Ձերբակալվել է Հայաստանի վարչապետի նկատմամբ մահափորձի ևս մեկ կասկածյալ
Երևանում շարունակվում են ձերբակալությունները Հայաստանի վարչապետ Նիկոլ Փաշինյանի նկատմամբ մահափորձի և իշխանության բռնազավթման գործով։
Մեղադրանք է առաջադրվել «Սիսական» կամավորական ջոկատի հրամանատար Աշոտ Մինասյանին, որն առավել հայտնի է որպես «Աշոտ Երկաթ»։
Ավելի վաղ այս նույն գործով ձերբակալվել էր նաև Հայաստանի Ազգային անվտանգության ծառայության նախկին տնօրեն և «Հայրենիք» ընդդիմադիր կուսակցության ղեկավար Արթուր Վանեցյանը։
Երևանի դատարանը Մինասյանին ձերբակալելու մասին որոշումը հիմնավորված է համարել։ Նա կալանքի տակ կմնա։
Մինչ նիստն ընթանում էր, դատարանի բակում հարյուրավոր մարդիկ, այդ թվում՝ Մինասյանի ծառայակիցները, բողոքի ցույց էին անցկացնում։
Պատերազմի վետերանները վանկարկում էին «Նիկոլ, դավաճան» և «Տրիբունալ»։ Նրանք պահանջում էին պատասխանատվության ենթարկել վարչապետ Նիկոլ Փաշինյանին՝ ռազմական ժամանակահատվածի օրենքների համաձայն։ Ակցիայի մասնակիցները հայտարարեցին, որ իրենց ծառայակցի դեմ գործը քաղաքական հետապնդում է։
Ըստ Աշոտ Մինասյանի որդու՝ հետապնդումների պատճառն իր հոր հայտարարություններ են, նրա պահանջը «պատասխանատվության ենթարկել դավաճան Նիկոլ Փաշինյանին, որը վաճառել է Արցախի 80%-ը»։
Նոյեմբերի 10-ից հետո, երբ եռակողմ համաձայնագիր է ստորագրվել Արցախում հրադադարի մասին, ընդդիմությունն ու հազարավոր մարդիկ դուրս են եկել Երևանի փողոցներ՝ պահանջելով վարչապետի հրաժարականը։ Նրանք կարծում են, որ պետության ղեկավարը հանցավոր գործարքի մեջ է մտել և փաստաթուղթ ստորագրել Ադրբեջանին Արցախի ինքնակամ հանձնելու մասին։
Նոյեմբերի 14-ին Ազգային անվտանգության ծառայությունը հայտարարել է, որ հաջողվել է կանխել Նիկոլ Փաշինյանի նկատմամբ մահափորձն ու իշխանության բռնազավթման փորձը։ Հանցավոր համաձայնության գալու մեջ մի խումբ անձինք են կասկածվում։