ადამ კიზინგერი ირაკლი კობახიძეს: ერთხელ პუტინიც ახსენე, ირაკლი, შენი ნამდვილი მტერი
ადამ კიზინგერი ირაკლი კობახიძეს
ამერიკელმა რესპუბლიკელმა კონგრესმენმა ადამ კინზინგერმა “ქართული ოცნების” თავმჯდომარეს, ირაკლი კობახიძეს მიმართა, რომელმაც უკრაინისა და მოლდოვის პრეზიდენტები, ვოლოდიმირ ზელენსკი და მაია სანდუ გააკრიტიკა.
“ერთხელ პუტინიც ახსენე, ირაკლი… იცნობ იმ ტიპს, ვინც შენს ქვეყანაში შემოიჭრა, დახოცა ხალხი და განაგრძობს ოკუპაციას? შენი ნამდვილი მტერი… ხომ?” – წერს კიზინგერი.
Now do Putin for once, Irakli…. You know the guy who invaded your country, killed people, and still occupies it? Your actual enemy…right? https://t.co/NAJts1NuHt
— Adam Kinzinger #fella (@AdamKinzinger) December 24, 2022
● ზელენსკი საქართველოს მოუწოდებს სააკაშვილი სამკურნალოდ საზღვარგარეთ გადაიყვანონ. თბილისის რეაქცია
● “დემოკრატიული ლპობის საფუძველი ბიძინა ივანიშვილია” – დებატები ევროპარლამენტში საქართველოზე
● “ქართულად საუბრობენ, თორემ სულისკვეთებით არის ФСБ-ს ტექსტები” – რა გამოხმაურება მოჰყვა ღარიბაშვილის განცხადებებს
წინაისტორია
20 დეკემბერს, უკრაინის პრეზიდენტმა ვოლოდიმირ ზელენსკიმ საქართველოს მთავრობას მოუწოდა, მიხეილ სააკაშვილი სამკურნალოდ სამკურნალოდ საზღვარგარეთ გადაიყვანონ. მის ამ მოწოდებას მოლდოვის პრეზიდენტი, მაია სანდუც შეუერთდა.
ამის საპასუხოდ, კობახიძემ აღნიშნა, რომ სააკაშვილზე ზელენსკის განცხადება მნიშვნელოვანი ვერ იქნება, ხოლო სანდუმ “თავის მე-6 პრეზიდენტს უნდა მიხედოს, რომელიც ადღემდე პატიმრობაშია”.
მისივე თქმით, ზელენსკის ხელისუფლება პირდაპირ იყო ჩართული სააკაშვილის საქართველოში არაჟნების კონტეინერით გამოგზავნის სპეცოპერაციაში. როგორც კობახიძე აღნიშნავს, აქედან გამომდინარე, ზელენსკის განცხადებას ვერ ექნება საქართველოს ხელისუფლებისთვის განსაკუთრებული ფასი.
“ქართული ოცნების” საპარლამენტო ფრაქციის თავმჯდომარემ, მამუკა მდინარაძემ კი კვლავ გაიმეორა მმართველი გუნდის ბოლოდროინდელი ნარატივი “საქართველოს ომში ჩართვაზე”. მისი თქმით, სააკაშვილის საქართველოში ჩამოსვლის მიზანი სწორედ ომის გაჩაღება იყო.
„დიახ, მათ [უკრაინელ მაღალჩინოსნებს] აქვთ ეს მოლოდინი და სპეცოპერაციის დამგეგმავებმა ასევე უზრუნველყვეს, რომ უკრაინის პრეზიდენტიც კი გამოეხმაურა ამ ამბავს და მოუწოდა საქართველოს ხელისუფლებას ის, რაც მოუწოდა. ეს ერთმანეთთან კორელაციაში, სინთეზში უნდა განვიხილოთ. ასეთი რაღაცები შემთხვევით არ ხდება. ეს იყო სპეცოპერაცია საქართველოს ომში ჩართვის მიზნით და საქართველოს არევის მიზნით, რაც ჩავარდა და დღეს, ჩვენ ყველა განცხადებას, იმის გამო, რომ სხვა გზა არ გვაქვს, ამ კონტექსტში განვიხილავთ“, – აცხადებს მდინარაძე.
