აფხაზეთის უზენაესმა სასამართლომ გენერალური პროკურატურის წინააღმდეგ სარჩელი დასაშვებად ცნო – ოპოზიციის ლიდერი ადგურ არძინბა პროკურატურას უმოქმედობაში ადანაშაულებს. საქმე ეხება “აჩგუარას” მაღალი ძაბვის ელექტროგადამცემი ხაზის კაპიტალური რემონტის დროს თანხის შესაძლო გაფლანგვას.
“აჩგუარას” ხაზი გასულ წელს წარუმატებლად შეაკეთეს. ხაზის პირველ სტარტზევე მოხდა ავარია – ახალმა მავთულებმა ვერ გაუძლეს დატვირთვას. შედეგად, კონტრაქტორს მეორადი რემონტის ჩატარება მოუწია.
აფხაზური ოპოზიციის ლიდერი ადგურ არძინბა მიმართავს გენერალურ პროკურატურას, გადაამოწმოს, თუ როგორ მოხდა “აჩგუარის” რემონტისთვის მასალების შესყიდვა. არძინბას თქმით, მასალებზე დახარჯული 108 მილიონი რუბლიდან [41 მილიონ დოლარზე მეტი], 50 მილიონზე მეტი [დაახლოებით 19 მილიონი აშშ დოლარი] მოიპარეს.
ოპოზიციამ შესყიდვისა და რეალური ფასების შედარებითი ანალიზი გამოაქვეყნა. 2022 წლის 17 ნოემბერს აფხაზეთის პრეზიდენტმა ასლან ბჟანიამ სამართალდამცავებს 15 დღე მისცა სიტუაციის გამოსაძიებლად. თუმცა, ეს გამოძიება ჯერაც არ დასრულებულა.
საჩივარში ადგურ არძინბა მიუთითებს, რომ პროკურატურას 15 თებერვალს, 28 თებერვალს და 23 მარტს გაეგზავნა საჩივარი აღნიშნულთან დაკავშირებით, მაგრამ პასუხი ამ დრომდე არ მიუღია.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
