Պավել Շերեմետի հուղարկավորությունը տեղի է ունենալու Մինսկում հուլիսի 23-ին: Այդպես են ցանկացել նրա հարազատները, չնայած որ վերջին տարիներին նա ապրել է Կիևում, որտեղ էլ մահացել է հուլիսի 20-ին:
Հետաքննությունը լրագրողի սպանության 6 վարկած է դիտարկում: Այդ մասին “112 Ուկրաինա հեռուստաալիքի եթերում հայտարարել է Ուկրաինայի Անվտանգության խորհրդի պետի խորհրդական Յուրի Տանդիտը:
Հետաքննության կարծիքով, դաժան հանցագործության դրդապատճառը կարող է Ուկրաինայի պետանվտանգության դեմ հատուկ գործողությունը լինել:
112 հեռուստաալիքը, վկայակոչելով Կիևի դատախազության մամուլի քարտուղար Նադեժդա Մաքսիմեցին, հաղորդեց, որ, հնարավոր է, պլանավորվում էր Շերեմետի կնոջ՝ “Ուկրաինսկայա պրավդա թերթի խմբագիր Ալյոնա Պրիտուլայի լիկվիդացիան, ում մեքենան էլ հենց պայթեցվել է, երբ դրա մեջ էր Պավել Շերեմետը:
Միաժամանակ Ինտերֆաքս-Ուկրաինա գործակալությունը հաղորդում է, որ ՆԳ նախարարի խորհրդական Զորյան Շկիրյակը հայտարարել է, որ որպես հիմնական վարկած դիտարկվում է Պավել Շերեմետի պատվիրված սպանությունը՝ կապված նրա պրոֆեսիոնալ գործունեության հետ:
Ընդ որում, նա կրկնեց Անտոն Գերաշչենկոյի խոսքերը, նշելով, որ քննիչները չեն բացառում հանցագործությանը ռուսական ուժերի ներգրավվածությունը:
Մահվանից առաջ Պավել Շերեմետը բողոքում էր, որ իրեն հետևում են, հաղորդում է “Նովայա գազետան: Ընկերները նշեցին, որ Պավելն ու իր կինը՝ Ալյոնա Պրիտուլան, բազմիցս ասել են, որ “պոչ են նկատում իրենց ետևից:
Մեքենայում գործի է դրվել պայթուցիկ սարք:
44-ամյա բելառուս լրագրող Պավել Շերեմետը սպանվեց հուլիսի 20-ին ավտոմեքենայի պայթյունի արդյունքում: Նա աշխատում էր “Ուկրաինսկայա պրավդայում:
Մեքենան, որով նա ուղևորվում էր դեպի “Վեստի ռադիոկայան հաղորդում ձայնագրելու համար, պայթել է տնից 500-600մ հեռավորության վրա: Պայթուցիկ սարքը տեղադրված է եղել վարորդի նստատեղի տակ: Պայթյունից հետո մեքենան հրդեհվել է:
Ուկրաինական “Օբոզրևատել թերթը հրապարակել է արտաքին տեսահսկման սարքի տեսագրությունը: Դրա վրա մեքենայի պայթյունի պահն է: Ուկրաինայի ազգային ոստիկանական ուժերի պետ Հաթիա Դեկանոիձեի խոսքով, ուկրաինական ոստիկանության և անվտանգության ծառայության հետ մեկտեղ գործի քննությանը մասնակցում են նաև ԱՄՆ Հետաքննությունների դաշնային բյուրոյի մասնագետները:
Տվյալ պահին քննիչներն աշխատում են Շերեմետի և Պրիտուլայի (մահացածի քաղաքացիական կինը) բնակարանում, ավտոկայանատեղիում, որտեղ հանցագործությունից առաջ կանգնեցրած է եղել մեքենան: Պավել Շերեմետի սպանության վերաբերյալ թարմացվող տեղեկատվությանը հետևեք ru.hromadske.ua կայքում: