JAMnews-ի աղբյուր. Թաթունաշվիլիի մարմնից հեռացվել են բոլոր օրգանները
22 օր առաջ Սամխարաուլիի անվան Փորձաքննության ազգային բյուրոյում սկսվել է Արչիլ Թաթունաշվիլիի մարմնի հետ կապված աշխատանքը: Փորձաքննության արդյունքները դեռևս հայտնի չեն: Բյուրոյում չկարողացան հստակ ասել նաև, թե երբ դրանք կհրապարակվեն: JAMnews-ը փորձել է պարզել, թե որ փուլում է փորձաքննությունն ու ինչու է ձգձգվում վերջնական եզրակացությունը: Վստահելի գաղտնի աղբյուրի տվյալներով՝ Թաթունաշվիլիի մարմինը վրացական կողմին է փոխանցվել առանց ներքին օրգանների և գլխուղեղի:
«Դա ծայրահեղ կերպով դժվարացնում է նրա մահվան պատճառների բացահայտումը», — ասել է աղբյուրը:
___________________
Գաղտնի աղբյուրից ստացված այս տեղեկատվությունը Վրաստանի ոչ ներքին գործերի նախարարությունում, ոչ Սամխարաուլիի անվան փորձաքննության ազգային բյուրոյում ոչ հաստատեցին, ոչ հերքեցին:
«Ցավոք, ես չեմ կարող մեկնաբանել այդ տեղեկատվությունը: Թե որ փուլում է գտնվում փորձաքննությունը, ես չգիտեմ, մեր փորձագետներից ոչ ոք այդ մասին տեղեկատվություն չի տրամադրի մինչև որ փորձաքննությունը չավարտվի: Բոլոր մանրամասները պետք է ճշտել այն կազմակերպությունից, որը պատվիրել է փորձաքննությունը, տվյալ դեպքում՝ դատախազությունից», — ասել է Սամխարաուլիի անվան փորձաքննության ազգային բյուրոյի հասարակայնության հետ կապերի ծառայության ղեկավար Էկա Չումբուրիձեն:
«Այդ գործով զբաղվում է ներքին գործերի նախարարությունը, և ցանկացած հարցով պետք է նրանց դիմել: Իսկ մենք, քննության շահերից ելնելով, հարցերին չենք պատասխանում», — ասացին դատախազության մամուլի ծառայությունում:
__________________
Վրաստանում Արչիլ Թաթունաշվիլիի մարմնի փորձաքննությամբ զբաղվում է Սամխարաուլիի անվան դատական փորձաքննության ազգային բյուրոն: Հենց այդտեղ է տեղափոխվել զոհվածի մարմինը Ցխինվալիից այն Վրաստանին փոխանցելուց հետո: Այդ օրվանից անցել է 22 օր, իսկ փորձաքննությունը լռում է:
«Բժշկական փորձաքննությունը ժամանակային սահմանափակում չունի, քանի որ դա այնպիսի գործընթաց է, որի ժամանակ կարող են նոր հետազոտություն պահանջող հարցեր առաջանալ», — ասել է Սամխարաուլիի անվան փորձաքննության ազգային բյուրոյի հասարակության հետ կապերի բաժնի ղեկավար Էկա Չումբուրիձեն:
Գործի մանրամասները չեն մեկնաբանում նաև դատախազությունում:
JAMnews-ի գաղտնի աղբյուրի տվյալներով՝ վրացական կողմին Թաթունաշվիլիի մարմնի փոխանցումից առաջ հեռացվել են նրա բոլոր օրգաններն, այդ թվում՝ սիրտը, ինչպես նաև՝ գլխուղեղը:
Կարելի է ենթադրել, որ օրգանները հանվել են Ռուսաստանում հետազոտության համար անցկացված փորձաքննության ժամանակ: Դատական փորձաքննության ժամանակ հերձվում է գլուխը, կրծքավանդակն ու որովայնի խոռոչը: Ընթացակարգերը ենթադրում են օրգանների բաժանումը հյուսվածքների, վերցվում են նմուշներ, որից հետո, որպես կանոն, օրգանները կրկին տեղավորվում են մարմնում: Մեր աղբյուրի տեղեկատվության համաձայն՝ Թաթունաշվիլիի պարագայում դա չի արվել:
«Այժմ փորձաքննությունը գործնականում չի կարող անաչառ պարզել մահվան պատճառն, — ասում է աղբյուրը: — Ցխինվալին պնդում է, որ Թաթունաշվիլին մահացել է սրտի անբավարարությունից, սակայն վրացի փորձագետները չեն կարող դա հաստատել, քանի որ այդ օրգանն իրենց չեն փոխանցել: Նյութն այնքան քիչ է, որ հնարավոր չէ պարզել նաև այն, թե արդյոք [կենդանության օրոք] վնասվել են ներքին օրգանները [ծեծի արդյունքում]: Ես չգիտեմ, թե փորձաքննությունն ինչպես է լուծելու այս խնդիրը»:
