Վրաստանում նոր հեռուստատեսային սկանդալ է հասունանում

Վրաստանում ևս մեկ մեդիասկանդալ է հասունանում: Այս անգամ հասարակության ուշադրության կենտրոնում հայտնի “Մաեստրո հեռուստաընկերությունն է, որը հեռուստատեսային վարկանիշով երրորդ տեղն է զբաղեցնում:

Նախորդ շաբաթ հայտնի դարձավ, որ “Մաեստրոյի արժեթղթերի 55 տոկոսի սեփականատերն է դարձել երգիչ և շոումեն Գեորգի Գաչեչիլաձեն: Այս փաստը բավականին անսպասելի էր հեռուստաալիքի մենեջմենթի և լրագրողների համար:

Գաչեչիլաձեն արդեն հեռացրել է հեռուստաալիքի տնօրեն Բայա Գադաբաձեին զբաղեցրած պաշտոնից և նրա տեղը նշանակել սեփական եղբորը՝ Լևան Գաչեչիլաձեին (հիշեցնենք, որ Լևան Գաչեչիլաձեն Վրաստանի նախագահի նախկին թեկնածու է, 2008թ. նախագահական ընտրություններին նա Միխայիլ Սահակաշվիլիի մրցակիցն էր: Թբիլիսիում Լևան Գաչեչիլաձեն հավաքած ձայների քանակով շրջանցել էր Միխայիլ Սահակաշվիլիին, չնայած վերջնական արդյունքով ընտրություններում երկրորդ տեղը զբաղեցրեց):

Բայա Գադաբաձեն կասկածի տակ է դնում հեռուստաընկերության ֆինանսավորման նոր աղբյուրները և, չնայած զբաղեցրած պաշտոնից նրան ազատելուն, մտադիր չէ հեռանալ հեռուստաընկերությունից: Փետրվարի 4-ին Բայա Գադաբաձեն պաշտոնապես սկսեց բողոքել: Նա պնդում է, որ հեռուստաընկերության խմբագրական անկախությանը վտանգ է սպառնում:

Գեորգի Գաչեչիլաձեն չի թաքցնում, որ “Մաեստրոյի բաժնետոմսերի հսկիչ փաթեթը ձեռք բերելու համար անհրաժեշտ գումարը նա ստացել է մահացած բիզնեսմեն Բադրի Պատարկացիվիլիի ընտանիքից, մասնավորապես՝ բիզնեսմեն Իրակլի Ռուխաձեից, ով Պատարկացիշվիլիի ընտանիքի անդամ է և զբաղվում է ֆինանսական հարցերով:

Հիշեցնենք, որ Պատարկացիշվիլի ընտանիքի ղեկավարության տակ է “Իմեդի հայտնի հեռուստաալիքը: “Իմեդիի սեփականատերերի կողմից մրցակից “Մաեստրոյին ֆինանսական օգնություն ցուցաբերելը, հասարակությունում հարցեր է առաջացնում:

“Մաեստրոն այսօր եկամտաբեր ընկերություն չէ, քանի որ լուրջ ֆինանսական խնդիրներ ունի: Հեռուստաալիքի սնանկության մասին գործը ներկա պահին քննվում է դատարանում, ընդհանուր պարտքը վարկատուներին կազմում է մի քանի տասնյակ միլիոն լարի: Այդ պատճառով էլ հեռուստաալիքի բաժնետոմսերի ձեռքբերումը չի կարող եկամտաբեր ներդրում համարվել: Այս փաստը լրացուցիչ կասկածներ է հարուցում:

Միաժամանակ հայտնի դարձավ երկրի վարչապետ Գեորգի Կվիրիկաշվիլիի հետ Գեորգի Գաչեչիլաձեի հանդիպման մասին, որը կայացել է Պետկանցելյարիայի շենքում Գեորգի Գաչեչիլաձեի կողմից “Մաեստրոյի բաժնետոմսերի հսկիչ փաթեթը գնելու նախօրեին: Գաչեչիլաձեն այս փաստը չի հերքում, նույնիսկ հայտարարում է. “Վարչապետն իմ ընկերն է, մենք երկու օրը մեկ հանդիպում ենք, ո՞րն է խնդիրը: Չեմ հասկանում… Ես “Մաեստրոյի 55 տոկոս բաժնետոմսերի սեփականատերն եմ, ի՞նչ կապ ունի վարչապետը: Մեր խոսակցությունը բոլորովին այլ թեմաների շուրջ է եղել…:

Վրաստանում 2016թ. խորհրդարանական ընտրություններին մի քանի ամիս է մնացել: Գարնանը երկիրը կթևակոխի ակտիվ նախընտրական փուլ, այդ պատճառով էլ ամենահայտնի հեռուստաընկերությունում ընթացող գործընթացները փորձագետների մոտ բազմաթիվ հարցեր են առաջացնում և կասկածների հիմք տալիս:

Փորձագետներն ու լրագրողները զուգահեռներ են անցկացնում “Մաեստրոյի շուրջ ընթացող խմորումների և մի քանի ամիս առաջ “Ռուսթավի-2 հեռուստաընկերության հետ կապված զարգացումների միջև: Նրանց կարծիքով, առաջին հայացքից երկու դեպքն էլ հեռուստաալիքների սեփականատերերի միջև մասնավոր վեճ է, չնայած երկուսի դեպքում էլ բացահայտ քաղաքական ենթատեքստ է զգացվում:

“Վերջին մի քանի ամիսների ընթացքում որոշ հեռուստաալիքների վարկանիշային հաղորդումներ փակվեցին, մենք հիշում ենք և ընդդիմադիր Ռուսթավի-2-ի հետ կապված այն աղմկահարույց գործը, որը մինչ այժմ քննվում է դատարանում… Իսկ այժմ ինչ-որ գործընթացներ են գնում Մաեստրոյի շուրջ… Այս ամենն էլ ավելի է ուժեղացնում այն կասկածները, որ մենք գործ ունենք նախընտրական շրջանում մեդիադաշտի հանդեպ քաղաքական վերահսկողություն սահմանելու փորձի հետ, — ասում է Քաղաքացիական զարգացման գործակալության գործադիր տնօրեն Զվիադ Դևդարիանին:

“Մաեստրոյի նոր գլխավոր տնօրեն Լևան Գաչեչիլաձեն իր զբաղեցրած պաշտոնում առաջին հայտարարություններն է անում. “Իմ գլխավոր կարգախոսը մարդկանց “Ռուսթավի-2-ից դեպի “Մաեստրո ուղղորդելն է: Ես շատ սուբյեկտիվ վերաբերմունք ունեմ “Ռուսթավի-2-ի հանդեպ: Ես ունեմ իմ սեփական պատմական հավակնությունները և ուզում եմ գերազանցել “Ռուսթավի-2-ի վարկանիշը: