Չեչնիայում ծեծել են «Նովայա գազետայի» լրագրողին և փաստաբանին

Գրոզնիում՝ Ռուսաստանի կազմում գտնվող Չեչնիայի Հանրապետության մայրաքաղաքում, հարձակվել են ռուսական «Նովայա գազետա» պարբերականի տեսաբան Ելենա Միլաշինայի և հայտնի փաստաբան Մարինա Դուբրովինայի վրա։

Ինչպես հաղորդում է «Նովայա գազետան», ագրեսիվ խումբը՝ հիմնականում կանայք, հարձակվել են նրանց վրա «Կոնտինենտ» հյուրանոցի նախասրահում փետրվարի 6–ի ուշ երեկոյան։ Լրագրողին և փաստաբանին ծեծել են այդ թվում՝ ոտքերով և այդ ամենը տեսանկարահանել։

•Ահաբեկված ծնողները հրաժարվում են իրենց երեխաներից․ Չեչնիայում հետապնդում են արդեն ոչ միայն իրավապաշտպաններին և ԼԳԲՏ–ին, այլև դեռահասներին

•Արտադատարանային մահապատիժներ Չեչնիայում

•«Դա մեր տղամարդն է, մեր գործերն են, և մենք ինքներս գլուխ կհանենք»․ Չեչնիայի գեյերին շարունակում են հետապնդել ողջ Ռուսաստանի տարածքում

Ելենա Միլաշինան պնդում է, որ ավելի վաղ բազմիցս սպառնալիքներ է ստացել Չեչնիայի իշխանություններից և անձամբ նախագահ Ռամզան Կադիրովից։

Միլաշինան ու Դուբրովինան Գրոզնի էին եկել Իսլամ Նուխանովի գործով դատական նիստին, որը ձերբակալվել էր այն բանից հետո, երբ տեսանկարահանել էր Կադիրովի շրջապատի հարուստ տներն ու տեսագրությունը համացանց գցել։

Լրագրողն ու փաստաբանը Չեչնիայում ոստիկանություն են դիմել և հաղորդել, որ իրենց վրա հարձակվել են։ Չեչնիայի իշխանություններից դեռ արձագանք չկա։

https://www.facebook.com/photo.php?fbid=3207050752657036&set=pb.100000564289616.-2207520000..&type=3&theater

Ելենա Միլաշինան Չեչնիայում մարդու իրավունքների խախտման վերաբերյալ բազմաթիվ հետաքննությունների հեղինակ է։ Այդ թվում՝ 27 մարդու առևանգման և սպանության վերաբերյալ, որոնց խեղդամահ են արել կամ գնդակահարել «Կադիրովի անվան նկուղում»։ Ինչպես նաև՝ հանրապետությունում գեյերի հետապնդման մասին։ Մեծ ռեզոնանս է ստացել չեչեն անչափահաս Լուիզա Գոյլաբիևայի հետ ոստիկանության շրջանային բաժնի ղեկավար, 57–ամյա Նաժուդ Գուչիգովի ամուսնության մասին նյութը․ լրագրողի պնդմամբ՝ պաշտոնյան աղջկա և նրա ընտանիքի վրա ճնշում է գործադրել ամուսնության հարցով։ Նրանց չի փրկել անգամ այդ մասին բարձրաձայնումն ու իրավապաշտպնների միջամտությունը․ Գուչիգովին հանրային կերպով սատարել է Ռամզան Կադիրովը։