აფხაზეთის ე.წ. პრეზიდენტის მთავარმა მეტოქემ გამოთქვა მზადყოფნა, მის გვერდით დადგეს "სვავების“ წინააღმდეგ ბრძოლაში
აფხაზეთის ოპოზიციის ლიდერმა პრეზიდენტს მხარი დაუჭირა
აფხაზეთის ოპოზიციის ერთ-ერთმა ლიდერმა, ადგურ არძინბამ, მოულოდნელი და ერთდროულად ორაზროვანი პოლიტიკური ჟესტი გააკეთა — მან საჯაროდ გამოუცხადა მხარდაჭერა მოქმედ ე.წ. პრეზიდენტს, ბადრა გუნბას. თუმცა განცხადების ფორმულირებამ იმდენი კითხვა გააჩინა, რომ არძინბა მოგვიანებით იძულებული გახდა დამატებითი განმარტებები გაეკეთებინა.
არძინბა 2025 წლის საპრეზიდენტო არჩევნებში გუნბას მთავარი კონკურენტი იყო. სწორედ ამიტომ, მისგან პოლიტიკური მხარდაჭერის გამოცხადება ბუნებრივ ეჭვებს ბადებს: ძნელია წარმოიდგინო, რომ ახლახან დამარცხებული კანდიდატი ასე მარტივად დაუდგეს გვერდით იმ პოლიტიკოსს, რომელმაც მას არჩევნები მოუგო. მიუხედავად ამისა, არძინბამ ხაზგასმით აღნიშნა, რომ იგი გუნბას არა როგორც პოლიტიკოსს, არამედ როგორც სახელმწიფოს მეთაურს მიმართავს.
“მე მოგმართავთ არა როგორც პოლიტიკოსს ან კანდიდატს, არამედ როგორც აფხაზეთის რესპუბლიკის მოქალაქეს. ამ რანგში მზად ვარ თქვენს გვერდით დავდგე და წინააღმდეგობა გავუწიო ნებისმიერ გარე და შიდა ზეწოლას, დავიცვა აფხაზეთის პოზიცია ყველა დონეზე,“ — წერს არძინბა, რომელმაც არჩევნებში დამარცხების შემდეგ პოლიტიკური აქტივობა მნიშვნელოვნად შეამცირა.
მისი წერილი შიდა პოლიტიკური დაპირისპირების დასრულებისკენ მოწოდებით გრძელდება. არძინბას შეფასებით, ურთიერთბრალდებები და შიდა ომები დღეს “მიუღებელი ფუფუნებაა“, როცა “რესპუბლიკა” გარე და შიდა გამოწვევების წინაშე დგას.
განსაკუთრებული ყურადღება მიიქცია იმ მონაკვეთმა, სადაც არძინბა საუბრობს ძალებზე, რომელთათვისაც “პირადი ამბიციები და კერძო ინტერესები ხალხისა და სახელმწიფოს ინტერესებზე მაღლა დგას“. ხელისუფლების მისია, მისი თქმით, სწორედ ასეთი მოთამაშეებისგან ქვეყნის დაცვა უნდა იყოს. მათ არძინბა მეტაფორულად “სვავებს“ უწოდებს.
თუმცა ეს ფრაზა პროსამთავრობო მედიამ სხვაგვარად წაიკითხა. მათ ივარაუდეს, რომ “სვავებში“ არძინბა ოპოზიციის იმ ნაწილს გულისხმობდა, რომელსაც პარლამენტის წევრი კან კვარჩია ხელმძღვანელობს. ინტერპრეტაციამ პოლიტიკური დაძაბულობა კიდევ უფრო გააღრმავა და თავად არძინბას განმარტებების გაკეთება მოუწია.
მეორე მიმართვაში არძინბამ უფრო მკაფიოდ დაასახელა, ვის გულისხმობდა. მისი თქმით, არსებობს ჯგუფები, რომლებიც დაინტერესებულნი არიან აფხაზეთში შიდა პოლიტიკური კრიზისის გამწვავებით. საუბარია იმ ძალებზე, რომლებიც ლობირებდნენ არაპოპულარულ აფხაზურ-რუსულ პროექტებს — ინიციატივებს, რომლებიც ოპოზიციამ დაბლოკა და საბოლოოდ წინა პრეზიდენტის, ასლან ბჟანიას, ვადამდელი გადადგომის ერთ-ერთ ფაქტორად იქცა.
“ისინი ჩვენს ქვეყანას გარს უვლიან მარტივი ფულის საშოვნელად. დარწმუნებული ვარ, რომ დღესაც ყველაფერს აკეთებენ, რათა ჩვენი ხალხი ერთმანეთთან დააპირისპირონ და შემდეგ თავად ისარგებლონ ამ სიტუაციით,“ — აცხადებს არძინბა.
ამ გზავნილით ოპოზიციონერი ლიდერი ცდილობს ხაზი გაუსვას, რომ მისი მხარდაჭერა პირობითია და არა უპირობო. არძინბასთვის მთავარი კრიტერიუმი ბადრა გუნბას ქმედებებია და არა მისი სტატუსი.
“თუ ის მზად არის დაიცვას ჩვენი ხალხისა და თითოეული მოქალაქის ინტერესები ინდივიდუალურად, მაშინ რა ზეწოლაც არ უნდა განხორციელდეს მასზე, მე და ჩემი კოლეგები მზად ვართ მხარი დავუჭიროთ და გვერდით დავუდგეთ სტაბილურობის შესანარჩუნებლად და ნეგატიური სცენარის თავიდან ასაცილებლად,“ — წერს არძინბა.
შედეგად, მისი განცხადება უფრო პოლიტიკური სიგნალია, ვიდრე ტრადიციული მხარდაჭერა. ეს არის მცდელობა, ერთდროულად აჩვენოს ერთიანობა კრიტიკულ მომენტში და ამავე დროს ე.წ. პრეზიდენტს მკაფიოდ მიანიშნოს, რომ ოპოზიციის გვერდში დგომა დამოკიდებულია იმაზე, თუ ვის ინტერესებს დაიცავს ხელისუფლება მომავალში — სახელმწიფოსას თუ იმ “სვავებისას“, რომელთაც აფხაზეთის პოლიტიკურ სივრცეში გავლენის შენარჩუნება სურთ.
