აკუნინი ქართველებს: თქვენივე ხელისუფლების ინიციატივით, პუტინიზმი ცდილობს თქვენს სახლში დამკვიდრებას
აკუნინი აგენტების კანონზე
რუსი მწერალი ბორის აკუნინი, იგივე გრიგოლ ჩხარტიშვილი საქართველოში “უცხოური აგენტების შესახებ” კანონის გარშემო შექმნილ მდგომარეობას ეხმაურება.
ჩხარტიშვილი წერს ფეისბუკზე, რომ “უცხოური აგენტების” შესახებ კანონით, საქართველოს ხელისუფლებას ქვეყანაში “პუტინიზმი” შემოჰყავს:
“რამდენიმე ქართულმა ტელევიზიამ და მედიასაშუალებამ მომმართა „უცხოური აგენტების შესახებ“ კანონპროექტზე კომენტარის თხოვნით.
ქართულ პოლიტიკურ ცხოვრებაზე, როგორც წესი, არ ვლაპარაკობ. ჯერ ერთი, მაქვს კომპლექსი, რომ “ნამდვილი ქართველი” არ ვარ – ქართული ენაც კი არ ვიცი. მეორე, მეც რუსი მწერალი ვარ და რუსეთის მოქალაქეების მხრიდან ნებისმიერი ჩარევა სხვა ადამიანების საქმეებში არსებულ ვითარებაში აღიქმება, როგორც „იმპერიალიზმის გამოვლინება“.
თუმცა, საქართველო ჩემთვის უცხო არ არის. მე საქართველოში დავიბადე, ვარ “შვილი” და “შალვოვიჩი”, იქ ბევრი ნათესავი და მეგობარი მყავს. მე შეშფოთებული ვუყურებ, თუ როგორ ეშვება დემოკრატიული ქვეყანა იმავე ფერდობიდან, საიდანაც რუსეთი უფსკრულში ჩავარდა.
ჩვენ უნდა გვეშინოდეს არა პოლიტიკური ოპოზიციის ან კრიტიკული პრესის, არამედ პუტინიზმის. გეშინოდეთ მისი შემოჭრის არა მხოლოდ გარედან, არამედ შიგნიდან. და ეს არის ზუსტად ის, რაც ახლა ხდება. თქვენივე ხელისუფლების ინიციატივით, პუტინიზმი ცდილობს თქვენს სახლში დამკვიდრებას.
თქვენ უკვე ვეღარ გამოასახლებთ ამ ინფილტრატორს თქვენი სახლიდან. ის შეჭამს საქართველოს როგორც სიმსივნური სიმსივნე. ჩვენ ეს ვიცით, გავიარეთ. ჯერ “უცხოური აგენტები”, შემდეგ “მეხუთე კოლონა”, შემდეგ “ტერორისტები და ექსტრემისტები”, შემდეგ კი საქართველოს არ ეყოლება არც ერთი მეგობარი გარდა პუტინის რუსეთისა.
კეთილი იყოს თქვენი მობრძანება ორთავიანი არწივის ფრთის ქვეშ. ქართველებო, არ დაუშვათ, რომ ეს გაგიკეთონ. იზრუნეთ თავისუფლებაზე,” – წერს ჩხარტიშვილი.
ბორის აკუნინი ერთ-ერთი ყველაზე წარმატებული და ყველაზე გაყიდვადი თანამედროვე რუსი მწერალი. აკუნინი წლებია გამოირჩევა თავისი კრიტიკული დამოკიდებულებით ვლადიმირ პუტინის რეჟიმის მიმართ. უკრაინაში ომის დაწყების შემდეგ მწერალმა მკაფიოდ ომის საწინააღმდეგო პოზიცია დაიკავა, რასაც საჯაროდ და ხმამაღლა გამოხატავდა.
მისი პოლიტიკური განცხადებების გამო, მწერალი რუსეთის სახელმწიფომ უცხო ქვეყნის აგენტად გამოაცხადა და ასევე „ტერორისტებისა და ექსტრემისტების“ სიაში შეიყვანა.
აკუნინის წინააღმდეგ ასევე აღიძრა სისხლის სამართლის საქმე „ტერორიზმის გავრცელებისა“ და რუსული არმიის წინააღმდეგ „ყალბი ინფორმაციის“ გავრცელების გამო.
გასულ წელს აკუნინთან თანამშრომლობა შეწყვიტა გამომცემლობა AST-მ რომელიც რუსეთში მის წიგნებს გამოსცემდა.
