აივ-ინფექცია საქართველოში: 2023 წელს 560 ახალი შემთხვევა გამოვლინდა
აივ-ინფექცია საქართველოში 2023 წელი
1 დეკემბერი აივ/შიდსთან ბრძოლის საერთაშორისო დღეა.
საქართველოში 2023 წელს გამოვლინდა აივ-ინფიცირების 560 ახალი შემთხვევა, რაც 57-ით ნაკლებია, ვიდრე შარშან.
სულ 2023 წლის 1 დეკემბრის მონაცემებით, ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკულ ცენტრში 1989 წლიდან მოყოლებული დღემდე რეგისტრირებულია აივ-ით ინფიცირების 10 338 შემთხვევა (7736 მამაკაცია, 2602 – ქალი. 681 აფხაზეთში მაცხოვრებელია). ინფიცირებულთა რაოდენობიდან 4985 პაციენტს შიდსი განუვითარდა, 2185 გარდაიცვალა.
პაციენტთა უმრავლესობა 29-დან 40 წლამდეა.
ინფექციური პათოლოგიისა და შიდსის ცენტრის დირექტორმა თენგიზ ცერცვაძემ საქართველოში ვირუსის გავრცელებასთან დაკავშირებული მდგომარეობა შეაფასა.
ცერცვაძის თქმით, საქართველოში დღეისთვის დაახლოებით 8000 აივ ინფიცირებული ცხოვრობს.
მათი 83 პროცენტი გამოვლენილია, ანუ იცის, რომ აქვს აივ ინფექცია და აღრიცხვაზე იმყოფება. ამ 83 პროცენტიდან მხოლოდ 86 პროცენტი დათანხმდა მკურნალობას. ვინც მკურნალობს მათ შორის 92 პროცენტს ვირუსი განულებული აქვს, ანუ პრაქტიკულად, ჯანმრთელია, – განაცხადა თენგიზ ცერცვაძემ.
თენგიზ ცერცვაძის თქმით, საქართველოს ეს მაჩვენებლები ბევრად უკეთესია, ვიდრე “ბევრ სხვა ქვეყანაში” და საქართველო შიდსთან ბრძოლის კუთხით უპირობო ლიდერია აღმოსავლეთ ევროპის, ყოფილი საბჭოთა კავშირის ქვეყნებს შორის.
მისივე თქმით, საქართველომ თავიდან აიცილა შიდსის ფართომასშტაბიანი ეპიდემია, განსხვავებით სხვა მეზობელი ქვეყნებისგან.
„2025 და 2023 წლისთვის მიზანია, რომ ყველა აივ ინფიცირებულის 95 პროცენტი გამოვავლინოთ. ყველა გამოვლენილის 95 პროცენტი უნდა დავითანხმოთ მკურნალობაზე და ყველა ნამკურნალევის 95 პროცენტში უნდა მივაღწიოთ ვირუსის განულებას”.
„შიდსი, მიუხედავად იმისა, რომ მის მართვაში სერიოზული წარმატებებია მიღწეული, რჩება ერთ-ერთ ძირითად გამოწვევად მსოფლიო მედიცინისთვის, რამეთუ ის ჯერჯერობით არ არის განკურნებადი, თუმცა ძალიან დიდი პროგრესია მიღწეული და სასიკვდილო დაავადებიდან ქრონიკულ, მართვად დაავადებად გადაიქცა. თუ შიდსით დაავადებულს სწორად მართავთ და თვითონ პაციენტიც თავის თავს უვლის, რეალურად, ის მთელი სიცოცხლე ისე იცხოვრებს, როგორც ჯანმრთელი ადამიანი. მისი სიცოცხლის ხანგრძლივობა შეზღუდული არ იქნება. მსოფლიოს წამყვან ქვეყნებში ეს მიღწეულია და საბედნიეროდ, საქართველო ამ ქვეყნებს შორისაა“, – აღნიშნა ცერცვაძემ.
