ბოლო კვირის განმავლობაში სირიაში ასობით რუსი დაქირავებული მეომარი მოკლეს
Reuters-ის ინფორმაციით, გასულ კვირას სირიაში რუსეთის მოქალაქეობის მქონე დაახლოებით 300 ადამიანი მოკლეს.
Reuters-ის ერთ-ერთი თანამოსაუბრე სამხედრო ექიმია. მისი ნაამბობით, მოკლულია ასევე დაახლოებით 100 ადამიანი, რომლებიც ვაგნერის კერძო სამხედრო კომპანიასთან თანამშრომლობდნენ. წყარომ, რომელიც „ვაგნერის სამხედო კომპანიასთან“ უშუალო კავშირშია და მის რამდენიმე მებრძოლს იცნობს, Reuters-ს ეს ინფორმაცია დაუდასტურა.
მოსკოვის ერთ-ერთი სამხედრო ჰოსპიტალის ექიმმა სააგენტოს აცნობა, რომ ამჟამად მის საავადმყოფოში სირიაში დაჭრილი 50-ზე მეტი რუსი იმყოფება. დანარჩენი დაჭრილი დაქირავებული ჯარისკაცები მოსკოვის, მოსკოვის მიმდებარე და სანკტ-პეტერბურგის სამედიცინო დაწესებულებებში არიან გადანაწილებულები.
ბევრმა ამერიკულმა მედიამ უკვე გაავრცელა ინფორმაცია იმის შესახებ, რომ 2018 წლის 7 თებერვალს რუსი დაქირავებული ჯარისკაცები სირიაში აშშ-ის მეთაურობით შექმნილი კოალიციის საავიაციო და საარტილერიო დარტყმის ქვეშ მოხვდენენ. პენტაგონში გამართულ პრეს-კონფერენციაზე აშშ-ის ცენტრალური სამხედრო-საჰაერო ძალების სარდლობის ხელმძღვანელი, გენერალ-ლეიტენანტი ჯეფრი ჰარიგანი მოჰყვა, თუ რა ხდებოდა იმ დღეს სირიის პროვინცია დეირ-ეზ-ზორში.
მისი თქმით, იმ რაიონის დაპყრობას, რომელიც „სირიის დემოკრატიულ ძალებს“ აქვთ დაკავებული, უცნობი მოწინააღმდეგე ცდილობდა. საერთაშორისო კოალიცია ამბოხებულებს თავიანთი პოზიციების დაცვაში დაეხმარა. კოალიციის ხელმძღვანელობამ არ იცოდა, იყვნენ თუ არა თავდამსხმელთა შორის რუსი ჯარისკაცები ან დაქირავებული მეომრები.
გენერალი ასევე მოჰყვა იმას, რომ შეტევის განხორციელებამდე ამერიკის მხარე სირიაში რუსეთის სარდლობას დაუკავშირდა და აცნობა თავდასხმისა და იმის შესახებ, რომ კოალიცია საპასუხო დარტყმის განხორციელებას აპირებდა. ამ შეტყობინებაზე რუსეთის რექცია ჰარიგანს არ გაუმხელია.
15 თებერვლამდე რუსეთის ხელისუფლება სირიაში დაღუპული დაქირავებული რუსი მეომრების შესახებ კომენტარის გაკეთებაზე უარს აცხადებდა. გუშინ რუსეთის საგარეო საქმეთა სამინისტროს წარმომადგენელმა მარია ზახაროვამ განაცხადა, რომ 7 თებერვალს სირიაში, სავარაუდოდ, ხუთი რუსი დაიღუპა. ზახაროვამ აღნიშნა, რომ ამ ადამიანების მოქალაქეობის თაობაზე ინფორმაცია ჯერ კიდევ არ არის დადასტურებული და მოწმდება. მისი თქმით, ეს ადამიანები რუსი სამხედრო მოსამსახურეები ნამდვილად არ იყვნენ.
