საგარეო უწყება უკრაინას დამოუკიდებლობის დღეს ულოცავს და მშვიდობას უსურვებს, პრეზიდენტი კი - გამარჯვებას
გაზიარება
გაზიარება
უკრაინის დამოუკიდებლობის დღე
საქართველოს საგარეო საქმეთა სამინისტრო უკრაინას დამოუკიდებლობის დღეს ულოცავს და “მშვიდობასა და კეთილდღეობას” უსურვებს, ხოლო ვიდეომიმართვაში, რომელიც პრეზიდენტმა სალომე ზურაბიშვილმა გაავრცელა, იგი უკრაინას “გამარჯვებას” უსურვებს.
“გულითადად ვულოცავთ უკრაინას დამოუკიდებლობის დღეს! საქართველო სოლიდარულია უკრაინის მიმართ და რჩება უკრაინის სუვერენიტეტისა და ტერიტორიული მთლიანობის ერთგულ მხარდამჭერად.
საქართველო უკრაინელ ხალხს მშვიდობასა და კეთილდღეობას უსურვებს”, — წერს სამინისტრო.
Heartfelt congratulations to Ukraine on the Independence Day! Georgia stands in solidarity with ?? and stays committed supporter of Ukraine’s sovereignty and territorial integrity. ?? wishes peace and prosperity to the people of Ukraine.
გუშინ, 23 აგვისტოს, საქართველოს პრეზიდენტი სალომე ზურაბიშვილი ყირიმის პლატფორმის სამიტზე დისტანციურად ჩაერთო. მან უკრაინის პრეზიდენტ ვოლოდიმირ ზელენსკის მიმართა და საქართველოსა და ქართველი ხალხის სახელით სრული მხარდაჭერა და სოლიდარობა გამოუცხადა. ზურაბიშვილმა ასევე იმედი გამოთქვა, რომსაქართველო მიიღებს სტატუსს და შეუერთდება უკრაინასა და მოლდოვას.
დღეს კი საქართველოს პრეზიდენტმა ვიდეომიმართვა გაავრცელა, რომლითაც უკრაინას დამოუკიდებლობის დღეს ულოცავს.
“ძვირფასო ბატონო პრეზიდენტო, ძვირფასო უკრაინელო მეგობრებო, საქართველო თქვენთან არის დამოუკიდებლობის დღეს. საქართველოს სურს თქვენთან ერთად აღნიშნოს თქვენი დამოუკიდებლობა, რომლისთვისაც თქვენ ასე მამაცურად იბრძვით უკვე წელიწად-ნახევარია. ჩვენ თქვენთან ერთად ვიქნებით თქვენი გამარჯვების დღეს! დამოუკიდებლობის დღეს გილოცავთ!” – ამბობს ზურაბიშვილი მიმართვაში.
24 აგვისტოს უკრაინა დამოუკიდებლობის გამოცხადებიდან 32-ე წლისთავს ზეიმობს. ეს ხდება სრულმასშტაბიანი ომის ფონზე, რომელსაც მოსკოვი კიევის წინააღმდეგ 2022 წლის 24 თებერვლიდან აწარმოებს.
უკრაინის პრეზიდენტმა, ვოლოდიმირ ზელენსკიმ განაცხადა, რომ ესაა “თავისუფალი ხალხის დღესასწაული”, დამოუკიდებელი უკრაინისთვის ბრძოლა კი სასიცოცხლოდ მნიშვნელოვანია.
უკრაინამ საბჭოთა კავშირისგან დამოუკიდებლობა 1991 წლის 24 აგვისტოს გამოაცხადა. მანამდე, 1990 წლის 16 ივლისს უკრაინამ დამოუკიდებლობის დეკლარაციას მოაწერა ხელი. 1991 წლის 17 მარტს ჩატარდა რეფერენდუმი, კითხვით: გსურთ თუ არა სუვერენულ სახელმწიფოში ცხოვრება? გამოკითხულთა დაახლოებით 80%-მა კითხვას დადებითად უპასუხა.
თუმცა, ამავე წლის აგვისტოში, საბჭოთა კავშირში “აგვისტოს პუტჩი” მოხდა – მიზანი მიხეილ გორბაჩოვისთვის მართვის სადავეების ჩამორთმევა და ძველი სახელმწიფო წყობის დაბრუნება იყო. ამისთვის, 1991 წლის 24 აგვისტოს [უკრაინის საბჭოთა სოციალისტური რესპუბლიკის] უმაღლესმა რადამ საგანგებო სხდომა მოიწვია და უკრაინის დამოუკიდებლობის გამოცხადების შესახებ აქტი მიიღო, რომელიც თავის მხრივ 1991 წლის 1 დეკემბერს რეფერენდუმით დადასტურდა.
“უკრაინელი ხალხის ნებისა და მათი დამოუკიდებლობის მარადიული სურვილის გათვალისწინებით, რაც 1991 წლის 24 აგვისტოს უკრაინის დამოუკიდებლობის დეკლარაციის აქტის მიღების ისტორიულ მნიშვნელობას ადასტურებს, უკრაინის უმაღლესი რადა იღებს გადაწყვეტილებას: 24 აგვისტო განიხილოს როგორც უკრაინის დამოუკიდებლობის დღე და აღნიშნოს ეს თარიღი ყოველწლიურად, როგორც სახელმწიფო დღესასწაული.” – წერია მიღებულ აქტში.
