"ეს სამხრეთ ოსეთის რეპუტაციას შელახავს“. რეაქცია თამარ მარაყიშვილის საქმეზე
თამარ მეარაყიშვილის დაპატიმრება
სამხრეთ ოსეთის დე ფაქტო ხელისუფლების მიერ სამოქალაქო აქტივისტ თამარ მეარაყიშვილის დაკავება “საქართველოსთვის ჯაშუშობის“ ბრალდებით სულ უფრო მეტად აღიქმება როგორც შიდა პოლიტიკური დაპირისპირების ნაწილი. ამ საქმემ იშვიათი კონსენსუსი შექმნა ხელისუფლების კრიტიკოსებსა და მის ყოფილ მოკავშირეებს შორისაც კი.
დე ფაქტო გენერალური პროკურატურის მტკიცებით, საქართველოს მოქალაქე მეარაყიშვილი “აგროვებდა და გადასცემდა ინფორმაციას რესპუბლიკაში სტრატეგიულად მნიშვნელოვანი ობიექტების შესახებ“.
უწყების განცხადებით, ეჭვი მას შემდეგ გაჩნდა, რაც აქტივისტის მიერ სოციალურ მედიაში გამოქვეყნებულ ფოტოებზე “დაზვერვის თანამშრომლებმა სტრატეგიული ობიექტი ამოიცნეს“.
მეარაყიშვილს ჯაშუშობის მუხლით 10-დან 20 წლამდე პატიმრობა ემუქრება. ის წინასწარ პატიმრობაში იმყოფება, ბრალდებებს უარყოფს და შიმშილობა აქვს გამოცხადებული.
“პრეზიდენტმა საკუთარი მოკავშირე დააპატიმრა“
საქმეს მწვავე პოლიტიკური რეზონანსი მოჰყვა.
Jamnews-სთან საუბარში სამხრეთ ოსეთის ექსპერტები აღნიშნავენ, რომ “გახმაურებულ ჯაშუშურ ისტორიას“ არანაკლებ გახმაურებული პოლიტიკური შედეგები ექნება.
“მეარაყიშვილის დაპატიმრება დაგმო იმ ოპოზიციამაც კი, რომელთანაც მას ადრე მწვავე კონფლიქტები ჰქონდა. ფაქტობრივად, პრეზიდენტმა ალან გაგლოევმა საკუთარი ყოფილი მოკავშირე დააპატიმრა“, — ამბობს ერთ-ერთი რესპონდენტი ცხინვალში. მისი თქმით, შიდა პოლიტიკური ბრძოლის დროს მეარაყიშვილი გაგლოევის კანდიდატურას უჭერდა მხარს და ღიად აკრიტიკებდა მის მთავარ მეტოქეს, მაშინდელ ე.წ. პრეზიდენტ ანატოლი ბიბილოვს.
კრიტიკული ტონი განსაკუთრებით გამოკვეთილია ცხინვალის ოპოზიციურ Telegram-არხებში, სადაც დაკავებას “სპეცოპერაციას“ უწოდებენ. ერთ-ერთი არხი წერს, რომ “გაგლოევის ბანდამ მთელი ოპერაცია მოაწყო თამარ მეარაყიშვილის დასაშინებლად“, ხოლო თავად პრეზიდენტს ძალაუფლების დაკარგვის შიში ამოძრავებს. ავტორების შეფასებით, გაგლოევი ცდილობს მოსკოვს აჩვენოს, რომ სიტუაციას სრულად აკონტროლებს.
რეპუტაციული რისკები და თბილისი
JAMnews-ის კიდევ ერთი წყარო, რომელიც ასევე ანონიმურობას ირჩევს, აღნიშნავს, რომ მეარაყიშვილი ხშირად ემოციური და სუბიექტურია, თუმცა მისი დაპატიმრება დე ფაქტო ხელისუფლებისთვის რეპუტაციულ რისკებს ქმნის. მისი თქმით, ქართული მხარე უკვე იყენებს საქმეს სამხრეთ ოსეთის ხელისუფლების წინააღმდეგ, როგორც ადამიანის უფლებების დარღვევის კიდევ ერთ მაგალითს.
“თბილისში უკვე დაიწყეს ამის ჩვენს წინააღმდეგ გამოყენება, მისი პოლიტიზირება“, — ამბობს რესპონდენტი და ამატებს, რომ დაკავების დრო განსაკუთრებულ ეჭვებს ბადებს. მისი შეფასებით, თუ პროკურატურას მართლაც ჰქონდა დამაჯერებელი მტკიცებულებები ჯაშუშობის შესახებ, აქტივისტის დაკავება ბევრად ადრე შეიძლებოდა. ის ფაქტი, რომ საქმე დაემთხვა მეარაყიშვილის მუქარას მარტო პიკეტის გამართვის შესახებ, კითხვებს აჩენს.
“პრეზიდენტის ” პასუხი
საქმეზე კომენტარი თავად ალან გაგლოევმაც გააკეთა. ჟურნალისტებთან არაფორმალურ შეხვედრაზე მან აჩვენა 1000 ევროს ოდენობის სერტიფიკატი, რომელიც, მისი თქმით, საქართველოში ნიდერლანდების საელჩომ გასცა “სამხრეთ ოსეთის მოქალაქეების ინტერესების დასაცავად“.
გაგლოევის განცხადებით, ხელისუფლებამ დიდი ხნის განმავლობაში “მაქსიმალური მოთმინება“ გამოიჩინა მეარაყიშვილის გახმაურებული ქმედებებისა და საქართველოს სტრუქტურებთან “საეჭვო კავშირების“ მიუხედავად,
თუმცა კრიტიკოსებისთვის ეს განმარტებები საკმარისი არ არის. მათთვის მეარაყიშვილის საქმე უკვე გასცდა ერთი აქტივისტის ბედს და იქცა ტესტად იმისთვის, თუ რამდენად მზად არის სამხრეთ ოსეთის დე ფაქტო ხელისუფლება განსხვავებული აზრის მიმართ – განსაკუთრებით მაშინ, როცა ეს განსხვავებული აზრი ყოფილი მოკავშირეებისგან მოდის.
