Հայաստանը փնտրում է իրանական ու թուրքմենական գազ գնելու հնարավորություններ

REUTERS/Raheb Homavandi

Հայաստանն ու Իրանը քննարկել են իրանական գազ գնելու և Հայաստան տեղափոխելու հնարավորությունը: Երևանում այս տեղեկությունը շատերը գնահատել են որպես էներգետիկ այլընտրանքային աղբյուր գտնելու և ռուսական գազից կախվածություն չունենալու միտում:

Նոր հնարավորությունները քննարկվել են վարչապետ Կարեն Կարապետյանի օրերս Իրան կատարած այցի ընթացքում:

«Հայաստանի վարչապետը հայտարարել է, որ Երևանը շահագրգռված է Իրանից գազ գնելու հարցում, ինչին ի պատասխան՝ Իրանի նավթի նախարարը խոստացել է հարցը քննարկել Իրանի ազգային գազային ընկերության հետ»,- փոխանցել է իրանական Asrenaft լրատվական գործակալությանը:

Իրանական ԶԼՄ-ների փոխանցմամբ՝ Իրանի նավթի նախարարը  հայտնել է, որ Կարեն Կարապետյանի հետ քննարկել են նաև թուրքմենական գազը դեպի Հայաստան տեղափոխելու հարցը, ինչին Իրանը պատրաստ է օժանդակել:

Հայաստանում շատերը կարծում են, որ  էներգիայի աղբյուրների դիվերսիֆիկացումը հարկավոր է նրա համար, որ Հայաստանը նվազեցնի գազային կախվծությունը Ռուսաստանից:

Բայց էներգետիկ ոլորտի փորձագետ Վահե Դավթյանն ասում է, որ դա այդքան էլ այդպես չէ: Ըստ նրա՝ Իրանը կարող է մեծացնել Հայաստան ներկրվող գազի ծավալները միայն Ռուսաստանի իմացությամբ:

«Իրան-Հայաստան» գազամուղը ռուսական «Գազպրոմ» ընկերության սեփականությունն է և, եթե անգամ Իրանը ինչ-ինչ բանակցությունների արդյունքում ավելի էժան գազ առաջարկի Հայաստանին կամ մեծացնի գազի ծավալները, ապա միևնույն է, այն Հայաստան է գալու նույն գազամուղով, որը պատկանում է ռուսական ընկերությանն ու ըստ այդմ բաշխվելու է ռուսական օպերատորի կողմից, Ռուսաստանի իմացությամբ»,- ասել է փորձագետը:

Վահե Դավթյանը նշել է, որ Իրանը դժվար թե կարողանա Հայաստանին առաջարկել ավելի էժան գներով գազ, քան ռուսականն է:

«Մենք ՌԴ-ից գազ ենք գնում սահմանին 150 ԱՄՆ դոլարով: Սա Հայաստանի համար զեղչային համակարգով սահմանված գին է, մինչդեռ իրանական գազի գինը Հայաստանի համար 170-180 ԱՄՆ դոլար արժի: Իհարկե, իրանական գազն իր որակով ավելի բարձր է ռուսական գազից, բայց 1000 խորանարդ մետրի պարագայում իրանական գազը 20-30 ԱՄՆ դոլարով թանկ է ռուսական գազից»,- մանրամասնել է Դավթյանը:

Իրանական գազի ծավալների հնարավոր մեծացման ու դրա ժամկետների մասին պաշտոնապես ոչինչ չի փոխանցվում: