აფხაზური ოპოზიცია კრემლის ზეწოლაში საკუთარ ხელისუფლებას ადანაშაულებს
მოსკოვი ზეწოლას ახორციელებს აფხაზურ ოპოზიციაზე
აფხაზური ოპოზიციის ერთ-ერთი ლიდერი, ადგურ არძინბა 21 აპრილის ღამეს რუსეთის ტერიტორიაზე შესვლისას რამდენიმე საათით დააკავეს რუსმა მესაზღვრეებმა. დაკავების მიზეზი ოფიციალურად არ განუმარტავთ.
დაკავების ფაქტს აფხაზეთში ოპოზიციური ორგანიზაციები მწვავედ გამოეხმაურნენ. ისინი უკმაყოფილებას გამოთქვამენ აფხაზეთის მოქმედი პრეზიდენტის, ბადრა გუნბას პოზიციასთან დაკავშირებით, რომელიც ინციდენტზე კომენტარს არ აკეთებს. ოპოზიციის წარმომადგენლები აფხაზეთის ხელისუფლებას აკრიტიკებენ და საკუთარი პრობლემების მთავარ წყაროდ სწორედ მას მიიჩნევენ, და არა რუსულ მხარეს.
ბოლო რამდენიმე წლის განმავლობაში აფხაზურ ოპოზიციაზე, სამოქალაქო სექტორის წარმომადგენლებსა და ჟურნალისტებზე რუსეთის სპეცსამსახურების ზეწოლამ და სანქციებმა სისტემური ხასიათი მიიღო — აცხადებენ აფხაზეთის ოპოზიციური ძალები.
რუსეთის მოქალაქეობა ჩამოართვეს აფხაზეთის პარლამენტის წევრებს — კან კვარჩიასა და ლევან მიქაას. რუსეთის იუსტიციის სამინისტრომ უცხოური აგენტების რეესტრში შეიყვანა სამი აფხაზი ჟურნალისტი, ხოლო რამდენიმე პირს 10 წლით აუკრძალა რუსეთის ტერიტორიაზე შესვლა.
აფხაზეთის ოპოზიცია მიიჩნევს, რომ მოსკოვის სასჯელების პოლიტიკის უკან აფხაზეთის ყოფილი პრეზიდენტი, ასლან ბჟანია დგას.
აფხაზეთის ახალი პრეზიდენტი ბადრა გუნბა, რომელმაც კრემლის აქტიური მხარდაჭერით მოიპოვა გამარჯვება და ხშირად ასლან ბჟანიას მემკვიდრედ განიხილება, წინასაარჩევნო პროგრამაში ქვეყნის შიდა პოლიტიკური პოლარიზაციის დაძლევას დაჰპირდა ამომრჩეველს.
თუმცა, ოპოზიციის შეფასებით, რეალური ცვლილებები არ ჩანს.
„თუ ახალი ხელისუფლება, რომელიც სიტყვიერად საზოგადოების კონსოლიდაციაზე საუბრობს, რეალურად აგრძელებს დაშინების, დევნისა და დამცირების პრაქტიკას — ეს კიდევ უფრო ამძაფრებს ქვეყანაში არსებულ პოლიტიკურ დაძაბულობას,“ — ნათქვამია აფხაზეთის მთავარი ოპოზიციური პარტიის, „სახალხო ერთიანობის ფორუმის“ განცხადებაში.
ოპოზიცია პრეზიდენტისგან, პარლამენტისა და მთავრობისგან მოითხოვს, საჯაროდ განმარტონ ადგურ არძინბას და სხვა ცნობილი საზოგადოებრივ-პოლიტიკური ფიგურების დაკავების მიზეზები.
აფხაზური ვეტერანთა ოპოზიციური ორგანიზაცია „არუა“ მიიჩნევს, რომ მიმდინარე სამიზნე რეპრესიების წყარო თავად სოხუმის შიგნით არის და ამ მოვლენებს მხოლოდ პოლიტიკური საფუძველი აქვს.
„არუა” ბადრა გუნბას მოუწოდებს, დაუყოვნებლივ გამოეხმაუროს შექმნილ ვითარებას, უარი თქვას ზეწოლისა და დაშინების პრაქტიკაზე და უზრუნველყოს აფხაზეთის ყველა მოქალაქის უფლებებისა და თავისუფლებების დაცვა — მიუხედავად მათი პოლიტიკური შეხედულებებისა.
ოპოზიცია ასევე მიმართავს კრემლში აფხაზეთის მიმართულების კურატორს, რუსეთის პრეზიდენტის ადმინისტრაციის ხელმძღვანელის მოადგილეს, სერგეი კირიენკოს, და სთხოვს მას, პირად კონტროლზე აიყვანოს აღნიშნული ფაქტები და დაიწყოს ოფიციალური პირების მოქმედებების გამოძიება, ვინც “აფხაზ პოლიტიკოსებთან არაობიექტურ და მიკერძოებულ დამოკიდებულებას იჩენს“.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
