ოკუპირებული ე.წ. სამხრეთ ოსეთის არჩევნების წინასწარი შედეგები: ე.წ. პრეზიდენტი მარატ კამბოლოვი გახდა
სამხრეთ ოსეთის არჩევნები
რუსეთის მიერ ოკუპირებულ ცხინვალის რეგიონის ე.წ. ვადამდელ საპრეზიდენტო არჩევნებში, როგორც მოსალოდნელი იყო, გამარჯვებას ე.წ. პრემიერ-მინისტრი და პრეზიდენტის მოვალეობის შემსრულებელი მარატ კამბოლოვი ზეიმობს.
ხმების დათვლის წინასწარი მონაცემებით, კამბოლოვმა დამაჯერებლად აჯობა ფორმალურ კონკურენტებს – სახელმწიფო დაცვის სამსახურის თანამშრომელ მურატ ვალიევს, ე.წ. სამხრეთ ოსეთის უნივერსიტეტის რექტორის სახელმწიფო მრჩეველ ყაზბეკ კოდოევსა და პარტია „ერთიანობის“ თავმჯდომარე ზურაბ კოკოევს.
ე.წ. ცენტრალური საარჩევნო კომისიის თავმჯდომარე ემილია გაგიევას განცხადებით, საარჩევნო ოქმების 40%-ის დამუშავების შემდეგ კამბოლოვს ხმების 88.4% ჰქონდა მიღებული. ვალიევს – 4.3%, კოდოევს – 1.1%, კოკოევს კი – 1%.
ე.წ. სამხრეთ ოსეთის გარდა, საარჩევნო უბნები გახსნილი იყო რუსეთშიც, კერძოდ ჩრდილოეთ ოსეთსა და მოსკოვში. გაგიევას თქმით, ყველა უბანზე მაღალი აქტივობა დაფიქსირდა და დარღვევების შესახებ ინფორმაცია არ მიუღიათ.
არჩევნებს 66 დამკვირვებელი აკვირდებოდა. მათ შორის იყვნენ წარმომადგენლები რუსეთიდან, აფხაზეთიდან, ნიკარაგუიდან, ბელარუსიდან, სომხეთიდან, ვენესუელიდან, გერმანიიდან, ზიმბაბვედან, კენიიდან, მექსიკიდან, სერბეთიდან, ტანზანიიდან, თურქეთიდან, უგანდიდან და სამხრეთ აფრიკის რესპუბლიკიდან.
ცესკოს წევრის, დინა ოსტაევას განცხადებით, დღის განმავლობაში „საარჩევნო კანონმდებლობის დარღვევასა და კენჭისყრის ორგანიზებასთან დაკავშირებით არცერთი საჩივარი ან მიმართვა“ არ შესულა.
კამბოლოვი არჩევნებში აშკარა ფავორიტი იყო, მაშინ როცა მისი სამი კონკურენტი ე.წ. პრეზიდენტის პოსტისთვის რეალურ ბრძოლას თითქმის არც კი ცდილობდა.
საარჩევნო უბნების 20:00 საათზე დახურვის შემდეგ ცხინვალის ცენტრში საზეიმო კონცერტი და გათამაშება გაიმართა. გათამაშდა საყოფაცხოვრებო ტექნიკა, სმარტფონები, ტელევიზორები, ველოსიპედები და მტვერსასრუტები. მთავარი პრიზი კი Niva Legend-ის ავტომობილი იყო.
პრიზების გადაცემის შემდეგ სცენაზე მარატ კამბოლოვი ავიდა. მან ე.წ. სამხრეთ ოსეთის მოსახლეობას არჩევნებში მონაწილეობისთვის მადლობა გადაუხადა და განაცხადა, რომ ამომრჩეველთა აქტივობით არჩევნებმა ყველა რეკორდი მოხსნა.
„წინასწარი მონაცემებით, ყველა რეკორდი მოვხსენით. ამდენ ადამიანს აქამდე არასდროს მიუღია მონაწილეობა. ამ არჩევნებში უფრო მეტი ამომრჩეველი მონაწილეობდა, ვიდრე ყველა წინა არჩევნებში. მხოლოდ ერთად შევძლებთ ჩვენი ცხინვალისა და ჩვენი ოსეთის გაძლიერებას“, – განაცხადა კამბოლოვმა.
