გენერალურმა ასამბლეამ ოკუპირებული ტერიტორიებიდან დევნილთა შესახებ რეზოლუცია დაამტკიცა
საქართველოს ოკუპირებული ტერიტორიები
გაეროს გენერალურმა ასამბლეამ 3 ივნისს კიდევ ერთხელ დაუჭირა მხარი საქართველოს სუვერენიტეტსა და ტერიტორიულ მთლიანობას. ასამბლეამ მიიღო რეზოლუცია “აფხაზეთიდან, საქართველო და ცხინვალის რეგიონიდან/სამხრეთი ოსეთი საქართველო, იძულებით გადაადგილებულ პირთა და ლტოლვილთა სტატუსის შესახებ.”
რეზოლუციას მხარი 107 ქვეყანამ დაუჭირა, რაც გასული წლის მხარდამჭერთა რაოდენობაზე 4-ით მეტია. ხმის მიცემისგან 49 სახელმწიფომ, მათ შორის, ჩინეთმა, არაბთა გაერთიანებულმა საამიროებმა და ირანმა შეიკავეს თავი, ხოლო 9 ქვეყანამ ხმა რეზოლუციის წინააღმდეგ მისცა.
მოწინააღმდეგეთა შორის არიან: რუსეთი, კუბა, ჩრდილოეთ კორეა, მალი, ნიკარაგუა, სუდანი, ზიმბაბვე, ეკვატორული გვინეა და ბელარუსი. გასული წლის კენჭისყრისგან განსხვავებით სირიამ ხმის მიცემისგან თავი შეიკავა, ხოლო ნაურუმ და ნიკარაგუამ კენჭისყრაში მონაწილეობა არ მიიღეს.
რეზოლუციაში ხაზგასმულია ყველა იძულებით გადაადგილებული პირისა და ლტოლვილის — მათი ეთნიკური კუთვნილების მიუხედავად — თავიანთ სახლებში დაბრუნების უფლება. დოკუმენტში ასევე აღნიშნულია ქონებრივი უფლებების პატივისცემა, უსაფრთხო და ნებაყოფლობით დაბრუნებაზე მუშაობის საჭიროება და საერთაშორისო მოლაპარაკებების ფარგლებში მშვიდობის დამყარებისკენ მოწოდება.
რეზოლუციის მიღებას “ქართული ოცნების” საგარეო საქმეთა მინისტრი, მაკა ბოჭორიშვილი გამოეხმაურა და შედეგებს “უპრეცედენტო” უწოდა.
“დიდ მადლობას ვუხდი ყველა იმ სახელმწიფოს, ვინც გახდა ჩვენი ინიციატივის თანაავტორი და მხარი დაუჭირა რეზოლუციას.” – წერს ბოჭორიშვილი სოციალურ ქსელში.
