"ანტიდემოკრატიული ქმედებები" - თეთრი სახლის შეფასება "ოცნების" მიმართ კვლავ უცვლელია
თეთრი სახლის სპიკერის შეფასება
აშშ-მა ნათლად დააფიქსირა ის ნაბიჯები, რომელთა გადადგმაც საქართველოს მთავრობას შეუძლია, რათა აჩვენოს, რომ სერიოზულად არის განწყობილი აშშ-თან ურთიერთობის გაუმჯობესებისთვის – ასე პასუხობს ტელეკომპანია “ფორმულას” აშშ-ის სახელმწიფო დეპარტამენტი და შესაბამისად, თეთრი სახლის სპიკერის შეფასება “ქართული ოცნების” მიმართ კვლავ უცვლელია.
საუბარია “ქართული ოცნების პრემიერმინისტრის, ირაკლი კობახიძის განცხადებაზე, რომლის შესახებ “ფორმულამ” სახელმწიფო დეპარტამენტის სპიკერს მიმართა.
ირაკლი კობახიძემ 14 სექტემბერს განაცხადა: “ჩვენი პოლიტიკა და პოზიცია არის აბსოლუტურად ცხადი – ჩვენ ვამბობთ, რომ გვინდა, სუფთა ფურცლიდან და კონკრეტული გზამკვლევით განვაახლოთ სტრატეგიული პარტნიორობა აშშ-თან. თუ იქნება შემხვედრი ნაბიჯები, ამას წინ ვერაფერი დაუდგება”.
“ფორმულამ” სახელმწიფო დეპარტამენტის სპიკერს წერილობით სთხოვა, განემარტა, თუ რა გზამკვლევს ითხოვს ქართული ოცნების პრემიერი, იმ დროს, როდესაც აშშ-მა უკვე განუმარტა “ქართულ ოცნებას”, თუ რა ნაბიჯები უნდა გადადგან.
რას ამბობს სახელმწიფო დეპარტამენტის სპიკერი:
“ჩვენ განვაგრძობთ ჩვენი მიდგომის შეფასებას საქართველოს მიმართ ამერიკული ინტერესების წინსვლისთვის.
აშშ-მა ნათლად დააფიქსირა ის ნაბიჯები, რომელთა გადადგმაც საქართველოს მთავრობას შეუძლია, რათა აჩვენოს, რომ სერიოზულად არის განწყობილი აშშ-თან ურთიერთობის გაუმჯობესებისთვის.
რაც შეეხება “ქართული ოცნების” მთავრობის მიერ განხორციელებულ განგრძობით ანტიდემოკრატიულ ქმედებებს – როგორც ვიცე-პრეზიდენტმა ჯეი დი ვენსმა მიუნხენში აღნიშნა, დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე ვერ მოიპოვებთ მას, ძირითადი ელექტორატის პოზიციის უგულვებელყოფით, თუ ვინ უნდა გახდეს ჩვენი საერთო საზოგადოების ნაწილი
ამერიკის შეერთებული შტატები 33 წლის განმავლობაში იყო საქართველოსა და ქართველი ხალხის პარტნიორი და მთელი ამ ხნის განმავლობაში საქართველოს დამოუკიდებლობის, სუვერენიტეტისა და ტერიტორიული მთლიანობის მტკიცე მხარდამჭერი.” – ვკითხულობთ პასუხში.