Այն, որ Թաթունաշվիլիի մարմինը փորձաքննության է ուղարկվել «նյութի ոչ բավարար քանակով», հաստատում են նաև «Էմպաթիա» կտտանքների և բռնության զոհերի ռեաբիլիտացիայի միջազգային կենտրոնում:
Կազմակերպության ապրիլի 12-ին տարածած հայտարարությունում ասվում է. «Այս տարվա մարտի 20-ին Վրաստանին է փոխանցվել Արչիլ Թաթունաշվիլիի մարմինն առանց փորձաքննության համար նյութի բավարար քանակի, ինչը դժվարացնում է մահվան պատճառի պարզումը և լիարժեք փորձաքննության անցկացմանը խոչընդոտելու մասին ենթադրություն է առաջացնում»:
«Էմպաթիան» միացել է Արչիլ Թաթունաշվիլիի գործին դատախազության որոշման հիման վրա, և մարմինը օրինական կերպով հասանելի է եղել կազմակերպության համար, ինչպես Փորձաքննության ազգային բյուրոյի համար:
Վրաստանի քաղաքացիներ Արչիլ Թաթունաշվիլին, Լևան Քութաշվիլին և Իոսեբ Պավլիաշվիլին ձերբակալվել են 2018 թ-ի փետրվարի 22-ին Հարավային Օսիայի դե ֆակտո իշխանությունների ներկայացուցիչների կողմից: Հաջորդ օրն Արչիլ Թաթունաշվիլին մահացել է Ցխինվալիում չպարզված հանգամանքներում: Օսական կողմը վարկած է տարածել, թե 35-ամյա Թաթունաշվիլին«փետրվարի 23-ի երեկոյան ընկել է Ցխինվալիի մեկուսարանի աստիճաններին և մահացել Ցխինվալիի հիվանդանոցում սրտի անբավարարության հետևանքով»:
Այդ վարկածին չի հավատում ոչ պաշտոնական Թբիլիսին, ոչ Թաթունաշվիլիի ընտանիքը: Վրացական կողմը կասկածում է, որ Թաթունաշվիլիի մահը բռնության հետևանքով է: Կասկածներն անուղղակիորեն հաստատվում են նաև նրանով, որ օսական կողմը գրեթե մեկ ամիս հրաժարվում էր վրացական կողմին փոխանցել Թաթունաշվիլիի մարմինը:
Թաթունաշվիլիի մարմինը երկու փորձաքննություն է անցել՝ Ռուսաստանում և Վրաստանում: Այս փուլում ոչ մեկի, ոչ մյուսի արդյունքները հանրությանը հայտնի չեն: Օսական կողմը վստահեցնում է, որ Ռուսաստանում անցկացված փորձաքննությունը հաստատում է, որ Թաթունաշվիլին մահացել է սրտային անբավարարության հետևանքով:
Ռուսական փորձաքննության արդյունքներն օսական կողմը փոխանցել է վրացականին Թաթունաշվիլիի մարմնի հետ միասին: Դա հաստատում է «Կարմիր Խաչի միջազգային կոմիտեի» ներկայացուցչությունը, որը Ցխինվալիից վրացական կողմ է տեղափոխել Թաթունաշվիլի մարմինը:
«Կարմիր Խաչի միջազգային կոմիտեի» մեդիասպա Սոֆիա Էլիզբարաշվիլիի խոսքով՝ ռուսական փորձաքննության արդյունքներն այլ նյութերի հետ միասին փոխանցվել են Վրաստանի ՆԳՆ-ին: Նա նշում է, որ իր կազմակերպությունը զբաղվել է մարմինը տեղափոխելու տեխնիկական հարցերով միայն, և թե ինչ է գրված փորձաքննության եզրակացության մեջ, հայտնի չէ:
___________________
Սամխարաուլիի անվան ազգային բյուրոյում անցկացված փորձաքննությանը ներկա է եղել «Էմպաթիայի» դատական փորձագետ Իրակլի Թոյիձեն: «Էմպաթիան» Թաթունաշվիլիի գործի վերաբերյալ բավականաչափ իրազեկ կազմակերպություններից միակն է, որը համաձայնել է զրուցել JAMnews-ի ներկայացուցչի հետ:
Փորձաքննության ընթացքում, որին ներկա է եղել Թոյիձեն, մարմինը զննվել է արտաքուստ, կատարվել է ռենտգենագրական զննում, հյուսվածքների նմուշներ են վերցվել լաբորատոր հետազոտությունների համար:
