პარლამენტი "MEGOBARI აქტის" საპასუხოდ სპეციალურ განცხადებას ამზადებს. რა ჩაიწერება დოკუმენტში?
“MEGOBARI აქტის” საპასუხო განცხადება
“ქართული ოცნების” პარლამენტი გეგმავს ოფიციალური პოზიციის დაფიქსირებას ამერიკის წარმომადგენელთა პალატაში მიღებულ “MEGOBARI აქტთან” დაკავშირებით — სპეციალური განცხადების პროექტი უკვე წარდგენილია.
პარლამენტის ვიცე-სპიკერი ნინო წილოსანი განმარტავს, რა ჩაიწერება საქართველოს პარლამენტის იმ სპეციალურ განცხადებაში, რომლის მიღებაც აშშ-ს წარმომადგენლობათა პალატის მიერ მხარდაჭერილი “MEGOBARI აქტის“ საპასუხოდ იგეგმება.
როგორც წილოსანი ამბობს, პარლამენტის განცხადებაში იმის საწინააღმდეგო ფაქტები იქნება მოყვანილი, რაზეც “MEGOBAR აქტშია“ საუბარი, კერძოდ კი, ფაქტები იმისა, თუ რამდენად მაღალ დონეზეა საქართველოში დემოკრატია, სიტყვის თავისუფლება, სამართლის უზენაესობა, სასამართლო რეფორმის საუკეთესოდ წარმართვა და ა.შ.
მისივე თქმით, პარლამენტის განცხადებაში საუბარია “MEGOBARI აქტის“ პირობებში მოყვანილ ყველა უსამართლო კრიტიკაზე.
ინიციატორებს შორის არიან შალვა პაპუაშვილი, “ქართული ოცნების“ ფრაქცია და პარლამენტში წარმოდგენილი სხვა პოლიტიკური ჯგუფების ლიდერები.
განცხადების პროექტი განხილვისთვის გადაეცა საგარეო ურთიერთობათა კომიტეტს, ხოლო სესიაზე მისი განხილვა ხვალ იგეგმება.
დოკუმენტის პარლამენტში წარდგენა შალვა პაპუაშვილს დაევალა. მისი თქმით, საკანონმდებლო ორგანო საჭიროდ მიიჩნევს, ოფიციალურად უპასუხოს კონგრესში მიღებულ დოკუმენტს, რომელიც საქართველოს საკითხებს ეხება.
რას ამბობს ნინო წილოსანი
“საქართველოსთან მიმართებით უსამართლო ნაბიჯების საპასუხოდ, საქართველოს პარლამენტი გააკეთებს განცხადებას, რომელიც მიემართება იმ ირონიულად წოდებულ ე.წ. “MEGOBAR აქტს“, რომელიც ყველანაირად მტრული განწყობის არის ქართველი ხალხის და საქართველოს ხელისუფლების მიმართ. ამ განცხადებაში, რომელიც პარლამენტში ბიუროზე უკვე განვიხილეთ და შემდგომში კენჭს ვუყრით, საუბარი არის ე.წ. “MEGOBARI აქტის” პირობებში მოყვანილ ყველა იმ უსამართლო კრიტიკაზე, რომელიც არც ფაქტებით, არც კონკრეტული პროცესებით არ არის განმტკიცებული.
პირიქით, ჩვენს განცხადებაში, ჩვენ საწინააღმდეგო ფაქტები მოგვყავს. ფაქტები იმისა, თუ რამდენად მაღალ დონეზეა საქართველოში დემოკრატია, სიტყვის თავისუფლება, სამართლის უზენაესობა, სასამართლო რეფორმის საუკეთესოდ წარმართვა და ა.შ. ამავდროულად საუბარია იმაზე, რომ ქართველი ხალხის არჩევანია ეს ხელისუფლება და რომ ყველა რადიკალური ძალა, რომელიც ამ ქვეყანაში გადატრიალებას ემსახურება დამარცხებულია და მომავალშიც სწორედ ასეთი პასუხი გაეცემა.“ – განაცხადა წილოსანმა.
აშშ-ის კონგრესის წარმომადგენელთა პალატამ MEGOBARI Act 6 მაისს მიიღო. აქტი ამერიკის პრეზიდენტს რეჟიმის წევრების, მათი ხელშემწყობებისა და ოჯახის წევრებისთვის სანქციების დაწესებას ავალდებულებს.
დოკუმენტში წერია, რომ MEGOBARI აქტი აშშ-ის პრეზიდენტს ავალდებულებს, სანქციები დაუწესოს იმ უცხო პირებს, მათ შორის ქართველ ოფიციალურ პირებს, რომლებიც საქართველოს უსაფრთხოებასა და სტაბილურობას საფრთხეს უქმნიან. სანქციები ვიზების შეზღუდვასა და ქონების გაყინვას მოიცავს და შეეხება.
რესპუბლიკელმა კონგრესმენმა ჯო უილსონმა სოციალურ პლატფორმა X-ზე იმ ადამიანების სია გამოაქვეყნა, ვისაც შეერთებული შტატები MEGOBARI Act-ის მიღების შემდეგ პირველ რიგში დაასანქცირებს.
სიაში ხელისუფლების მაღალჩინოსნები, მოსამართლეები, ბიზნესმენები და ოცნების პროპაგანდისტები მოხვდნენ.
დოკუმენტში მითითებულია, რომ “ჩამოთვლილი პირები ეხმარებიან ბიძინა ივანიშვილს, საქართველოში ჩრდილოვან მმართველს, ქართული სახელმწიფოს ხელში ჩაგდებასა და ქვეყნის ჩინეთის, ირანისა და რუსეთის გავლენის ქვეშ მოქცევაში”.
