აშშ-ს ყოფილი რესპუბლიკელი კონგრესმენი, ადამ კიზინგერი ბათუმის პორტში საკრუიზო გემის შემოსვლასა და მოქალაქეების მიერ მოწყობილ საპროტესტო აქციას ეხმაურება. მისი თქმით, საქართველოს ხელისუფლება ავტორიტარიზმისკენ მიილტვის და ქართველები ან რუსეთს დაქვემდებარებას უნდა შეეგუონ ან ახალი მთავრობაა საჭირო.
როგორც კონგრესმენი საკუთარ ტვიტერ გვერდზე წერს, მთავრობა ხალხს იმედს უცრუებს.
“როგორც ადამიანი, რომელსაც ოდესღაც საქართველოს ხელისუფლებასთან ახლო კავშირი ჰქონდა, ვწუხვარ, რომ ისინი დღეს ავტორიტარიზმისკენ მიილტვიან და იმედს უცრუებენ ხალხს.
საქართველოს მოსახლეობამ უნდა აირჩიოს, ან შეეგუოს რუსეთის დაქვემდებარებაში ყოფნას ან საჭიროა ახალი მთავრობა”. – წერს კინზინგერი.
As someone who once had a close relationship to the Govt of Georgia, i am sad that today they seem to be sprinting to authoratarianism and failing their people.
The people of Georgia need to either 1) be ok with being a Russian state or 2) need a new government https://t.co/m4opLfodEb
— Adam Kinzinger (Slava Ukraini) ???? (@AdamKinzinger) July 31, 2023
31 ივლისის დილის საათებში ბათუმის პორტში მიმდინარე საპროტესტო აქციაზე პოლიციამ 23 ადამიანი დააკავა. შსს-ში ამტკიცებენ, რომ სამართალდამცველების არაერთი მოწოდების მიუხედავად, “აქციის მონაწილეები არ დაემორჩილნენ მათ კანონიერ მოთხოვნას”.
რუსეთიდან მომავალ საკრუიზო გემ ASTORIA GRANDE-ს ბათუმის პორტში მოქალაქეები საპროტესტო აქციით დახვდნენ. აქცია ბათუმში გვიან ღამით დაიწყო.
აქციამდე რამდენიმე საათით ადრე შინაგან საქმეთა სამინისტრომ პორტის მიმდებარე ქუჩები გადაკეტა, ნავსადგურთან კი რკინის ჯებირებით შემოსაზღვრეს ტერიტორია, სადაც საკრუიზო გემი უნდა შემოსულიყო.
ეს პირველი შემთხვევა არ არის, როდესაც საკრუიზო გემი Astoria Grandeბათუმში ჩერდება. საკრუიზო ლაინერი ბათუმის პორტში 27 ივლისს გაჩერდა. საკრუიზო ლაინერმა მოგზაურობა სოჭის პორტიდან დაიწყო და რუსი ტურისტები გადაჰყავდა, რომლებმაც მედიებთან ანტიქართული განცხადებები გააკეთეს.
საკრუიზო გემზე იმყოფებიან უკრაინის წინააღმდეგ რუსეთის ომისა და პრეზიდენტ ვლადიმირ პუტინის მხარდამჭერი არტისტებიც. ამჯერად რუს ტურისტებს ტელეარხ RU.TV-ის ვარსკვლავებთან ერთად მოგზაურობას სთავაზობდნენ.
