"Abzas Media“-ს საქმეში მონაწილე პირებს 12 წლამდე თავისუფლების აღკვეთა ემუქრებათ
7 ახალი ბრალდება
აზერბაიჯანში “Abzas Media“-ს საქმეზე კიდევ ოთხ პირს ახალი დამამძიმებელი ბრალდებები წაუყენეს. ახლა მათ არა 8, არამედ 12 წლამდე თავისუფლების აღკვეთა ემუქრებათ.
19 აგვისტოს დამოუკიდებელი ონლაინ გამოცემის დირექტორს ულვი ჰასანლის, მთავარ რედაქტორს სევინჯ ვაგიფგიზის, ჟურნალისტ ელნარა გასიმოვასა და გამომძიებელ ჟურნალისტს ჰაფიზ ბაბალს ბრალი შვიდ მძიმე დანაშაულში დასდეს.
- “ოქტომბრის არჩევნები უნდა იქცეს ერთგვარ ნიურნბერგის პოლიტიკურ განაჩენად „ნაციონალური მოძრაობისთვის“ – ქართული ოცნების განცხადება
- პუტინი აზერბაიჯანის დედაქალაქს ეწვევა. კომენტარი ბაქოდან
ახლა მათ ბრალი ედებათ: 192.3.2 (უკანონო ბიზნესსაქმიანობა), 193-1.3.1 და 193-1.3.2 (ორგანიზებული ჯგუფის მიერ დანაშაულებრივი შემოსავლის ლეგალიზაცია), 206.4 (ორგანიზებული ჯგუფის მიერ კონტრაბანდა), 320.1 და 320.2 (საბუთების გაყალბება და ყალბი დოკუმენტების გამოყენება), ასევე აზერბაიჯანის სისხლის სამართლის კოდექსის 213.2.1 (გადასახადებისგან თავის ჯგუფურად არიდება).
ადვოკატების თქმით, ულვი ჰასანლიმ, სევინჯ ვაგიფგიზიმ და ელნარა გასიმოვამ უარი განაცხადეს ხელი მოეწერათ საბრალდებო დასკვნაზე.
მანამდე მსგავსი ბრალდება წაუყენეს ამ საქმის სხვა ბრალდებულებს – დირექტორის მოადგილეს მაჰამედ კეკალოვს, ჟურნალისტ ნარგიზ აბსალამოვას და ეკონომისტ ფარიდ მეჰრალიზადეს.
შეგახსენებთ, რომ “Abzas Media“-ს საქმეზე დაკავებულმა ეკონომისტმა ფარიდ მეჰრალიზადემ განაცხადა, რომ ამ გამოცემასთან არანაირი კავშირი არ აქვს, ხოლო ამჟამინდელმა ხელმძღვანელობამ გაავრცელა განცხადება, სადაც ნათქვამია, რომ გამოცემა არ თანამშრომლობდა მეჰრალიზადესთან.
აქამდე ამ გახმაურებული საქმის ყველა მონაწილეს ბრალი მხოლოდ სისხლის სამართლის კოდექსის 206.3.2 მუხლით (კონტრაბანდის გადატანა წინასწარი შეთქმულებით პირთა ჯგუფის მიერ) ედებოდა და მათ 8 წლამდე თავისუფლების აღკვეთა ემუქრებოდათ. ახალი ბრალდების მიხედვით, ჟურნალისტებსა და ეკონომისტს 7-დან 12 წლამდე თავისუფლების აღკვეთა ემუქრებათ.
გამოცემის დირექტორი ულვი ჰასანლი გასული წლის 20 ნოემბერს დააკავეს. იმავე დღეს Abzas Media-ს ოფისში ჩხრეკისას 40 ათასი ევრო აღმოაჩინეს.
ამავე დროს დააკავეს დირექტორის მოადგილე მაჰამედ კეკალოვი, ხოლო 21 ნოემბერს სევინჯ ვაგიფგიზი. მოგვიანებით, გამოცემის თანამშრომლები ნარგიზ აბსალამოვა, ელნარა გასიმოვა და გამომძიებელი ჟურნალისტი ჰაფიზ ბაბალი დააკავეს.
“Abzas Media“-ს საქმეზე ასევე დააკავეს გამოცემასთან დაკავშირებული პირები – უფლებადამცველი ანარ მამადლი, პორტალ meclis.info-ს მთავარი რედაქტორი იმრან ალიევი და ეკონომისტი ფარიდ მეჰრალიზადე. მოგვიანებით, ანარ მამადლის საქმე გამოიყო, ხოლო იმრან ალიევი და ფარიდ მეჰრალიზადე კვლავ გამოძიების პროცესში არიან.
საქმეზე ყველა დაკავებული ბრალდებას უარყოფს და აცხადებენ, რომ მათ პროფესიული საქმიანობის გამო დევნიან.
მედიის დაცვის საერთაშორისო ორგანიზაციებმა აზერბაიჯანის ხელისუფლებას მოუწოდეს დაუყოვნებლივ გაათავისუფლონ დაკავებული ჟურნალისტები და შეწყვიტონ ზეწოლა დამოუკიდებელ მედიაზე.
უფლებადამცველები “Abzas Media“-ს საქმეზე დაკავებულებს პოლიტიკურ პატიმრებად აღიარებენ.
