ოცნებამ სასამართლოში მედიის შემზღუდავი კანონი, ასევე, სიტყვისა და გამოხატვის თავისუფლების წინააღმდეგ ცვლილებები აამოქმედა
სასამართლოში მედიის შემზღუდავი კანონი
საქართველოში სასამართლოში მედიის შემზღუდავი კანონი, ასევე, სიტყვისა და გამოხატვის თავისუფლების წინააღმდეგ ცვლილებები ამოქმედდა. დოკუმენტები უკვე გამოქვეყნდა საკანონმდებლო მაცნეზე.
ცვლილებების მიხედვით, მედიას მნიშვნელოვნად შეეზღუდება სასამართლოს სხდომის დარბაზებში, დერეფნებსა და ეზოში ფოტო-ვიდეო მასალების გადაღება, ამის უფლებამოსილება კი სასამართლოს ან სასამართლოს მიერ დადგენილ უფლებამოსილ პირს მიენიჭება.
ამასთან, ქართულმა ოცნებამ სიტყვისა და გამოხატვის თავისუფლების შესახებ კანონში ცვლილებები დაამტკიცა. ერთ-ერთი დებულების მიხედვით ცილისწამებაზე სარჩელის წარდგენის 100-დღიანი ვადა გავრცელდება იმ განცხადებებზეც, რომლებიც კანონის ამოქმედებამდე გაკეთდა, თუმცა აღნიშნული ვადა ჯერ არ არის გასული.
ცვლილებების მიხედვით:
● იზღუდება სასამართლოს ეზოსა და დერეფნებში გადაღება.
● პროცესების გადაღების უფლებამოსილება ენიჭება სასამართლოს ან სასამართლოს მიერ უფლებამოსილ პირს.
● ვიდეო- აუდიოჩაწერა და ტრანსლაცია დასაშვები იქნება იუსტიციის საბჭოს გადაწყვეტილებით.
● გაუქმდა კანონში არსებული გარანტია, რითიც სასამართლოს შენობაში შესული პირისათვის პირადი ნივთების, მათ შორის, მობილური ტელეფონის, კომპიუტერის, ფოტო-, კინო-, ვიდეო- ან/და აუდიოსაშუალებების ჩამორთმევა დაუშვებელი იყო.
სიტყვისა და გამოხატვის თავისუფლების შესახებ კანონში ცვლილებებით კი:
● ზუსტდება ცილისწამების განმარტება;
● კანონის შინაარსობრივი რეგულირება გავრცელდება საჯარო სივრცეში შეურაცხყოფაზე;
● სასამართლოში ცილისწამების საქმეზე მტკიცების ტვირთი გადადის მოპასუხეზე;
● კანონს ექნება 100-დღიანი უკუძალა, რაც ნიშნავს, რომ ის რეგულაციის ამოქმედებამდე 100 დღით ადრე გაკეთებულ განცხადებებზეც გავრცელდება.
● უქმდება ჩანაწერი, რომლის მიხედვით, ყოველგვარი ეჭვი, რომელიც ვერ დადასტურდება კანონით დადგენილი წესით, უნდა გადაწყდეს სიტყვის თავისუფლების შეზღუდვის საწინააღმდეგოდ;
● უქმდება კვალიფიციური პრივილეგია ცილისწამებისთვის;
● პროფესიული საიდუმლოების/წყაროს გამხელაზე უარი, შესაძლოა, მოპასუხის საწინააღმდეგო გადაწყვეტილების საფუძველი გახდეს.
