"აქ ვარ და აქ ვიქნები, არსად მივდივარ" - სალომე ზურაბიშვილი
პრეზიდენტმა პროვოკაცია უწოდა “ქართული ოცნების” მიერ დაგეგმილ ღონისძიებებს
საქართველოს პრეზიდენტმა სალომე ზურაბიშვილმა პროვოკაცია უწოდა 14 დეკემბერს თბილისის მერის მიერ დაგეგმილ მთავარი ნაძვის ხის ანთებას იმ ფონზე, როდესაც 2 კვირაზე მეტია, იქ საპროტესტო დემონსტრაციები იმართება. პრეზიდენტმა ამის შესახებ 13 დეკემბერს ბრიფინგზე ისაუბრა და მოვლენების შესაძლო განვითარებაზე პასუხისმგებლობა კახა კალაძეს დააკისრა.
ზურაბიშვილმა აღნიშნა, რომ ყველამ კარგად იცის, რატომაც დაგეგმა კალაძემ ნაძვის ხის ანთება, თუმცა პროტესტი კვლავ გაგრძელდება და 14 დეკემბერს იქნება ძალიან დიდი პროტესტი. პრეზიდენტმა თბილისის მერს მოუწოდა ორბელიანის მოედანზე მოაწყოს ის ღონისძიება, რასაც პარლამენტთან აპირებდა.
- წყლის ჭავლისა და ცრემლსადენი გაზის ნაცვლად მშვიდობიან მომიტინგეებს “ტიტუშკები” არბევენ. პროტესტის მეათე დღე
- თითქმის ყოველ მეორე დაკავებულს ფიზიკური დაზიანების კვალი ეტყობა. ომბუდსმენის სტატისტიკა
- სისტემური და ძალადობრივი რეპრესიები ადამიანურობის წინააღმდეგ ჩადენილ დანაშაულად უნდა შეფასდეს – საია
„თუ ეს პროვოკაცია არაა, რაღა ხვალ? მოდის ბარბარობა [17 დეკემბერს], როდესაც ბევრად უფრო ბუნებრივია [ნაძვის ხის ანთება] და გადაიტანოს. მე ვთავაზობ აქ, ორბელიანის მოედანზე, – სადაც თავად „ბარაკები“ დააყენა, მოიყვანოს ბავშვები და ორბელიანების სასახლის წინ მოაწყოს ის ღონისძიება, რასაც პარლამენტის წინ აპირებდა. მაგრამ, რაც უნდა მოხდეს, პასუხისმგებლობა მთლიანად მასზე, პირადად მასზე იქნება“, – განაცხადა ზურაბიშვილმა.
თბილისის მერმა 2 დღის წინ განაცხადა, რომ დედაქალაქის მთავარი ნაძვის ხე, 14 დეკემბერს საღამოს 7 საათზე აინთება. მთავარი ნაძვის ხე პარლამენტის შენობასთან დგას, სადაც 28 ნოემბრის შემდეგ ყოველდღიურად ათასობით ადამიანი “ქართული ოცნების” მიერ მიღებულ გადაწყვეტილებას აპროტესტებს, საქართველოს ევროინტეგრაციის პროცესის 2028 წლამდე შეჩერების შესახებ. დემონსტრანტები ახალ არჩევნებს ითხოვენ.
ზურაბიშვილმა ასევე ისაუბრა ექიმების განცხადებებზე, რომ “რუსთაველზე შენობების ფასადები და ხეები გაზითაა გაჟღენთილი და სასურველი არ არის იქ ბავშვების მოყვანა”.
“ლეგიტიმაციას მოკლებული, არაკონსტიტუციური, პაროდია”
ზურაბიშვილმა პროვოკაცია და პაროდია უწოდა საქართველოს პარლამენტში “ქართული ოცნების” მიერ დაგეგმილ პროცესს. მმართველი გუნდი 14 დეკემბერს ახლადგამოყოფილ “ხალხის ძალასთან” ერთად პრეზიდენტის არჩევას გეგმავს. ზურაბიშვილის თქმით, ეს ღონისძიება ლეგიტიმაციას არის მოკლებული და არაკონსტიტუციურია.
