აფხაზეთში მკვეთრად გაიზარდა COVID-19-ით ინფიცირებულთა რიცხვი
აფხაზეთში მკვეთრად გაიზარდა COVID-19-ით ინფიცირებულთა რიცხვი
გასული კვირის განმავლობაში, აფხაზეთში, კორონავირუსით ინფიცირებულთა რაოდენობის დღიური რეკორდი დამყარდა – 235 ადამიანი. ფაქტობრივად ყველა საავადმყოფო გადავსებულია, იმ დროს, როდესაც მოსახლეობის ვაქცინაციის ტემპი უკიდურესად დაბალია, ხელისუფლება შეზღუდვებს არ ამკაცრებს, რადგან უკვე არსებულსაც კი ცუდად იცავენ.
ჯანდაცვის მინისტრის, ედუარდ ბუთბას თქმით, აფხაზეთის მასშტაბით, დღე-ღამეში საშუალოდ 25 ადამიანი იცრება. ამასთან, მან ყურადღება გაამახვილა იმ ფაქტზე, რომ ვაქცინაციის აუცილებლობის შესახებ ჩატარებული აქტიური სამუშაოს მიუხედავად, პარალელურად მიმდინარეობს ანტიპროპაგანდა.
მისი თქმით, ასეთი შემთხვევები სამედიცინო მუშაკთა შორისაც შეინიშნება, რაც მოსახლეობას აბნევს.
- მოსაზრება: როგორ ეხმარება ეგოიზმი და უპასუხისმგებლობა ვირუსს აფხაზეთში
- აფხაზეთი: „როგორ დავრჩით პანდემიასთან ერთი ერთზე“
როგორც სპეციალისტები განმარტავენ, მკვეთრი ზრდა გამოწვეულია სექტემბრის ბოლოს გამართული დიდი რაოდენობით მასობრივი ღონისძიებებით, როდესაც ქვეყანაში 1992-1993 წლების ომში გამარჯვების მორიგი წლისთავი აღინიშნებოდა.
ეს მიუხედავად იმისა, რომ არსებული შეზღუდვის ნორმების თანახმად, კაფეებისა და რესტორნების საქმიანობა მკვეთრად ლიმიტირებულია. გარდა ამისა, აკრძალულია ქორწილებისა და ქელეხების ჩატარება სპეციალურად ასეთი მასობრივი ღონისძიებებისთვის არსებულ შენობებში. ამასთან, დაკეტილია თეატრები, მუზეუმები და საგამოფენო დარბაზები.
გასულ პარასკევს გამართულ COVID-19-თან ბრძოლის საკოორდინაციო საბჭოს სხდომაზე, პრემიერ-მინისტრმა ალექსანდრ ანქვაბმა განაცხადა, რომ სადღესასწაულო დღეებში უსაფრთხოებისთვის დაწესებული შეზღუდვები ფაქტობრივად არსად არ იყო დაცული.
„ჩვენ ვთხოვდით, ვაფრთხილებდით, რომ გამარჯვების დღესთან დაკავშირებულ დღესასწაულებზე, შეეზღუდათ ღონისძიებები. ვთხოვდით, სოხუმში 27 სექტემბერს არ მიეყვანათ სკოლის მოსწავლეები ღონისძიებაზე, მაგრამ მაინც მოიყვანეს. ჩვენ ვთხოვდით, შეეზღუდათ ღონისძიებები 30 სექტემბერს, მაგრამ არ გამოვიდა. და ახლა რაღა გვიკვირს?“ – რიტორიკული კითხვა დასვა პრემიერ-მინისტრმა.
ალექსანდრ ანქვაბის თქმით, სახელმწიფო მუშაობს თავის შესაძლებლობების ფარგლებში და ამ შესაძლებლობების ზემოთაც, „მაგრამ ჩვენ არ შეგვიძლია, ყოველ მომდევნო ქორწილს მილიციის თანამშრომელი მივამაგროთ“.
ამის მიუხედავად, პრემიერ-მინისტრი იმუქრება, რომ ხელისუფლებას სასტიკი რეაგირება ექნება დადგენილი შემზღუდველი ზომების დარღვევებზე.
„ჩვენ მივხედავთ სხვადასხვა ობიექტის მფლობელებს, რომლებიც ამბობენ: „სულ არ მანაღვლებს, რომ აკრძალულია. მოდით და გადაიხადეთ ქორწილი“. ჩვენ არა მხოლოდ დავკეტავთ ამ ობიექტებს, კარებსაც ავუჭედავთ, რათა ადამიანების სიცოცხლე გადავარჩინოთ“, – თქვა ალექსანდრ ანქვაბმა.
თუმცა, მუქარას შედეგი არ გამოუღია. რესპუბლიკის ფაქტობრივად ყველა საქორწინო დარბაზი დასვენების დღეებში მუშაობდა, თითქოს არანაირი შემზღუდველი ზომები არ არსებობდეს.
აფხაზეთში კორონავირუსით ინფიცირებულების რიცხვი ორშაბათს, 18 ოქტომბერს, შეადგენს 29821 ადამიანს, 431 გარდაიცვალა.
