“Abzas Media işi” üzrə istintaq müddəti ilin sonuna qədər uzadılıb
“Abzas Media işi” – istintaq uzadılıb
Azərbaycanda “Abzas Media işi” üzrə həbs edilənlərin həbs müddəti, o cümlədən işin istintaq müddəti uzadılıb. İstintaqın 13 ayın tamamında yekunlaşacağı gözlənilir. Bu, ölkə qanunvericiliyə görə, hüquq-mühafizə orqanları tərəfindən istintaq aparılması üçün maksimal müddətdir
- “Formula 1” yarışları ərəfəsində Bakıda hərəkət yenidən iflic olub
- Jurnalist Əfqan Muxtarlının AİHM-də Gürcüstan və Azərbaycana qarşı qaldırdığı iddia təmin olunub
- “Hərbi yola getmədən də, Naxçıvana keçid məsələsində uduşlu çıxmaq mümkündür”. Bakıdan baxış
Sentyabrın 7-də müstəqil “Abzas Media” internet nəşrinin direktoru Ülvi Həsənli, baş redaktor Sevinc Vaqifqızı, direktor müavini Məhəmməd Kekalov, jurnalistlər Hafiz Babalı və Nərgiz Absalamovanın həbs müddətləri 3 ay uzadılıb.
Bakının Xətai rayon Məhkəməsinin hakimi Sahibə Hacıyevanın sədrliyi ilə keçirilən proseslərdə istintaq orqanının onların barəsində seçilmiş həbs-qətimkan tədbirinin müddətinin uzadılması ilə bağlı verdiyi vəsatətlər təmin edilib.
Jurnalistlər məhkəməyə gətiriləndə şüarlar səsləndiriblər.
“Bizi heç kim susdura bilməz!” – deyə Sevinc Vaqifqızı bildirib.
“Azad medianı heç kim susdura bilməz” – deyən Nərgiz Absalamova onların həbsinin siyasi sifariş olduğunu da söyləyib.
Araşdırmaçı jurnalist Hafiz Babalı isə deyib ki, “Həbsxana məni tutduranların yeridir”.
Sentyabrın 6-da “Abzas Media işi” üzrə həbs edilən jurnalist Elnarə Qasımova və iqtisadçı ekspert Fərid Mehralızadənin də həbs müddətləri uzadılıb.
Bakının Xətai rayon Məhkəməsində hakim Sülhana Hacıyevanın sədrliyi ilə keçirilən hər iki iclasda istintaq orqanının və prokurorların birgə vəsatətinə baxılıb.
Məhkəmənin qərarı ilə Elnarə Qasımovanın həbs müddəti noyabrın 13-dək, Fərid Mehralızadənin həbs müddəti isə dekabrın 19-dək uzadılıb.
Elnarə Qasımova məhkəmədəki çıxışında həbs müddətlərinin uzadılması üçün heç bir hüquqi əsas olmadığını bildirib.
“Onlar COP29-a görə həbsimizi uzadırlar. Bu ittihamlar bizə qarşı deyil, araşdırmalarımızda korrupsiya cinayətlərində iştirak edən şəxslərə qarşı irəli sürülməlidir”.
Elə həmin gün hakim Sülhana Hacıyeva “Abzas Media işi” üzrə istintaqın uzadılması ilə bağlı istintaqın vəsatətinə də baxıb və təmin edib. Nəticədə, bu iş üzrə istintaqın 13 ayın tamamında – 20 dekabr 2024-cü ildə başa çatması gözlənilir. Bu, Azərbaycan qanunvericiliyinə görə, istintaqın aparılması üçün maksimal müddətdir.
“Abzas Media işi” üzrə cinayət təqibi 20 noyabr 2023-cü ildə başlayıb. Məhz bu gün nəşrin direktoru Ülvi Həsənli və onun müavini Məhəmməd Kekalov, ertəsi gün isə baş redaktor Sevinc Vaqifqızı ölkəyə qayıdarkən elə hava limanındaca saxlanılıblar.
2024-cü il yanvarın 13-ə qədər “Abzas Media”nın daha üç əməkdaşı – reportyorlar Nərgiz Absalamova və Elnarə Qasımova, araşdırmaçı jurnalist Hafiz Babalı həbs ediliblər.
İyunun 1-də tanınmış iqtisadçı-ekspert Fərid Mehralızadə “Abzas Media işi” üzrə saxlanılıb. Lakin o, bu media ilə əlaqəsini inkar edir. “Abzas Media” redaksiyası da həbsdə olan iqtisadçı ilə heç vaxt əməkdaşlıq etmədikləri barədə bəyanat yayıb.
İş üzrə bütün təqsirləndirilənlər ilkin olaraq qaçaqmalçılıqda ittiham olunublar. Daha sonra onlara qarşı Azərbaycan Cinayət Məcəlləsinin daha 7 ağır maddəsi – 192.3.2 (külli miqdarda gəlir əldə etməklə qanunsuz sahibkarlıq), 193-1.3.1 və 193-1.3.2 (mütəşəkkil dəstə tərəfindən cinayət yolu ilə əldə edilmiş gəlirləri leqallaşdırma), 206.4 (mütəşəkkil dəstə tərəfindən qaçaqmalçılıq), 320.1 və 320.2 (sənədləri saxtalaşdırma və saxta sənədlərdən istifadə), habelə 213.2.1 (qrup şəklində vergidən yayınma) ilə ittiham irəli sürülüb.
Bu ittihamlarla onları 12 ilədək həbs cəzası gözləyir.
Jurnalistlər bütün ittihamları rədd edir və həbslərini “Abzas Media”da dərc olunan korrupsiya araşdırmaları ilə əlaqələndirirlər.
Hüquq müdafiəçilərinin bildirdiyinə görə, müstəqil “Abzas Media” nəşri yüksək vəzifəli məmurlar və onların yaxınları ilə bağlı korrupsiya araşdırmalarının dərcinə görə repressiyaya məruz qalıb.