“მეორე პროვოკაცია არის, ხვალ რაც ხდება პარლამენტში. პროვოკაცია თუ პაროდია, არ ვიცი როგორ გამოვთქვა. ალბათ, უფრო პაროდია, რადგან ეს იქნება ღონისძიება, რომელიც ლეგიტიმაციას არის მოკლებული. არაკონსტიტუციურია. ამას დიდი ანალიზი არ სჭირდება და არც გაჩერება ამ თემაზე. დღეს რაც ხდება, ყველაფერი პაროდიაა, თუნდაც, “ოცნებიდან” “ხალხის ძალა” გადის, მერე დაბრუნდება და ა.შ.. ამას პოლიტიკურ პროცესთან კავშირი არ აქვს. ეს არის სახელმწიფო პაროდია. ჩვენთვის, ყველასთვის შეურაცხმყოფელია”, – განაცხადა სალომე ზურაბიშვილმა.
“აქ ვარ და აქ ვიქნები! “
“აქ ვარ და აქ ვიქნები, არსად არ მივდივარ, იმიტომ, რომ ქვეყანას ამ მომენტში აუცილებლად სჭირდება ლეგიტიმური ინსტიტუტი”, – განაცხადა საქართველოს პრეზიდენტმა, სალომე ზურაბიშვილმა. მისი თქმით, ქვეყნის კრიზისიდან გამოსვლის ერთადერთი მშვიდობიანი გზა ახალი არჩევნებია.
“თუ ვინმეს ამ ქვეყანაში მშვიდობა უნდა, თუ ვინმეს უნდა ამ ქვეყანაში, რომ ამ კრიზისიდან რაიმე ფორმით გამარჯვებულები გამოვიდეთ, არსებობს ერთადერთ გზა, ეს არის არჩევნების გზა. სამართლიანობის და სამართლიანი არჩევნების გარეშე არ არსებობს არც მშვიდობა და არც შემდეგ რაიმე პოლიტიკური პროცესი. მე ვარ ამისთვის აქ და სხვათა შორის არსად არ მივდივარ, არავის არ დავტოვებ, სულ ამას მეკითხებიან. აქ ვარ და აქ ვიქნები იმიტომ, რომ ქვეყანას ამ მომენტში აუცილებლად სჭირდება ლეგიტიმური ინსტიტუტი, ხელისუფლების ლეგიტიმური ნაწილი, რომელიც რეალურად არჩეულია და რომელიც ასახავს ამ ქვეყნის და ამ საზოგადოების ხმას”, – განაცხადა ზურაბიშვილმა.
პრეზიდენტის თქმით, ის არის ხალხის წარმომადგენელი უცხოელებთან და ქვეყნის შიგნით და ეს არის ერთგვარი ლეგიტიმაცია. მან აღნიშნა, რომ როდესაც “ქართული ოცნება” მიხვდება, რომ სხვა გზა არ არის, თუ არა არჩევნები, ის აქ იქნება იმისთვის, რომ იფიქროს, როგორ მოვაწყოთ არჩევნები და როგორ დავუბრუნოთ ამ ქვეყანას მშვიდობა, სამართლიანობა და მომავალი.
“ვერ დააშინებთ, ვერ დააპატიმრებთ ყველას”
პრეზიდენტ სალომე ზურაბიშვილის თქმით, საზოგადოება ევროპული საქართველოს იდეამ გააერთიანა და შედგა ეროვნული თანხმობა. ყოველ დღე უფრო და უფრო მეტი ადამიანი გამოდის და გამოხატავს პროტესტს გამოსვლებით, ან პეტიციებით, ან სიტყვით, ან მარშით და ამან მოიცვა მთელი ქვეყანა.
“პროტესტმა მოიცვა ასევე საჯარო სექტორი, რაც ძალიან უჩვეულოა ჩვენი ქვეყნისთვის. აქამდე ძალიან ერიდებოდა. ამან გამოიწვია უმკაცრესი კანონცვლილება დღეს და დაჩქარებული პროცესით მიიღეს ახალი კანონი, რომელიც, პრაქტიკულად, არის საჯარო სექტორზე პოლიტიკური რეპრესიის ინსტრუმენტი.
ვერ დააშინებთ, ვერ დააპატიმრებთ ყველას, არც მუქარა, არც ყველა ეს ზომა, ხერხი, რომელიც არის გამოცდილი სხვადასხვა ტოტალიტარულ რეჟიმის მიერ, ვერ გაჭრის ამ საზოგადოებაზე ერთი მარტივი მიზეზის გამო – საქართველო დგას და იდგება, შეიკრა სამოქალაქო საზოგადოება, სამოქალაქო საზოგადოებამ ხმა ამოიღო. არსებობდა ალბათ სხვადასხვა ფორმით, მაგრამ დღეს შეიკრა, შედგა”, – თქვა ზურაბიშვილმა.
