არის თუ არა საქართველოს მოქალაქის პირადობის მოწმობაში "ანტიქრისტეს ბეჭედი"? რას იტყვის საკონსტიტუციო სასამართლო

საქართველოს საკონსტიტუციო სასამართლოს მოსამართლეები გუშინ “მეორედ მოსვლისა” და “ბოლო ჟამის” სავარაუდო თარიღებსა და “ანტიქრისტეს ბეჭედზე” მსჯელობდნენ

საკონსტიტუციო სასამართლოში შესულია მოქალაქეების სარჩელი, რომლებიც უარს აცხადებენ ელექტრონული პირადობის მოწმობის აღებაზე იმ მოტივით, რომ ამ მოწმობაში “ეშმაკის ნიშანია” ჩადებული.

მოსარჩელეებს მიაჩნიათ, რომ “ჩიპიანი” ელექტრონული პირადობის მოწმობა შეურაცხყოფს მათ რელიგიურ გრძნობებს. მათი აზრით, არაკონსტიტუციურია ნორმა, რომელიც ამ მოწმობის ქონას საქართველოს ყველა მოქალაქეს ავალდებულებს. სწორედ ამ ნორმის გაუქმებას ითხოვენ ისინი საკონსტიტუციო სასამართლოსგან.

• ეკლესია და საზოგადოება საქართველოში – ხომ არ არის მეტისმეტი დიქტატი?

ალტერნატივის სახით ისინი სასამართლოს თხოვენ, დაუშვას ძველი მოდელის პირადობის მოწმობები – ქაღალდზე დაბეჭდილი და ლამინირებული.

„წმინდანი გვაფრთხილებს, რომ ეს არის ეშმაკის ბეჭედი“, – განაცხადა მოსარჩელე ნანა სეფაშვილმა სასამართლო პროცესზე და პაუზის შემდეგ დაამატა:

„ჩვენც არ ვამბობთ, რომ ეს არის ანტიქრისტეს ბეჭედი, მაგრამ ეს არის ამის წინასახე… თუ ასე გაგრძელდა, მერე „ჩიპებს“ ადამიანების სხეულშიც განათავსებენ იმპლანტების სახით. ეს იქნება სრული აპოკალიფსი,“ – მიმართა მოსამართლეს მოსარჩელე ია რეხვიაშვილმა.

„ანტიქრისტე უნდა მოვიდეს ხო?“ – იკითხა მოსამართლე გიორგი კვერენჩხილაძემ.

„კი, დაწყებულია უკვე პროცესი“, – უპასუხა მას მოსარჩელე ია რეხვიაშვილმა და ვრცლად მიმოიხილა, რა წერია იოანე ღვთისმეტყველის წერილში.

„პირდაპირ ასე წერია, რომ ელექტრონული ჩიპები ანტიქრისტეს ნიშანიაო?“ – დიალოგში ჩაერთო მოსამართლე ევა გოცირიძეც.

„ეს არ წერია, მაგრამ ესაა წინასახე… ეს არის მეორედ მოსვლის ნიშანი,“ – რამდენჯერმე გაიმეორა ია რეხვიაშვილმა.

„ადრეც იყო დაანონსებული მეორედ მოსვლა, აპოკალიფსი…“ – ჩაილაპარაკა მოსამართლე გიორგი კვერეჩხილაძემ და იქვე იკითხა – ჟამი როდის დადგება?“

„არ ვიცი. ცრუ წინასწარმეტყველებებიც ბევრია,“ – უპასუხა მოსამართლეს ია რეხვიაშვილმა.

ამ დიალოგს, რომელიც გუშინ ბათუმში, საკონსტიტუციო სასამართლოს სხდომაზე გაიმართა, “ნეტგაზეთი” ციტირებს.

ერთი თვის განმავლობაში 96-მა ადამიანმა მიმართა იუსტიციის სახლებს “უჩიპო” პირადობის მოწმობის მოთხოვნით

სარჩელი ელექტრონული პირადობის მოწმობების წინააღმდეგ საკონსტიტუციო სასამართლომ წლის ბოლოს არსებითად განსახილველად მიიღო.