Ներքին օրգանների բացակայության պարագայում հայտնի չէ, թե ինչ տեսակի հետազոտություն է իրականացվել: Այդ հարցի վերաբերյալ «Էմպաթիայում» ոչինչ չեն ասում, թեև մարմնի փորձաքննության ժամանակ նմուշներ են վերցվում ոչ միայն ներքին օրգաններից, այլ նաև մաշկից, ատամներից, ոսկրային հյուսվածքներից, եղունգներից, մազերից: Ոչ մի արդյունք դեռևս հայտնի չէ, հայտնի չէ նաև ոչ հետազոտությունների քանակը, ոչ դրանց տեսակը:
«Էմպաթիայի» փորձագետները, որոնք մարտի 21-ի ուշ երեկոյան տեսել են Թաթունաշվիլիի մարմինն, ասում են, որ արտաքին վիզուալ զննման ժամանակ մարմնի վրա կտտանքների հետքեր են նկատվել: Մանրամասների մասին կենտրոնում չեն խոսում:
«Էմպաթիայի» ղեկավար Մարիամ Ջիշկարիաննին ասում է, որ իր կենտրոնը նման հետազոտությունների բավականին մեծ փորձ ունի, և սովորաբար լաբորատորիաների աշխատանքի արդյունքներն այդքան ժամանակ չեն պահանջում, ինչպես Թաթունաշվիլիի գործում: «Հատկապես որ, ըստ առկա տվյալների, դրա համար նյութը քիչ է եղել», — ասում է Մարիամ Ջիշկարիանին:
Նրա խոսքով՝ կենտրոնն Ազգային բյուրոյից պահանջել է ռուսական փորձաքննության արդյունքները, սակայն այնտեղ պատասխանել են, որ դատախազությունից այդ փաստաթղթի վրացերեն թարգմանությունը դեռևս չեն ստացել:
Սամխարաուլիի անվան փորձաքննության ազգային բյուրոյում JAMnews-ին չհստակեցրին, թե հատկապես ինչ լաբորատոր հետազոտություններ են ավելի քան 20 օր ձգվել: Մարիամ Ջիշկարիանիի խոսքով՝ «Էմպաթիա» կենտրոնը պատրաստ է ևս մեկ շաբաթ սպասել Ազգային բյուրոյի փորձագետների աշխատանքի արդյունքներին: Եթե այս ընթացքում դրանք չհայտնվեն կամ «Էմպաթիայի» ներկայացուցիչները չհամաձայնեն ներկայացված արդյունքներին, ապա կենտրոնը կխնդրի իր լաբորատոր հետազոտություններն անցկացնելու իրավունք տրամամդրել, ինքը փորձաքննություն կանցկացնի և միջանկյալ հաշվետվություն կներկայացնի: Վերջնական եզրակացության համար, նրա խոսքով, անհրաժեշտ է մեծ ծավալի աշխատանք իրականացնել:
Վերջնական եզրակացության տրամադրման համար միայն բժշկական փորձաքննությունը բավարար չէ: Անհրաժեշտ են տվյալ գործի մյուս մանրամասները, տեղեկատվությունն այն մասին, թե որտեղ է մահը վրա հասել, երբ և ինչ հանգամանքներում, ականատեսների ցուցմունքներն ու այլ կարևոր նյութեր, որոնք, ըստ Մարիամ Ջիշկարիանիի, Թաթունաշվիլիի գործում դեռ չկան:
«Դատախազությունը շատ քիչ փաստ և տեղեկատվություն ունի», — ասում է Ջիշկարիանին: Նրա խոսքով՝ այն նյութերում, որոնք դատախազությունը տրամադրել է «Էմպաթիա» կենտրոնին, շատ բաներ հստակ չեն և մշուշոտ են:
Վրաստանի ՆԳՆ-ում Թաթունաշվիլիի գործի վերաբերյալ JAMnews-ի հարցերին պատասխանելուց ձեռնպահ մնացին:
«Քննության շահերից ելնելով՝ ոչինչ ասել չենք կարող», — ասաց ՆԳՆ մամուլի ծառայության աշխատակից Անանո Բարաբաձեն, որը Թաթունաշվիլիի գործով տեղեկատվության տրամադրման համար պատասխանատուն է:
Թաթունաշվիլիի գործը ՆԳՆ-ն վարում է ՔՕ 108 և 143-րդ հոդվածներով, որոնք ենթադրում են ապօրինի ազատազրկում և սպանություն, համապատասխանաբար 2-4 և 7-11 տարվա ազատազրկում են նախատեսում: Արդյոք հետաքննությանն արտասահմանյան փորձագետներ են մասնակցում, արդյոք հրավիրվելու են, այս փուլում դեռևս անհայտ է:
