ლავროვი არ ჩამოდის. ევროპის საბჭოს მინისტერიალი თბილისის ნაცვლად სტრასბურგში ჩატარდება

ჩატარდება თუ არა თბილისში ევროპის საბჭოს მინისტრთა კომიტეტის სხდომა და დაესწრება თუ არა მას რუსეთის საგარეო უწყების ხელმძღვანელი სერგეი ლავროვი?

ამ კითხვას, რომელიც უკვე ორი თვეა აქტუალობას არ კარგავს, დღეს გაეცა პასუხი. სტრასბურგში საგარეო საქმეთა მინისტრების მოადგილეები შეიკრიბნენ და გადაწყვიტეს, რომ სხდომას არა ევროპის საბჭოს თავმჯდომარე ქვეყანა – საქართველო, არამედ სტრასბურგი უმასპინძლებს. სწორედ სტრასბურგში გაიმართება მინისტრთა კომიტეტის 130-ე შეხვედრა

2019 წლის 27 ნოემბერს საქართველო ნახევარი წლით გახდა ევროსაბჭოს მინისტრთა კომიტეტის თავმჯდომარე ქვეყანა.

2020 წლის 14-15 მაისს სწორედ თბილისს უნდა ემასპინძლა ევროპის საბჭოს მინისტრთა კომიტეტის სხდომისთვის. მინისტერიალზე, ტრადიციულად ევროპის საბჭოს ქვეყნების საგარეო საქმეთა მინისტრები მონაწილეობენ. ევროპის საბჭოს წევრი ქვეყანაა რუსეთიც. შესაბამისად, ჩამოვიდოდა თუ არა საქართველოში რუსეთის საგარეო საქმეთა მინისტრი სერგეი ლავროვი, ეს  ბოლო დროის ერთ-ერთ აქტუალურ კითხვად იქცა.

საქმე იმაშია, რომ ლავროვის საქართველოში ჩამოსვლით ირღვეოდა კანონი “ოკუპირებული ტერიტორიების შესახებ”, რომელიც საქართველოში 2008 წლის აგვისტოს ომის შემდეგ მოქმედებს. ამ კანონის თანახმად, პირებს, რომლებიც იმყოფებოდნენ აფხაზეთისა და სამხრეთ ოსეთის ტერიტორიებზე თბილისის მიერ კონტროლირებადი ტერიტორიის გვერდის ავლით (მაგალითად, აფხაზეთში ფსოუს გავლით შევიდნენ და არა ენგურის ხიდის) აკრძალული აქვთ საქართველოს დანარჩენ ტერიტორიაზე შემოსვლა.

ლავროვის ჩამოსვლის შემთხვევაში, საპროტესტო აქციებს გეგმავდნენ სამოქალაქო აქტივისტები და ოპოზიციის ნაწილი.