ადამ კიზინგერი: რუსული პროპაგანდაა, როცა მესმის, რომ აშშ საქართველოს ომში ჩათრევას ცდილობს
ადამ კიზინგერი საქართველოს ომში ჩათრევაზე
“ამერიკის ხმასთან” ინტერვიუში ამერიკელი რესპუბლიკელი კონგრესმენი ადამ კინზინგერი ამბობს, რომ რუსული პროპაგანდაა, როცა მას ესმის, რომ აშშ საქართველოს ომში ჩათრევას ცდილობს. კონგრესმენის განმარტებით, ერთი რამ, რაშიც, წესით, ეჭვი არავის უნდა ეპარებოდეს ისაა, რომ ამერიკას საერთოდ არ სურს, რომ უკრაინაში ომი იყოს:
“თუმცა, ასევე გვესმის, რომ უკრაინელები საკუთარი თავისუფლებისთვის იბრძვიან. ჩვენ მათთან ერთად ვართ, ვაწვდით იარაღს, რათა მათი ტერიტორიის არცერთი ნაგლეჯი არ დაიკარგოს, ესაა ის, რისთვისაც ვიბრძვით.”
მისივე თქმით, ამერიკის სურს, რომ საქართველომ მხარი დაუჭიროს უკრაინას, მაგრამ თავად ის იდეა, რომ “ჩვენ ვცდილობთ საქართველო ჩავითრიოთ აქტიურ ომში რუსეთთან, ეს უბრალოდ სასაცილოა.”
“ყოველთვის, როდესაც რაღაც მსგავსი მესმის, ან როდესაც ჩვენს ელჩზე ხორციელდება თავდასხმა, მაგალითად ქალბატონ დეგნანზე, რომელიც არაჩვეულებრივად მუშაობს, სულ მიჩნდება კითხვა – რა სურვილი ამოძრავებს საქართველოს მთავრობის ზოგიერთ წევრს? მართლა სურთ რომ ამერიკის შეერთებულ შტატებთან ახლოს იყვნენ, თუ უბრალოდ თავს გვაჩვენებენ რომ ასეა, რადგან იციან, რომ ქართველ ხალხს სურს ამერიკასთან ახლოს ყოფნა?” – აცხადებს კიზინგერი.
მან საქართველოში ყველა პოლიტიკურ ლიდერს მიმართა შემდეგი სიტყვებით: “ებრძოლეთ დეზინფორმაციას!”
“ჩვენ დავინახეთ, რომ რუსეთი არის ქვეყანა, რომელსაც არ აქვს სამხედრო ძალა, აღმოჩნდა, რომ არც კულტურული ძლიერება აქვთ, მეტიც, ხალხს საკუთარი მთავრობა ეზიზღება. დამიჯერეთ, არ გინდათ, რომ იგივე თქვენს ქვეყანაშიც გქონდეთ.” – აღნიშნა კონგრესმენმა.
კიზინგერმა ხაზი გაუსვა, რომ მთავრობას ახლა არჩევანი არ აქვს და ისინი სიმპათიებით უნდა იყვნენ განწყობილნი დასავლეთისა და ამერიკის მიმართ, რადგან ესაა ის, რაც ქართველ ხალხს სურს. მისივე თქმით, ქართველი ხალხის უდიდესი ნაწილი საკუთარ თავს დასავლეთად აღიქვამს და აშშ-ც საქართველოს დასავლეთად აღიქვამს:
“ასე რომ შეშფოთების საგანი ისაა, რომ არსებობს მოძრაობა, ან მცდელობა იმისა, რომ შეიქმნას დისტანცია ამერიკასა და ქართველ ხალხს შორის.“
ამერიკელმა კონგრესმენმა ისაუბრა საქართველოსთვის იარაღის მიწოდებაზეც და აღნიშნა, რომ რუსეთი რეაგირებს არა ძალაზე, არამედ ის რეაგირებს სისუსტის აღქმაზე. ანუ რუსეთი თავდასხმას დაიწყებს მაშინ, თუ იფიქრებს, რომ მოგება შეუძლია.
“ამიტომ ვფიქრობ, რომ მნიშვნელოვანია საქართველოს მივცეთ იარაღი არა იმისთვის, რომ რუსეთს თავს დაესხას, არამედ იმისთვის, რომ მათ ნათლად უთხრან: შენ უკანონოდ გაქვს ოკუპირებული ჩემი ქვეყნის 1/3 და შენ მეტის ოკუპირება აღარ შეგიძლია, ჩვენ თავს დავიცავთ.” – ამბობს კიზინგერი.
