გამოკითხვა: მიაჩნიათ თუ არა აფხაზეთში, რომ რუსეთის სათათბიროს არჩევნებში ხმის მიცემა მნიშვნელოვანია? VIDEO
რუსეთის სათათბიროს არჩევნები
20 სექტემბერს რუსეთში სახელმწიფო სათათბიროს არჩევნები გაიმართება. აფხაზეთის მოსახლეობის უმეტესობას ორმაგი, აფხაზური და რუსული მოქალაქეობა აქვს, ამიტომ მათ არჩევნებში მონაწილეობაც შეუძლიათ. მათთვის 35 საარჩევნო უბანია გახსნილი და აქტიური წინასაარჩევნო კამპანიაც მიმდინარეობს.
არჩევნების წინ სოხუმის მცხოვრებლებს ვკითხეთ, აპირებენ თუ არა ხმის მიცემას და ხედავენ თუ არა ამაში რეალურ აზრს.
გამოკითხვის შედეგები ერთმანეთისგან მკვეთრად განსხვავებული აღმოჩნდა. ზოგიერთს არ სურს დასვენების დღის რუსეთში არჩევნებზე დახარჯვა, რადგან ეს მათთვის უცხო ქვეყნის არჩევნებია. სხვები კი მიიჩნევენ, რომ მონაწილეობა მნიშვნელოვანია, რადგან, მათი თქმით, „თუ რუსეთში ცუდად იქნება საქმე, აქ, აფხაზეთში, ძალიან დაცხება“.
რუსტამი:
„რატომღაც ახლა რუსეთში აფხაზეთს ძალიან დიდი მნიშვნელობა ენიჭება და ძალიან სურთ, რომ ყველა მცხოვრები მივიდეს ამ არჩევნებზე. ალბათ, არც კი აქვს მნიშვნელობა, როგორ მისცემს მოსახლეობა ხმას, რადგან არჩევანი არ არსებობს. მთავარია, მასშტაბი აჩვენონ, რომ ხალხი აქტიურად და ერთსულოვნად მიდის არჩევნებზე და ამით აფასებს იმ დახმარებას, რომელსაც რუსეთი აფხაზეთს უწევს.
მე პირადად ხმის მისაცემად არ წავალ, რადგან ამაში აზრს ვერ ვხედავ. „იაბლოკოს“ არჩევნებიდან მოხსნას რომ არ მოჰყოლოდა, აუცილებლად წავიდოდი. ან კომუნისტებს დავუჭერდი მხარს. ახლა კი დასვენების დღის დახარჯვა არ მინდა“.
ელისო:
„მე აუცილებლად წავალ არჩევნებზე და ხმას მივცემ.
ვის მივცემ ხმას, არ ვიტყვი, მაგრამ, როგორც რუსეთის პასპორტის მქონე ადამიანს, მაქვს უფლება, გავლენა მოვახდინო სახელმწიფო სათათბიროს შემადგენლობაზე, რადგან იქ მიღებული გადაწყვეტილებები პირდაპირ გვეხება ჩვენ.
როგორც ქალს და მომავალ დედას, მინდა, რომ რუსული მოქალაქეობის მქონე აფხაზეთის მცხოვრებლებს ბავშვების დახმარებების მიღების შესაძლებლობა ჰქონდეთ. მიმაჩნია, რომ ეს კანონპროექტი ახალი მოწვევის სახელმწიფო სათათბიროს ერთ-ერთი პირველი განსახილველი საკითხი უნდა იყოს“.
