5 պատճառ տոները Հայաստանում անցկացնելու համար
Ամանորը Հայաստանում անցկացնելու համար պատճառները, որոնք այժմ կթվարկենք, տեղացիների համար չեն: Դրանք հայտնի են հայաստանցիներին, բայց նրանց տանն է պահում այդ օրերին հիմնականում ոչ այլ ինչ, քան հայտնի ավանդույթը. Նոր տարին պետք է տանը դիմավորել: Եվ որքան էլ սա սնահավատություն թվա, շատերը հավատրիմ են մնում տատաիկներից լսած այս ասացվածքին:
Ահա թե ինչ են առաջարկում տուրիստական գործակալությունները օտարերկրացիներին, որ նրանք թողնեն իրենց տունն ու տեղը և գան տոները Հայաստանում դիմավորելու.
1. Պասիվ հանգիստ և համեղ ուտելիքներ սիրող զբոսաշրջիկներին առաջարկվում է տեղակայվել տարբեր շրջաններում գործող հանգստյան տներում և համտեսել համադամ ուտեստներ, այդ թվում ամառվա ամիսներին հատուկ և ձմռան օրերի համար պահպանված բերք ու բարիքից, ըմբոշխնել հայկական կոնյակ և գինի:
2. Հոգևոր սննդի սիրահարներին առաջարկվում է Սուրբ ծնունդը դիմավորել քրիստոնեությունն առաջինն ընդունած երկրում: Դրա համար Հայաստանում պետք է լինել մինչև հունվարի 6-ը ներառյալ, քանի որ Հայաստանյայց Առաքելական եկեղեցին այդ օրն է նշում տոնը և այդ օրն է մատուցում Սուրբ ծննդյանը նվիրված պատարագը:
Ամանորյա փաթեթների շրջանակներում տուրիստական գործակալությունները զբոսաշրջիկների համար կազմակերպում են այցելություն նաև գլխավոր տաճար՝ Մայր Աթոռ Սբ Էջմիածին:
Հայաստանը հարուստ է հնագույն եկեղեցիներով, դրանք սփռված են ողջ երկրով մեկ՝ և ուր էլ ուղևորվեն զբոսաշրջիկները, հաստատ հնարավորություն կունենան ծանոթանալու միշտ ասկետիկ, բայց շատ տարբեր ճարտարապետական լուծումներով կառուցված տաճարներին:
Հայաստանի բնական ու պատմամշակութային հուշարձանները, դարերի պատմություն ունեցող շինությունները մեր երկիր այցելելու ևս մեկ պատճառ են:
3. Յուրահատուկ իրավիճակեր նախընտրողներին առաջարկվում է մասնակցել ամանորյա հետաքրքիր ավանդույթներին: Օրինակ, դեկտեմբերի 31-ին կեսգիշերը դիմավորել հայկական տաճարներից մեկում, ուր կատարվում է նռան օրհնման արարողություն:
4. Էքստրիմի սիրիահարներին Հայաստանն առաջարկում է բարձրանալ ձնով պատված լեռները, տոնական տրամադրությունն ավելի բարձրացնել լեռնադահուկային մարզաձևերով՝ դահուկներով սահել սարն ի վար, քշել սնոուբորդ:
5. Վայելել Հայաստանին հատուկ հյուրասիրությունն ու ջերմ մթնոլորտը, օրվա ցանկացած ժամի քայլել, զբոսնել, զվարճանալ անվտանգ երկրում: Հատկապես վերջին շրջանում այս կետն առավել կարևոր է թվում:
Ինչպես նշում է Visit Armenia տուրիստական ընկերության հիմնադիր Վլադիմիր Գեևորգյանըշ, Ամանորը Հայաստանում նշել ցանկացողների հիմնական մասը Ռուսատանից է ժամանում՝ ընտանիքներով կամ զույգերով. «Այդ օրերին թեպետ քաղաքից դուրս գտնվող հանգստյան տներում գները թանկ են, սակայն մայրաքաղաքի հյուրանոցներում բավականին մատչելի պայմաններ են: Իսկ ռուս տուրիստները տոնական օրերին գերադասում են Երևանում լինել»:
