სასტუმროებს აფხაზეთში აღარ ავალდებულებენ იქონიონ ზეწრები, პირსახოცები, საპონი და ავეჯიც კი

 ეკონომიკის მინისტრის, ადგურ არძინბას თქმით, წინა სია ძველი და უსარგებლოა. აფხაზეთის სასტუმროების მიმართ არსებული მოთხოვნების ჩამონათვალი, რომელიც საბჭოთა დროიდან არ შეცვლილა, 120 პუნქტისგან შედგებოდა. ახლა ის ზუსტად ათჯერ შეამცირეს, და მხოლოდ 12 პუნქტი დატოვეს.

მოთხოვნების ჩამონათვალიდან ამოღებულია ნომერში ზეწრების, პირსახოცების, საპონის, საფერფლეების, ავეჯისა და სხვა ისეთი ნივთების არსებობა, რომელთა გარეშეც თანამედროვე სასტუმროს წარმოდგენა შეუძლებელია.

„ამ პუნქტებს არც მეწარმისთვის მოაქვს რაიმე სარგებელი, არც ტურისტისთვის და არც სახელმწიფოსთვის. ტურისტული მომსახურების ბაზარზე არსებობს კონკურენცია. თუ თქვენი ნომერი ამგვარი ნივთებით აღჭურვილი არ არის, თქვენთან ადამიანები უბრალოდ არ ჩამოვლენ. ნომრებში სიარული და იმის შემოწმება, თუ რამდენი პირსახოცი კიდია, „გოსტანდარტის“ საქმე არ მგონია. მეწარმე უნდა ხვდებოდეს, რომ მოთხოვნები საფუძვლიანია. როდესაც მეწარმესთან მიდიან და ეუბნებიან: „თქვენთან სათანადო სასაპნე და პირსახოცი არ არის“, – ეს სასაცილოა“, – დარწმუნებულია ეკონომიკის მინისტრი.   

ამჯერად „გოსსტანდარტი“ სასტუმროების ლიცენზირების დროს ყურადღებას მხოლოდ სასტუმროს სახანძრო, ტექნიკურ და სანიტარულ უსაფრთხოებაზე ამახვილებს.

„ტურისტი ვერც ხედავს, არის თუ არა ხანძრის ჩაქრობის სისტემა, შემოწმებულია თუ არა ის წელს, ან როგორ მდგომარეობაშია ლიფტები, არსებობს თუ არა მმართველი კომპანია, რომელიც მონიტორინგს ახორციელებს. სახელმწიფომ სწორედ ამ მხრივ უნდა განახორციელოს მკაცრი კონტროლი“, – დასძინა არძინბამ.

სასტუმროების მიმართ არსებული მოთხოვნების ჩამონათვალის ათჯერ შემცირებით ეკონომიკის სამინისტრო დარჩენილი პუნქტების გაკონტროლებას გაამკაცრებს. ახლა, თუკი შემოწმების დროს „გოსსტანდარტი“ უსაფრთხოების მოთხოვნების დარღვევას გამოავლენს, სასტუმროს არა მხოლოდ სერტიფიკატი არ მიენიჭება, არამედ საერთოდ დაიკეტება.

„სახანძრო, ტექნიკური და სანიტარული უსაფრთხოების დარღვევას პირდაპირ ან ირიბად შეუძლია ზიანი მიაყენოს ადამიანების ჯანმრთელობას, და ღმერთმა დაიფაროს, ზოგჯერ სიცოცხლესაც კი.  აი, ამ მხრივ, რასაკვირველია, მკაცრ კონტროლს განვახორციელებთ; ობიექტების დაკეტვამდეც კი, ვიდრე გამოვლენილი პრობლემები არ აღმოიფხვრება“, – კატეგორიულად განაცხადა არძინბამ.

კიდევ ერთ სიახლედ იქცევა შემოწმებების სისტემურობა. ადრე სასტუმროები და ოტელები წელიწადში რამდენჯერმე მოწმდებოდა. ახლა კი ერთხელ – სეზონის დაწყების წინ შეამოწმებენ, და ამ შემოწმების შედეგად ერთწლიან სერტიფიკატს მისცემენ.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო