«Պատահում է, որ ամուսինը ծեծում է». Չեչնիայի ղեկավարը պաշտպանել է 23-ամյա աղջկա մահվան մեջ ենթադրյալ մեղավորներին
Ռուսաստանի կազմում գտնվող Չեչնիայի հանրապետությունում, Գուդերմես քաղաքում մահացել է երիտասարդ կին՝ 23-ամյա Մադինա Ումաևան: Աղջկա ընտանիքը հայտարարել է, որ նա ամուսնու և նրա ընտանիքի կողմից բռնության զոհ է դարձել: Բայց հետո մահացած աղջկա մայրը ներողություն է խնդրել իր խոսքերի համար Չեչնիայի ղեկավարից, ինչպես դա հաճախ հարկադրված են անել Չեչնիայի բնակիչները, ում խոսքերը այս կամ այն պատճառով դուր չեն գալիս Ռամզան Կադիրովին:
Չեչնիայի նախագահն ինքը հանդես է եկել ենթադրյալ բռնարարի ընտանիքի պաշտպանությամբ:
Երիտասարդ դստերը կորցրած կնոջ ներողությունը հեռարձակել է տեղի պետական հեռուստաընկերությունը:
«Ես բոլորին խնդրում եմ ինձ ներել, — տեսախցիկի առաջ ասել է Հութմաթ Դավլեթմիրզաևան, — ես սխալ եմ եղել, լսել եմ այն, ինչ ասել են մարդիկ: Ես ուզում եմ ներողություն խնդրել [Չեչնիայի] առաջնորդից և բոլորից»,- հայտարարել է նա: Հետո ներողություն է խնդրել մահացածի մորեղբայրը և վստահեցրել, որ աղջկա երեխաները կվերադարձվեն հորը:
«Վիրավորանքները կանցնեն, վերադարձիր ամուսնուդ մոտ»
Մադինա Ումաևան մահացել է հունիսի 12-ին: Նրա հարազատները պնդում էին, որ Մադինային սպանել է ամուսինը: Երիտասարդ կինը մի քանի անգամ փորձել է հեռանալ ամուսնուց ծեծի պատճառով, նա բողոքել է նաև սկեսուրից: «Կավկազսկի ուզել»-ին տված հարցազրույցում աղջկա մայրը պատմել է դստեր վիճաբանության մասին ամուսնու հետ մահից առաջ.
«Դրանից մի քանի օր առաջ Մադինան եկավ ինձ մոտ, որովհետև վիճել էր [ամուսնու ընտանիքի հետ]: Իսկ երեխաներին այնտեղ էր թողել: Երեք օրից ես նրան խնդրեցի. «Գնա քո երեխաների մոտ, ինչպես կարող ես առանց նրանց: Ոչինչ, բոլոր վիրավորանքները կանցնեն, գնա»:
Աղջկան հետ ուղարկելուց հետո հաջորդ օրը Հութմաթը ստիպված էր շտապ գնալ նրա մոտ, որովհետև Մադինան փակվել էր սենյակում և հրաժարվում էր խոսել ամուսնու ընտանիքի հետ: Մայրը նորից փորձել է համոզել աղջկան հաշտվել և գնացել է տուն: Իսկ երեկոյան նրան հաղորդել են, որ Մադինան իրեն վատ է զգում:
«Մենք գնացինք, ես և իմ երկու աղջիկները, իսկ այնտեղ նա մահացած էր: Ես շոկի մեջ էի: Ես նրանց խնդրում էի, լալիս էի. «Ինչո՞ւ գիշերը հուղարկավորել: Թողեք մինչև առավոտ, թույլ տվեք ինձ գիշերել նրա հետ»: Բայց՝ ոչ, ինձ նույնիսկ մարմինը ցույց չտվեցին: Երբ ինձ մոտ թողեցին, նրան արդեն լողացրել և ծածկել էին ամբողջովին: Միայն դեմքը ցույց տվեցին», — ասել էր Հութմաթը:
Ամուսնու ընտանիքը ընտանեկան բռնության վարկածը կտրականապես հերքում է՝ հայտարարելով, որ Մադինայի մահվան պատճառը էպիլեպտիկ ցնցումն է եղել: Հութմաթը ասում է, որ դուստրը երբեք էպիլեպսիա չի ունեցել: Նա հայտարարել է, որ Մադինայի ամուսնուն փորձում են պաշտպանել, քանի որ նա աշխատում է ուժային կառույցներում: Սպանվածի հարազատները պահանջում էին մարմնի արտաշիրիմում, դա տեղի է ունեցել հունիսի 20-ին:
Կադիրովի խոսքը
Հունիսի 24-ին պետական հեռուստաընկերության եթերում հատուկ թողարկում է եղել Մադինա Ումաևայի մահվան վերաբերյալ: Այդ ռեպորտաժի գլխավոր հերոսը կարծես Չեչնիայի նախագահ Ռամզան Կադիրովը լիներ:
Նա հայտարարել է, որ դիահերձումը բռնի մահվան նշաններ ցույց չի տվել, և հիասթափություն է հայտնել, որ մահացածի մարմինը փորձաքննության են ենթարկել, ինչը հակասում է ազգային ավանդույթներին: Ահա Կադիրովի այս խոսքերը հասցեագրված են սպանվածի մորը.
«Այդ աղջկա մարմնից հանել են բոլոր օրգանները, կտրել են գլուխը: Նույնիսկ եթե նրան սպանել են, դու պետք է պարզապես բոլորին ստիպեիր երդվել, որ նրանք ոչինչ չեն տեսել: Իսկ դու ստիպել ես հանել քո դստեր դիակը»:
Չեչնիայի ղեկավարը հանձնարարել է Հութմաթ Դավլեթմիրզաևից վերցնել թոռներին և հանձնել նրանց հորը՝ Վիսխաջի Համիդովին:
Տեսանյութերից մեկում, որը մեջբերում է «Մեդիազոնան», Կադիրովը ասում է, որ մահացած աղջիկը «պետք է կառչեր իր ամուսնությունից», որովհետև «ամուսնանալիս լինում են և կռիվներ, և վեճեր, և պատահում է, որ ամուսինը ծեծում է», — մեջբերում է «Մեդիազոնան» Կադիրովի խոսքերը:
Իրավաբանի մեկնաբանությունները
«Հանձնաժողով ընդդեմ խոշտանգումների» հասարակական կազմակերպության իրավաբան Աբուբաքար Յանգուլբաևը «Կավկազսկի ուզել»-ի հետ զրույցում նշել է, որ Ումաևայի մահվան պաշտոնական վարկածը և պաշտոնական փորձաքննության արդյունքները հարցեր են առաջացնում:
«Վարկածները շատ կարող են լինել: Այն ամենը, ինչ մենք տեսնում ենք այս տեսահոլովակում՝ տարօրինակ հուղարկավորություն, իրադարձությունների մասնակիցների տարօրինակ ցուցմունքներ, հանգեցնում է դրան, որ այս պատմությունը շատ հակասական է, և հարկավոր է ոչ միայն նախաքննություն անցկացնել, այլ քրեական գործ հարուցել և լիարժեք, իրական հետաքննություն անցկացնել», — եզրափակել է նա:
