ეუთოს თავმჯდომარე ქვეყანა "ქართულ ოცნებას“ პასუხობს: სამოქალაქო საზოგადოებას უსაფრთხო მონაწილეობის უფლება აქვს
შვეიცარაია “ქართულ ოცნებას“ პასუხობს
ეუთოს თავმჯდომარე ქვეყნის, შვეიცარიის წარმომადგენელმა ვარშავაში მიმდინარე “ადამიანური განზომილების” კონფერენციაზე განაცხადა, რომ თავმჯდომარეობა შეშფოთებულია ქართველი სამოქალაქო საზოგადოების წარმომადგენლების მონაწილეობასთან დაკავშირებით გაკეთებული კომენტარებით, რომელიც საქართველოს ხელისუფლების მხრიდან გაჟღერდა. ასევე, შეშფოთებულია უფლებადამცველებისგან მიღებული ინფორმაციით.
რა მოხდა
შვეიცარიის წარმომადგენლის განცხადებას წინ უძღოდა პარლამენტის თავმჯდომარის, შალვა პაპუაშვილის კომენტარი არასამთავრობო ორგანიზაციების წარმომადგენლების ვარშავაში მონაწილეობასთან დაკავშირებით.
7 ოქტომბერს პაპუაშვილმა განაცხადა, რომ დაინტერესებულია, რა თანხებით გაემგზავრნენ კონფერენციაზე ქართული არასამთავრობო ორგანიზაციების წარმომადგენლები და ვინ აფინანსებს მათ.
„რა თანხებით დადიან და ვინ აფინანსებს? ჩვენ გამჭვირვალობის რეესტრში მათი ორგანიზაციები და გამჭვირვალობა არ გვინახავს. თუ ამას სახელმწიფოს არ უმხელენ, ეს იმას ნიშნავს, რომ „შავი ფულით“ ფინანსდებიან. ესეც დასტურია იმისა, რომ საქართველოში „შავი ფულით“ სხვადასხვა, მათ შორის ევროპული სტრუქტურებიდან ორგანიზაციების დაფინანსება ხდება“, – განაცხადა მან.
რა თქვა შვეიცარიის წარმომადგენელმა
„შვეიცარიის თავმჯდომარეობას სურს, შეახსენოს ყველა მონაწილეს ამ შეხვედრის ქცევის კოდექსი. ისეთი პლატფორმის უზრუნველყოფა, სადაც სამოქალაქო საზოგადოების წარმომადგენლებს შეუძლიათ მონაწილეობა და ჩართულობა ეუთოს მონაწილე სახელმწიფოებთან და აღმასრულებელ სტრუქტურებთან ერთად, ეუთოს ერთ-ერთი მთავარი ფასეულობაა. მათ ამის გაკეთება ყოველგვარი უარყოფითი შედეგების გარეშე უნდა შეეძლოთ.
ეს აუცილებელია ეუთოს ინსტრუმენტების ფუნქციონირებისთვის. შეშფოთებული ვართ ქართველი სამოქალაქო საზოგადოების წარმომადგენლების მიმართ ამ კონფერენციაში მათ მონაწილეობასთან დაკავშირებით გამოთქმული კომენტარებით, აგრეთვე, ვარშავის ადამიანური განზომილების კონფერენციის მონაწილე სხვადასხვა უფლებადამცველისგან მიღებული ცნობებით. კიდევ ერთხელ ხაზგასმით აღვნიშნავთ, რამდენად მნიშვნელოვანია ეუთოს ღონისძიებებში უსაფრთხო მონაწილეობა, ყოველგვარი საპასუხო ზომების გარეშე“, – განაცხადა შვეიცარიის წარმომადგენელმა.
კონფერენცია ვარშავაში
ვარშავაში მიმდინარე კონფერენციაზე მონაწილეობენ, მათ შორის, „საფარის“ ხელმძღვანელი ბაია პატარაია და “საქართველოს ახალგაზრდა იურისტთა ასოციაციის” ხელმძღვანელი თამარ ონიანი.
5 ოქტომბერს პატარაიამ საქართველოს დელეგაციის წარმომადგენლის გამოსვლა ბანერით გააპროტესტა, რომელზეც ეწერა: „გაათავისუფლეთ ყველა ქართველი პოლიტიკური პატიმარი“.
პატარაიას თქმით, მისი პროტესტი მშვიდობიანი და უხმო იყო და ეუთოს წესების შესაბამისად, წინასწარ იყო შეთანხმებული.
„ყველგან, სადაც ვიქნები მთავრობასთან ერთად, შევახსენებ, რომ ციხე სავსეა პოლიტიკური პატიმრებით და ამას არასდროს შეეგუება ქართველი ხალხი“, – განაცხადა მან.
პატარაიას თქმით, გერმანიამ, სლოვენიამ და სხვა სახელმწიფოებმა საქართველოს მოუწოდეს, შეასრულოს მოსკოვის მექანიზმის რეკომენდაციები და შეწყვიტოს მედიის, პოლიტიკოსებისა და სამოქალაქო საზოგადოების წარმომადგენლების დევნა.
ამავე კონტექსტში მან გააკრიტიკა საქართველოს ხელისუფლების სურვილი, 2027 წელს ეუთოს თავმჯდომარე ქვეყანა გახდეს.
„ასეთია ივანიშვილის ქოცნება, ყველასგან უნდა ბენეფიტები, ფული, პატივი, ძალაუფლება და არცერთ მოვალეობას არ ასრულებს თვითონ, პირიქით, აუარესებს ყველაფერს“, – დაწერა პატარაიამ.
„ქართული ოცნება“ 2027 წელს ეუთოს თავმჯდომარეობის მიღებას ცდილობს. გამოცემა Rapporteur-ის ცნობით, ევროკავშირის ქვეყნები საქართველოს კანდიდატურას მხარს არ უჭერენ.
საქართველოს საგარეო საქმეთა მინისტრის, მაკა ბოჭორიშვილის განცხადებით, ქვეყანამ 2027 წლისთვის ეუთოს თავმჯდომარეობაზე განაცხადი უკვე წარადგინა და წევრი სახელმწიფოების მხარდაჭერის იმედი აქვს.
