უკრაინამ რუსეთის არმიის კომუნიკაციის ტერმინალები გამოააშკარავა, მათ შორის, საქართველოში. რას ამბობს სუს-ი
უკრაინამ კომუნიკაციის ტერმინალები გამოააშკარავა
უკრაინის სამხედრო დაზვერვამ (ГУР) რუსეთის შეიარაღებული ძალების საკომუნიკაციო ტერმინალები გამოავლინა, აღნიშნული ტერმინალებიდან ერთ-ერთის მდებარეობად კი საქართველოს ტერიტორიაა მონიშნული.
საქართველოს სახელმწიფო უსაფრთხოების სამსახური ინფორმაციასთან დაკავშირებით განმარტავს, რომ უკრაინის საგარეო საქმეთა სამინისტროსგან მათ მსგავსი ინფორმაცია არ მიუღიათ. მათი თქმით, ეს ინფორმაცია არასწორია.
რას ამბობს უკრაინის სამხედრო დაზვერვა
“ეროვნული სამხედრო დაზვერვა დიდ ყურადღებას აქცევს მტრის სამეთაურო პუნქტების გადაადგილების მიმართულებების გამოვლენისა და თვალთვალის საკითხებს, ცდილობს მათგან მაქსიმალური ინფორმაციის მოპოვებას, ხოლო ხელსაყრელ პირობებში – მტრის ხელმძღვანელობის განადგურებას.
უკრაინის თავდაცვის სამინისტროს დაზვერვის მთავარი სამმართველოს (ГУР МО) ქვედანაყოფებმა, ტექნიკური დაზვერვის საშუალებების ოპერატიულ მეთოდებთან ერთად გამოყენებით, გამოავლინეს რუსეთის ფედერაციის შეიარაღებული ძალების სპეციალური დაცული საკომუნიკაციო ტერმინალების ქსელები უკრაინასთან ფრონტის ხაზის გასწვრივ და აფრიკის კონტინენტზე.
მითითებული ტერმინალებიდან მოპოვებული ინფორმაციის ხანგრძლივი გამოყენების შემდეგ, რუსი ოკუპანტების გეგმების შესახებ, მიღებულ იქნა გადაწყვეტილება მათი გეოლოკაციის გასაჯაროებისა და განადგურების შესახებ.
სანამ რუსული აგრესია უკრაინის წინააღმდეგ გაგრძელდება, მტერს არ ექნება უსაფრთხო ადგილი მსოფლიოს არცერთ კუთხეში.” – წერია ოფიციალურ განცხადებაში.
რას პასუხობს სუს-ი
“გუშინდელი დღის შემდეგ სხვადასხვა მედიაპლატფორმებიდან (ასევე კონკრეტული აქტივისტების მხრიდან) კამპანიურად ვრცელდება არასწორი ინფორმაცია, თითქოს უკრაინის დაზვერვის მასალებით საქართველოს ტერიტორიაზე არსებობს რუსეთის ფედერაციის შეიარაღებული ძალების სპეციალური უსაფრთხო კომუნიკაციის ტერმინალების ქსელები. მიუხედავად ამისა, ხსენებული მედიაპლატფორმების არცერთ წარმომადგენელს უსაფრთხოების სამსახურისთვის ამ დრომდე არ მოუმართავს.
თავის მხრივ, არანაირი მსგავსი ინფორმაცია არ მიგვიღია უკრაინის საგარეო დაზვერვის სამსახურიდანაც. ამ უკანასკნელმა, გავრცელებულ განცხადებაში, მიუთითა ასეთი ქსელების უკრაინასთან, ფრონტის ხაზზე და აფრიკის კონტინენტზე არსებობის შესახებ. ამავე დროს, განცხადებასთან ერთად გამოქვეყნებულ ფოტოზე დატანილმა ლოკაციამ დატოვა მათ მიერ გახმოვანებული ინფორმაციის არასწორი ინტერპრეტაციის სივრცე საქართველოს შესახებ.
ჩვენ პროაქტიულად ვცდილობთ გავარკვიოთ, რით იყო გამოწვეული, მათივე განცხადებისგან განსხვავებული ისეთი მასალის გავრცელება, რომელმაც კონკრეტულ ჯგუფებს საქართველოში ცრუ და ანტისახელმწიფოებრივი კამპანიის წარმოების საშუალება მისცა.” – წერს სუს.