„ინფორმაციის ელექტრონული მატარებლის („ჩიპის“) შემცველი პირადობის მოწმობა და პასპორტი ადამიანების ტოტალური კონტროლის საშუალებაა და უკავშირდება აპოკალიფსის შესახებ ბიბლიურ წინასწარმეტყველებას“, – წერია სარჩელში.

მოსარჩელეების თქმით, ისინი რწმენის გამო ამბობენ უარს აღნიშნული დოკუმენტების მიღებაზე და „რაც სოციალური ცხოვრებისგან მათ სრულ იზოლირებას და  კონსტიტუციურ უფლებების შეზღუდვას“ განაპირობებს.

ელექტრონული პირადობის მოწმობა საქართველოს მოქალაქეების შიდა პასპორტია, რომელიც მოქალაქეებს ყოველ ფეხის ნაბიჯზე სჭირდებათ. წინააღმდეგ შემთხვევაში მათ შეზღუდული აქვთ არჩევნებში მონაწილეობის უფლება, სამედიცინო მომსახურების მიღების, დასაქმების, განათლების, სახელმწიფო ორგანოებთან ურთიერთობის, რიგი სატრანსპორტო საშუალებებით სარგებლობის, ნებისმიერი მნიშვნელოვანი გარიგების დადების, საბანკო-საფინანსო დაწესებულებებთან ურთიერთობის შესაძლებლობა და ა.შ.

სწორედ ამიტომ, ვიდრე აღნიშნულ საკითხზე გადაწყვეტილებას საბოლოოდ გამოიტანს, სასამართლომ დროებით, ერთი თვის ვადით დაუშვა არაელექტრონული მოწმობების გაცემა იმ ადამიანებზე, რომლებიც რომელიმე რელიგიური აღმსარებლობის დაწესებულებიდან ცნობას წარმოადგენენ.

როგორც გაზეთმა “ბათუმელებმა” გამოარკვია, 26 დეკემბრის შემდეგ, როცა საკონსტიტუციო სასამართლომ „უჩიპო“ პირადობის გაცემა დაუშვა, იუსტიციის სახლებში 96-მა მოქალაქემ მოითხოვა პირადობის მოწმობა ელექტრონული მატარებლის, ანუ „ჩიპის“ გარეშე.

28 იანვრის მონაცემებით, გაცემულია 32 პირადობის მოწმობა.

რას ამბობს ეკლესია

ადამიანები, რომლებსაც ელექტრონული ID ბარათის აღება არ უნდათ, ამას რელიგიური მოსაზრებებით ხსნიან, თუმცა საქართველოს მართლმადიდებლური ეკლესია ოფიციალურად ამ პოზიციას არ იზიარებს.

უნდა ვივარაუდოთ, რომ თავად კათოლიკოს პარტიარქს, ილია მეორესაც აქვს “ჩიპიანი” პასპორტი, რადგან ის ხშირად დადის საზღვარგარეთ, ისევე როგორც სინოდის სხვა წევრები.

თუმცა, ეკლესიის წიაღში არიან ცალკეული რადიკალი-ფუნდამენტალისტები, მათ შორის, საკმაოდ მაღალი სასულიერო იერარქიის წარმომადგენლები, რომლებიც საკუთარ მრევლს მოუწოდებენ არ აიღონ “ჩიპიანი”  საბუთები.

მაგალითად ამ ვიდეოში, რომელიც ჯერ კიდევ 2011 წელსაა ჩაწერილი, რუისისა და ურბნისის მიტროპოლიტი იობი, სინოდის წევრი, თავის მრევლს  უქადაგებს, რომ არავიტარ შემთხვევაში არ აიღონ ელექტრონული მოწმობები, რადგან “იქ არის მხეცის სახელი დაფიქსირებული”. ხოლო იუსტიციის სახლებზე ის ამბობს, რომ “იქ ანტიქრისტეს მომსახურება ხდება”.