მოსახლეობა არჩევნების წინ მთავარ პრობლემებად უმუშევრობას, დაბალ ხელფასებსა და მოსახლეობის გადინებას ასახელებდა
კანდიდატები წინასაარჩევნო კამპანიას თითქმის არ აწარმოებდნენ, მაშინ როცა მოსახლეობა რეგიონის მთავარ პრობლემებად უმუშევრობას, დაბალ ხელფასებსა და მოსახლეობის შემცირებას ასახელებდა.
მარატ კამბოლოვისთვის ხმის მიმცემმა ერთ-ერთმა ამომრჩეველმა განაცხადა, რომ მაღალი აქტივობა და კამბოლოვის სასარგებლოდ მიცემული ხმების დიდი რაოდენობა იმდენად პოლიტიკური ტექნოლოგების დამსახურება არ ყოფილა, რამდენადაც ადამიანებმა კამბოლოვს დაუჯერეს და ხმა „მის ავტორიტეტს, რუსეთის ავტორიტეტს“ მისცეს.
ბლოგერმა ალიკ პუხაევმა იმედი გამოთქვა, რომ ახალი პრეზიდენტი „მაინც გახდის სამხრეთ ოსეთს ყველა ოსის სახელმწიფოდ“.
ამაში ის გულისხმობს ე.წ. სამხრეთ ოსეთის პასპორტის მიღების შესაძლებლობას ყველა ეთნიკური ოსისთვის. ამჟამად მოქმედი კანონმდებლობით, მოქალაქეობის მიღება მხოლოდ ე.წ. სამხრეთ ოსეთში დაბადებულებსა და მათ შთამომავლებს შეუძლიათ.
წინა ხელისუფლებების დროს კი არაერთხელ მომხდარა სკანდალი ჩეჩნეთის, ინგუშეთისა და დაღესტნის მცხოვრებლებისთვის პასპორტების უკანონოდ გაცემის ან, უფრო მეტიც, გაყიდვის გამო.
თბილისში განიხილავენ სამ ძირითად ვერსიას, თუ რას შეიძლება ნიშნავდეს რუსი ჩინოვნიკის, მარატ კამბოლოვის, დე ფაქტო ლიდერად გამოჩენა ცხინვალში: ანექსიის ახალი ეტაპს, კრემლისა და თბილისის შეთანხმებას, ან უბრალოდ კორუფციის წინააღმდეგ ბრძოლას.
არჩევნებს რუსეთის სახელმწიფო სათათბიროს დეპუტატი ყაზბეკ ტაისაევიც აკვირდებოდა. მისი განცხადებით, არჩევნები „უმაღლეს დონეზე – გამჭვირვალედ, პატიოსნად და ღიად“ ჩატარდა.
მან ასევე განაცხადა, რომ რუსეთი სამხრეთ ოსეთს ყოვლისმომცველ მხარდაჭერას მომავალშიც გაუწევს.
მარატ კამბოლოვის შემთხვევაში ეს მხარდაჭერა განსაკუთრებით მნიშვნელოვანია: ის რუსეთის ყოფილი ჩინოვნიკია, რომელიც ე.წ. სამხრეთ ოსეთში, როგორც ჩანს, სწორედ კრემლის მხარდაჭერით გამოჩნდა და საბოლოოდ ე.წ. პრეზიდენტის პოსტამდე მივიდა.
კამბოლოვი სამხრეთ ოსეთში პირველად 2026 წლის მაისში გამოჩნდა მაშინდელი პრეზიდენტის, ალან გაგლოევის მრჩევლის რანგში. მალევე მან ე.წ. სამხრეთ ოსეთის მოქალაქეობა მიიღო და ერთ თვეში მრჩევლიდან მინისტრისა და შემდეგ პრემიერ-მინისტრის თანამდებობამდე დაწინაურდა.
მას შემდეგ, რაც ალან გაგლოევმა თანამდებობა დატოვა, კამბოლოვი ე.წ. პრეზიდენტის მოვალეობის შემსრულებელი გახდა.
ახლა კი, წინასწარი შედეგების მიხედვით, ის ე.წ. სამხრეთ ოსეთის ე.წ. ახალი პრეზიდენტია.
