ალეკო ელისაშვილი კენჭს საბურთალოზე იყრის

პარტია “მოქალაქეების” დამფუძნებელი, ალეკო ელისაშვილი 2020 წლის საპარლამენტო არჩევნებში კენჭს საბურთალოს მაჟორიტარულ ოლქში იყრის. 

“არ მეშინია ურთულეს ბრძოლაში შესვლა და პარტია “მოქალაქეების” სახელით მე ვიქნები საბურთალოს მაჟორიტარი დეპუტატობის კანდიდატი. ვიცი, რომ ძალიან მძიმე ბრძოლაში შევდივარ, მაგრამ ამას აქვს სწორედ ეშხი,”  – განაცხადა ელისაშვილმა.

ელისაშვილის გარდა თბილისში, საბურთალოს მაჟორიტარობისთვის იბრძვიან: “ქართული ოცნებიდან” ჯანდაცვის ყოფილი მინისტრი, დავით სერგეენკო, პარტიის – “კანონი და სამართალი” დამფუძნებელი თაკო ჩარკვიანი და გაერთიანება ”ლელოდან” ბადრი ჯაფარიძე.

• ოცნების არჩევნები” – მმართველმა პარტიამ მაჟორიტარი დეპუტატობის კანდიდატები წარადგინა

საბურთალოს მაჟორიტარულ ოლქში კანდიდატი, ჯერჯერობით, არ დაუსახელებია “ევროპულ საქართველოს” და “ნაციონალურ მოძრაობას”.

ალეკო ელისაშვილი 2014-2017 წლებში თბილისის საკრებულოში, საბურთალოს მაჟორიტარი დეპუტატი იყო. 

2014 წლის ნოემბრიდან 2015 წლის აპრილამდე იყო შეწყალების კომისიის თავმჯდომარე.

ელისაშვილი 2017 წლის ადგილობრივი თვითმმართველობის არჩევნებში თბილისის მერობისთვის იბრძოდა. მერის არჩევნებში, სადაც მას კონკურენციას თბილისის ამჟამინდელი მერი, კახა კალაძე უწევდა, მან ხმების 17.49%  მოიპოვა.