აზერბაიჯანში კონტრაბანდის ბრალდებით კიდევ ორი ჟურნალისტი დააკავეს
შაჰნაზ ბეილერგიზის, შამშად აგაევის დაპატიმრებები
აზერბაიჯანში კიდევ ორი ჟურნალისტი დააკავეს კონტრაბანდის ბრალდებით. სასამართლომ შახნაზ ბეილერგიზსა და შამშად აგაევს წინასწარი პატიმრობა შეუფარდა.
მეცხრე დაკავება Toplum TV-ის საქმეზე
დღეს, 6 თებერვალს, ბაქოს ხათაინის რაიონულმა სასამართლომ ჟურნალისტი შახნაზ ბეილერგიზი (გუსეინოვა) დააკავა. სასამართლომ დააკმაყოფილა აზერბაიჯანის შინაგან საქმეთა სამინისტროს მოთხოვნა და მას სამი თვითა და 15 დღით წინასწარი პატიმრობა შეუფარდა.
ბეილერგიზის ადვოკატმა, ბახტიარ ჰაჯიევმა, სასამართლოს განუცხადა, რომ ჟურნალისტს ჰყავს ორი არასრულწლოვანი შვილი, აქვს ჯანმრთელობის მძიმე მდგომარეობა (დიაბეტი და ჰიპერტენზია) და ქვეყნის დატოვება აკრძალული აქვს უკვე თითქმის ერთი წელია. შესაბამისად, პატიმრობაში მისი დატოვება უსაფუძვლოა. თუმცა, პროკურორის თქმით, საქმე ახალი ბრალდებით აღიძრა და ბეილერგიზი შესაძლოა “ორგანიზებული დანაშაულებრივი ჯგუფის სხვა წევრებზე” ზეწოლას ახდენდეს.
ადვოკატის ინფორმაციით, აღნიშნული საქმე 21 იანვარს გამოეყო Toplum TV-ის სისხლის სამართლის საქმეს.
სასამართლოში ბეილერგიზმა ბრალდებები უარყო და განაცხადა, რომ მისი დაკავება ჟურნალისტურ საქმიანობას უკავშირდება.
ისევე, როგორც Toplum TV-ის სხვა დაკავებულ ჟურნალისტებს, ბეილერგიზს ბრალად ედება არალეგალური მეწარმეობა, ფულის გათეთრება, კონტრაბანდა და საგადასახადო ვალდებულებებისგან თავის არიდება. ამ მუხლებით სასჯელი შესაძლოა 12 წლამდე პატიმრობას ითვალისწინებდეს.
ბეილერგიზი Toplum TV-ის საზოგადოებრივ-პოლიტიკური გადაცემის წამყვანი იყო. 2024 წლის მარტში პოლიციამ მედიაორგანიზაციის ოფისი გაჩხრიკა, ტექნიკა და კონტენტი ამოიღო და თანამშრომლები დაკითხა. თავდაპირველად, Toplum TV-ის შვიდი თანამშრომელი დააკავეს, ორ მათგანს კი პოლიციის ზედამხედველობა დაუწესა. 2025 წლის 17 იანვარს ერთ-ერთი მათგანი, ფარიდ ისმაილოვიც დააკავეს.
ბეილერგიზი 5 თებერვალს დააკავეს, მისი ბინა გაჩხრიკეს და ელექტრონული მოწყობილობები და პირადი ნივთები ამოიღეს. დაკავებამდე რამდენიმე საათით ადრე, პროსამთავრობო Baku TV-მ მასალა გამოაქვეყნა, სადაც Toplum TV და ბეილერგიზი იყო ნახსენები.
Arqument.az-ის მთავარი რედაქტორი Meydan TV-ის საქმეზე დააკავეს
დღესვე, შამშად აგაევს, Arqument.az-ის მთავარ რედაქტორს, რომელიც Toplum TV-ის წამყვანიც იყო, კონტრაბანდის ბრალდებით სასამართლომ ორი თვითა და ათი დღით წინასწარი პატიმრობა შეუფარდა. მისი დაკავება “Meydan TV-ის საქმეს” უკავშირდება.
2024 წლის 8 დეკემბერს აზერბაიჯანში Meydan TV-ის შვიდი ჟურნალისტი დააკავეს, მათ შორის – რამინ ჯაბრაილზადე, აინურ გამბაროვა, აიტაჯ ახმედოვა, აისელ უმუდოვა, ხაიალა აგაევა, ნათიგ ჯავადლი და ულვი ტახიროვი. მათ კონტრაბანდის ბრალდება აქვთ წარდგენილი.
აგაევის ადვოკატმა, შაჰლა გუმბათოვამ, განაცხადა, რომ მისი დაკავება დაუსაბუთებელია, რადგან მას ქვეყნის დატოვება აკრძალული ჰქონდა და, შესაბამისად, გამოძიებას ვერ დაემალებოდა. მიუხედავად ამისა, პროკურორმა ჟურნალისტის გათავისუფლებას მხარი არ დაუჭირა.
აგაევი 5 თებერვალს, ღამის 2 საათზე, საკუთარ სახლში დააკავეს, ჩატარდა ჩხრეკა და ამოიღეს მისი და მისი ოჯახის წევრების პირადი ნივთები, მათ შორის – მობილური ტელეფონები და კომპიუტერი.
2023 წლის ნოემბრიდან დღემდე აზერბაიჯანში კონტრაბანდის ბრალდებით სამი დიდი მედიაგამოძიების ფარგლებში 24 ჟურნალისტი დააკავეს – Abzas Media, Toplum TV და Meydan TV-ის გამოძიების ფარგლებში. ამავე პერიოდში სხვა ბრალდებებით კიდევ სამი ჟურნალისტი იქნა დაპატიმრებული.
