება იმ დროს მოხდა, როცა აქციის მონაწილეები გზის გადაკეტვას ცდილობდნენ. 

აქციის მონაწილეების თქმით, ისინი საავტომობილო გზაზე რამდენიმე წუთიანი პერფორმანსის დადგმას გეგმავდნენ.

აქტივისტებს შსს-ს ღობესთან სურდათ წითლად შეღებილი ხელთათმანების დატოვება, რისი საშუალებაც მათ პოლიციამ არ მისცა. გარდა ამისა, მათ ვერ შეძლეს საპროტესტო წარწერების გაკეთება ასფალტზე.

გამოძიება დაწყებულია ადმინისტრაციულ სამართალდარღვევათა კოდექსის 173-ე მუხლით, რაც პოლიციისადმი დაუმორჩილებლობას გულისხმობს.