ამერიკის ელჩზე თავდასხმები მას შემდეგ გააქტიურდა, რაც მმართველი პარტია სამმა დეპუტატმა – სოზარ სუბარმა, მიხეილ ყაველაშვილმა და დიმიტრი ხუნდაძემ დატოვა. მოგვიანებით კი მათ მმართველი პარტიის კიდევ ერთი წევრი, გურამ მაჭარაშვილი შეუერთდა.
ზემოხსენებულ დეპუტატებს მიაჩნიათ, რომ ე.წ. კულისებიდან პოლიტიკური ფაქტებისა და მოვლენების შესახებ მეტი ინფორმაცია უნდა ვრცელდებოდეს და ამის “გახმოვანებისთვის მათ თავისუფალი საპარლამენტო მანდატი სჭირდებათ”, რადგან გუნდის შიგნით შესაძლოა, უხერხულობები შეექმნათ.
“ქართული ოცნებიდან” წასულმა დეპუტატებმა პირველი განცხადებაც მალევე გამოაქვეყნეს, რომელსაც ხელისუფლების ოპონენტებმა უკვე უწოდეს ანტიდასავლური შეთქმულების თეორია. ყოფილი დეპუტატების თქმით, საქართველოს კანდიდატის სტატუსს არც 6 თვის თავზე არავინ მიანიჭებს, “თუ მანამდე ომში არ ჩაერთო ან რუსეთს სანქციები არ დაუწესა.”
ამას მალევე მოჰყვა მიხეილ ყაველაშვილის ღია წერილი ამერიკის ელჩის მიმართ, რომელშიც დეპუტატი კელი დეგნანს მოუწოდებს, ამერიკის იმიჯის დასაცავად “ნაციონალური მოძრაობის” პროვოკაციებსა და ტექნიკური მთავრობის მოთხოვნებს საჯაროდ გაემიჯნოს. წერილის გამოქვეყნების შემდეგ, კელი დეგნანმა მმართველ პარტიას ჰკითხა: რა მოტივი გაქვთ?
საქმე იქამდე მივიდა, რომ ამერიკის ელჩზე მოსამართლეებმაც გაილაშქრეს. ნიკა გვარამიას საქმის მოსამართლის, ლაშა ჩხიკვაძის მტკიცებით, აშშ-ს საელჩოს თანამშრომელმა კევინ ბურკმა მას უთხრა, რომ კელი დეგნანს აინტერესებდა, რატომ მიიღო გამამტყუნებელი განაჩენი გვარამიას საქმეზე და განსაკუთრებით, რატომ გამოიყენა სასჯელად თავისუფლების აღკვეთა.
ჩხიკვაძის განცხადებას მალევე შეუერთდნენ იუსტიციის უმაღლესი საბჭოს ყოფილი წევრებიც. სამი მოსამართლე – ზაზა ხარებავა, შოთა ქადაგიძე და ლევან გზირიშვილი სოლიდარობას უცხადებენ მოსამართლე ლაშა ჩხიკვაძეს და ამბობენ, რომ აშშ-ს საელჩო კონკრეტული მოსამართლის დამოუკიდებლობაში ერევა, რაც სხვა მოსამართლეებზე “ირიბი” ზეწოლის მაგალითია.
22 ივლისს კი სამმა დეპუტატმა აშშ-ს სახელმწიფო დეპარტამენტის სპიკერს, ნედ პრაისს მიმართა. მათი თქმით, მათ არ უნდათ რომ “ქვეყნები” უხეშად ერეოდნენ “შიდა საქმეებში.” დეპუტატების ეს განცხადება მოჰყვა აშშ-ის სახელმწიფო დეპარტამენტის სპიკერის, ნედ პრაისის მიერ გამოხატულ მხარდაჭერას საქართველოში აშშ-ის ელჩის, კელი დეგნანის მიმართ.
წერილი გამოაქვეყნა თავად ბიძინა ივანიშვილმაც. მან დაადასტურა, რომ საქართველოში ამერიკის შეერთებული შტატების ელჩს, კელი დეგნანს შეხვდა. როგორც ივანიშვილი განმარტავს, შეხვედრა ელჩის თხოვნით, 21 მარტს შედგა და ის „დაახლოებით სამ საათს გაგრძელდა“. თუმცა, ივანიშვილს არ დაუკონკრეტებია, თუ რაზე ისაუბრა ამერიკის ელჩთან.
ივანიშვილთან შეხვედრა დაადასტურა კელი დეგნანმაც. ელჩმა განმარტა, რომ მათ შორის არასოდეს ყოფილა საუბარი საქართველოს ომში ჩართვაზე. როგორც დეგნანი ამბობს, მათი შეხვედრები ყოველთვის ეხებოდა აშშ-საქართველოს სტრატეგიული პარტნიორობას და აშშ-ის ძალისხმევას საქართველოს ეკონომიკის, უსაფრთხოებისა და დემოკრატიის განვითარების მხარდაჭერას.
