Չեչնիայի զինվորականներին պատրաստում են ցամաքային գործողության Սիրիայում

Չեչնիայի ՆԳՆ ազգային գվարդիայի զինծառայողներին պատրաստում են Սիրիայում  ցամաքային գործողությունների մասնակցելուն, տեղեկացնում է ռուսաստանյան “Նովայա գազետան”:

Թերթը հրապարակում է դրա ապացույցները՝ այս երկու գովազդային գրքույկների լուսանկարները:

Դրանք տարածվում են “Հյուսիս” չեչենական գումարտակի զինծառայողների շրջանում, որը մտնում է Ազգային գվարդիայի կառույցի մեջ: Առաջին գրքույկը կոչվում է “Վիզուալ թարգմանիչ (Սիրայի Արաբական Հանրապետություն)”: Դրա կազմի վրա պատկերված է Պաշտպանության նախարարության զինված ուժերի խորհրդանշանը` կարմիր-սպիտակ-կապույտ աստղը:

Տեղեկատվությունը ներկայացված է թեմատիկորեն կառուցված պատկերներով. Մերձավոր Արևելքի քարտեզ, Սիրիայի քարտեզ, տեղի բնակիչների հետ շփման, նրանցից  տեղադրության, սպառազինության և թշնամու գործողությունների մասին տեղեկատվության ստացման համար անհրաժեշտ  արտահայտությունների ու թվերի արաբերեն թարգմանություն:

Երկրորդ գրքույկը 10-էջանոց է և համարյա զուրկ է լուսանկարներից: Այն կոչվում է «Խորհուրդներ զինծառայողներին Սիրիայի Արաբական հանրապետությանում ռազմական գործողությունների իրականացման վերաբերյալ»:

Գրքույկը բաղկացած է մի քանի գլխից, որոնցում տրվում է հակիրճ տեղեկություն երկրի մասին, որտեղ ընթանում են մարտական գործողություններ, աշխարհագրական տեղեկություններ, լեզուն, տոները, արտարժույթը, սովորույթները:

“Նովայա գազետան” գրում է, որ մասնագետների կարծիքով, տվյալ գրքույկները հիշեցնում են Աֆղանստանում պատերազմի ժամանակ սովետական զինվորականներին բաժանվող գրքույկները: