აფხაზეთში "კრემლის პროტოკოლის“ ნამდვილობას ადგენენ და ასლან ბჟანიას გადადგომაზე საუბრობენ
რით ემუქრება ბჟანიას “კრემლის პროტოკოლი?”
აფხაზეთში ცდილობენ გაიგონ კრემლის ადმინისტრაციის სხდომის სკანდალური პროტოკოლის ავთენტურობა, რომელიც სოციალურ ქსელებში 29 აგვისტოს გამოჩნდა. თუ დოკუმენტის ნამდვილობა დადასტურდება, ამან შეიძლება გამოიწვიოს აფხაზეთის ე.წ. პრეზიდენტის, ასლან ბჟანიას გადადგომა. აფხაზეთის პარლამენტი ბჟანიას რუსეთში სამუშაო მოგზაურობიდან დაბრუნებას ელოდება, რათა დაიბაროს და პასუხი მოსთხოვოს.
პროტოკოლის ასლის მიხედვით, 19 აგვისტოს რუსეთის პრეზიდენტის ადმინისტრაციის უფროსის მოადგილესთან, დმიტრი კოზაკთან გამართულ შეხვედრაზე ბჟანია დაჰპირდა მოსკოვს აფხაზი დეპუტატებისა და ოპოზიციონერების სიას, რომლებიც ხელს უშლიან ზოგიერთი აფხაზურ-რუსული პროექტების განხორციელებას. ასევე, დაგეგმილია ამ “მეამბოხე“ პოლიტიკოსებისთვის რუსეთის მოქალაქეობის ჩამორთმევა (მათ საზღვარგარეთ გამგზავრების შესაძლებლობა მაინც არ აქვთ, რადგან აფხაზურ პასპორტს საერთაშორისო აღიარება არ აქვს).
გარდა ამისა, თუ პროტოკოლს დავუჯერებთ, მოსკოვი ემუქრება აფხაზეთს, რომ შეუწყვეტს ფინანსურ დახმარებას და ელექტროენერგიაზე ხელმისაწვდომ ფასებს აღარ დაუწესებს.
სანამ პარლამენტი ბჟანიას დაბრუნებას ელოდება, ოპოზიციამ მას ოფიციალური მოთხოვნა გაუგზავნა პროტოკოლის ავთენტურობასთან დაკავშირებით, მაგრამ პასუხი ჯერ არ მიუღიათ.
2 სექტემბერს ოპოზიციის წარმომადგენლები შეხვდნენ აფხაზეთის საგარეო საქმეთა მინისტრს სერგეი შამბას და უშიშროების საბჭოს მდივანს, რაულ ლოლუას. მათ განაცხადეს, რომ კოზაკ-ბჟანიას შეხვედრის ოქმი დიპლომატიური არხებით არ მიუღიათ და ამიტომ, მის შინაარსზე კომენტარს ვერ გააკეთებენ.
მანამდე ოპოზიციამ თავის შეკრებაზე გადაწყვიტა სახალხო შეკრების მოწვევა სოფელ ლიხნის ისტორიულ ადგილას, სადაც აფხაზები ტრადიციულად წყვეტენ უმნიშვნელოვანეს საკითხებს – ამჯერად საკითხი პრეზიდენტ ბჟანიას ვადამდელი გადადგომა იქნება.
ოპოზიციის ერთ-ერთმა ლიდერმა დაურ არშბამ განაცხადა, რომ მას ეჭვი არ ეპარება პროტოკოლის ავთენტურობაში.
“სახელმწიფოს მეთაური არღვევს კანონებსა და კონსტიტუციას. ის არის ჩვენი ქვეყნის პირველი და უდიდესი საფრთხე. ის ძირს უთხრის ქვეყანას. ის მალე არა მხოლოდ მოსკოვში, არამედ თბილისშიც გაუგზავნის არასანდო პირთა სიებს. ჩვენ უნდა ჩამოვაყალიბოთ ორგანო, რომელიც აიძულებს მას გადადგეს“.
- სამოქალაქო საზოგადოებამ გაიმარჯვა: აფხაზეთში ბინების შესახებ კანონპროექტი პარლამენტმა უკან გაიწვია
- რატომ არის აფხაზეთისთვის რუსული ინვესტიციების შესახებ შეთანხმება კატასტროფა? | ახრა არისტავა
ოპოზიციას პრეტენზია აქვს რუსეთის მიმართაც.
ამდენად, პარლამენტის ექს-სპიკერის, ვალერი ბგანბას განცხადებით, პარტნიორებს შორის ასეთი დამოკიდებულება მიუღებელია. მან დმიტრი კოზაკის ქმედებებს შანტაჟი და აფხაზეთზე ზეწოლა უწოდა.
ბგანბა ასევე მიიჩნევს, რომ აუცილებელია აფხაზეთში რუსეთის საელჩოსგან ოფიციალური პასუხის მიღება.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
